مينيستر پايدالانىلمايتىن اسكەري مۇلىك پەن قارۋ-جاراقتى جويۋ شارالارى تۋرالى ەسەپ بەردى
پرەزيدەنتكە – قارۋلى كۇشتەردىڭ جوعارعى باس قولباسشىسىنا قورعانىس مينيسترلىگىنىڭ بىلتىر اتقارعان قىزمەتىنىڭ ناتيجەلەرى تۋرالى ەسەپ بەرىلىپ، وسى جىلعا ارنالعان جوسپارى تانىستىرىلدى، دەپ حابارلايدى Almaty-akshamy.kz.
قاسىم-جومارت توقايەۆقا اسكەري دايىندىقتىڭ جاي-كۇيى، قازاقستان ارمياسىنىڭ قۇرامى مەن قۇرىلىمىن جەتىلدىرۋ، جۇرگىزىلگەن جەدەل جانە جاۋىنگەرلىك ازىرلىك شارالارى جونىندە اقپارات بەرىلدى.
گەنەرال-پولكوۆنيك رۋسلان جاقسىلىقوۆ بىلتىر ارنايى وپەراسيالار كۇشتەرى قۇرىلعانىن، دەسانتتىق-شابۋىلداۋ اسكەرىنىڭ الەۋەتى ارتىپ كەلە جاتقانىن جەتكىزدى. سونداي-اق قازىرگى سىن-قاتەرلەر مەن قاۋىپتەرگە بايلانىستى اسكەردىڭ جاۋىنگەرلىك ازىرلىك باعدارلاماسى قايتا قارالدى.
مەملەكەت باسشىسىنا ارمياداعى جاعىمسىز جايتتاردىڭ الدىن الۋ، جاستاردىڭ اسكەري بورىشىن ورىنداۋعا دەگەن قۇلشىنىسىن ارتتىرۋ، سونداي-اق الەۋمەتتىك قامسىزداندىرۋ جۇيەسىن جەتىلدىرۋ جونىندە قورعانىس ۆەدومستۆوسىنىڭ قابىلداپ جاتقان شارالارى تۋرالى مالىمەت بەرىلدى.
قورعانىس ءمينيسترى قارۋلى كۇشتەردى زاماناۋي تەحنيكامەن جانە قارۋ-جاراقپەن جابدىقتاۋ، اۋماقتىق قورعانىس اسكەرىن دامىتۋ، اسكەري ينفراقۇرىلىمدى جەتىلدىرۋ جانە بىتىمگەرلىك مۇمكىندىكتەرىن كەڭەيتۋ جونىندە باياندادى. سونداي-اق پايدالانىلمايتىن اسكەري مۇلىك پەن قارۋ-جاراقتى جويۋ شارالارى تۋرالى ەسەپ بەردى.
بۇدان بولەك، جوعارعى باس قولباسشىعا جاۋىنگەرلىك ازىرلىكتى شىڭداۋ، كەڭ اۋقىمدى، سونىڭ ىشىندە حالىقارالىق دەڭگەيدەگى اسكەري وقۋ-جاتتىعۋ جيىندارىن وتكىزۋگە قاتىستى بيىلعا جوسپارلانعان ءىس-شارالار تۋرالى باياندالدى.
كەزدەسۋ سوڭىندا پرەزيدەنت اسكەري قىزمەتشىلەردىڭ ءومىرى مەن دەنساۋلىعىن ساقتاۋ، اسكەري ورتاداعى مورالدىق-پسيحولوگيالىق احۋالدى جاقسارتۋ ماڭىزدى ەكەنىن اتاپ ءوتتى. سونداي-اق مينيسترلىككە ەلىمىزدىڭ قورعانىس قابىلەتىن ودان ءارى ارتتىرۋ، مەرزىمدى اسكەري قىزمەتكە شاقىرۋدىڭ كوكتەمگى ناۋقانىن ساپالى ۇيىمداستىرۋ جونىندە ءبىرقاتار تاپسىرما بەردى.