وقۋ-اعارتۋ ءمينيسترى اسحات ايماعامبەتوۆ ديرەكتورمەن قوسا مەكتەپتىڭ باسقا قىزمەتكەرلەرىنىڭ دە اۋىسۋىنا توسقاۋىل قويۋ كەرەك، دەپ حابارلايدى Almaty-akshamy.kz قازاقپاراتقا سىلتەمە جاساپ.
«روتاسيا وتكىزگەن كەزدە، ديرەكتورمەن قوسا ورىنباسارلارىنىڭ، ەسەپشىسىنىڭ، باسقا قىزمەتكەرلەردىڭ بىرگە اۋىسۋىنا توسقاۋىل قويۋ كەرەك. بۇل جايىندا ايتتىق. باقىلاۋ دەپارتامەنتتەرى ءتيىستى قاداعالاۋعا السىن. بۇل روتاسيانى ءبارىن ءبىر مەكتەپتەن ەكىنشى مەكتەپكە كوشىپ بارۋى ءۇشىن ىستەپ جاتقان جوقپىز. وسى ماسەلەگە باقىلاۋ جۇرگىزۋ كەرەك. جالپى، بارلىق جۇمىس زاڭ اياسىندا ىسكە اسۋى ءتيىس. كەيبىر وڭىردە «مىنا مەكتەپكە بارعىم كەلەدى، مىناعان بارعىم كەلمەيدى» دەيتىندەردى ەستىپ جاتىرمىن. مۇنى توقتاتۋ كەرەك. ەگەر «روتاسيانى تۇسىنبەيمىز، قابىلدامايمىز» دەسە، ونداي كىسىلەرمەن ەڭبەكشارتىن ءتىپتى توقتاتۋ قاجەت»، - دەدى مينيستر ۆەدومستۆونىڭ اپپارات جينالىسىندا.
اسحات ايماعامبەتوۆ روتاسيا وتە ماڭىزدى تەتىك ەكەندىگىن باسا ايتتى.
«ءبىراق، ەكى ماسەلەگە نازار اۋدارۋ قاجەت. بىرىنشىدەن، روتاسيا جۇرگىزگەن كەزدە ورىنباسارلارىن، ەسەپشىلەرىن وزىمەن بىرگە الىپ جۇرمەۋ، ەكىنشىدەن، وبەكتيۆتى كوزقاراسپەن، زاڭناماعا ساي اۋىستىرۋ قاجەت. بۇل جەردە ءارتۇرلى تاۋەكەلدەرگە جول بەرىلمەۋى ءتيىس. زاڭ بۇزۋشىلىقتار بولسا، دەر كەزىندە شەشىم قابىلداۋىمىز كەرەك»، - دەدى ول.
بۇعان دەيىن حابارلاعانىمىزداي، وسى جىلدىڭ 1 تامىزىنا دەيىن 317 بالاباقشا مەڭگەرۋشىسى مەن 383 مەكتەپ ديرەكتورى اۋىسادى.