دەنساۋلىق ساقتاۋ مينيسترلىگى كاسىبي مىندەتتەرىن ورىنداۋ بارىسىندا مەديسينا قىزمەتكەرلەرىنە بىرنەشە رەت شابۋىل جاساۋىنا بايلانىستى مەديسينا ماماندارىنىڭ قىزمەتىنە كەدەرگى كەلتىرىپ، ولارعا زورلىق-زومبىلىق كورسەتكەنى ءۇشىن قىلمىستىق جاۋاپكەرشىلىككە تارتۋدى ەنگىزۋدى ۇسىندى، دەپ حابارلايدى aqshamnews.kz.
2019 جىلدان بەرى مەديسينا ماماندارىنا 161 رەت شابۋىل جاساۋ فاكتىلەرى تىركەلدى. ال بيىل مامىر ايىندا الماتىدا جەدەل جاردەم فەلدشەرىنە ونى شاقىرعان ادامدار قول كوتەرىپ، پاتەرىندە قاماعان. قاراعاندىدا قىزمەتتىك مىندەتتەرىن ورىنداۋ بارىسىندا جەدەل جاردەم قىزمەتكەرىن اياۋسىز ۇرىپ-سوققان. تەمىرتاۋدا دا جەدەل جاردەم كولىگىنىڭ جۇرگىزۋشىسى تاياق جەپ، تونالعان.
دارىگەرلەردى قورعاۋدى كۇشەيتۋ ماقساتىندا مينيسترلىك مەديسينا ماماندارىنىڭ كاسىبي قىزمەتىنە كەدەرگى كەلتىرگەنى جانە ولارعا قارسى قىلمىستىق ارەكەتتەر بويىنشا قىلمىستىق جاۋاپكەرشىلىككە تارتۋدى ەنگىزۋگە باستاما كوتەردى. سول ءۇشىن 2024 جىلدىڭ 12 ساۋىرىندە دەنساۋلىق ساقتاۋ سالاسىنداعى قىزمەتكەرلەردىڭ قاۋىپسىزدىگىن قامتاماسىز ەتۋ بويىنشا كەشەندى جوسپار بەكىتىلدى.
باس پروكۋراتۋرامەن بىرلەسە قىلمىستىق كودەكسكە وزگەرىستەر ازىرلەندى، وندا مەديسينا ماماندارىنا قاتىستى زورلىق-زومبىلىق ارەكەتتەرى ءۇشىن قىلمىستىق جاۋاپكەرشىلىك قاراستىرىلعان. قىلمىستىق كودەكسكە "مەديسينا قىزمەتكەرىنىڭ زاڭدى قىزمەتىنە كەدەرگى كەلتىرۋ" جانە "مەديسينا قىزمەتكەرىنە قاتىستى زورلىق-زومبىلىق كورسەتۋ" دەگەن جاڭا باپتار ەنگىزۋ ۇسىنىلۋدا.
بۇل قادامدار مەديسينا قىزمەتكەرلەرىن قورعاۋعا جانە ءقاۋىپسىز جۇمىس ورنىن قۇرۋعا باعىتتالعان، دەپ اتاپ ءوتتى دەنساۋلىق ساقتاۋ مينيسترلىگى.