مەملەكەت باسشىسىنىڭ تاپسىرمالارىنا سايكەس، ەلىمىزدە حالىقتىڭ تۇرمىس ساپاسىن جاقسارتۋعا جانە ەلگە قايتارىلعان زاڭسىز يەمدەنىلگەن اكتيۆتەر ەسەبىنەن الەۋمەتتىك ينفراقۇرىلىمدى دامىتۋعا باعىتتالعان جوبالاردى جۇزەگە اسىرۋ جالعاسىپ جاتىر.
ۇكىمەت جامبىل وبلىسىنىڭ قورداي جانە تالاس اۋداندارىندا ەكى دارىگەرلىك امبۋلاتوريانىڭ قۇرىلىس جۇمىستارىن اياقتاۋعا ارناۋلى مەملەكەتتىك قوردان 319،5 ملن تەڭگە ءبولۋ تۋرالى شەشىم قابىلدادى. وندا تاۋلىگىنە 45 كەلۋشىگە قىزمەت كورسەتىلەدى.
نىساندار «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا سالىنۋدا. باعدارلاما بويىنشا وڭىردە 30 نىسان قۇرىلىسى جوسپارلانعان، ونىڭ 28ء-ى پايدالانۋعا بەرىلدى. قالعان ەكەۋى بيىل تاپسىرىلادى.
ۇلتتىق جوبا شەڭبەرىندە قازاقستاندا 655 جاڭا مەكەمە – مەديسينالىق جانە فەلدشەرلىك-اكۋشەرلىك پۋنكتتەر، دارىگەرلىك امبۋلاتوريالار قۇرىلىسى جوسپارلانۋدا. قازىرگى ۋاقىتتا 468 نىساندا جۇمىس اياقتالدى. العاشقى مەديسينالىق-سانيتاريالىق كومەك كورسەتۋ مەكەمەلەرىن سالۋعا جانە اۋرۋحانالاردى رەكونسترۋكسيالاۋعا قاراجات رەسپۋبليكالىق بيۋدجەتتەن بولىنەدى. سونىمەن قاتار قارجىلاندىرۋ ارناۋلى مەملەكەتتىك قور ەسەبىنەن جۇزەگە اسىرىلادى.