كوكتەمدە باستالعان 400 مىڭنان استام قالا تۇرعىنى قاتىسقان «الماتى – ءبىزدىڭ ورتاق ءۇيىمىز» ناۋقانى «الماتى جازى» جازعى ەكواكسياسىمەن جالعاستى. قالانى كورىكتەندىرۋ بويىنشا اۋقىمدى اكسيا اياسىندا سۋبۇرقاقتار، وزەندەر، سۋ ايدىندارى مەن جاعالاۋ ايماقتارى تازارتىلدى، دەپ حابارلايدى aqshamnews.kz
بۇگىندە مەگاپوليستە تابيعاتقا، جالپىقالالىق نىساندارعا ۇقىپتى قاراۋ مادەنيەتىن تاربيەلەۋگە باعىتتالعان ەكولوگيالىق ءىس-شارالاردىڭ جاڭا كەزەڭى وتۋدە. جاز كۇندەرى ادام ءجيى باراتىن جەرلەرگە – تاۋعا، وزەن جاعالاۋلارىنا، ساياباقتار مەن سكۆەرلەرگە ەرەكشە نازار اۋدارىلادى.
«الماتى جازى» ەكولوگيالىق ەستافەتاسى مەدەۋ شاتقالىنداعى سۇيىكتى دەمالىس ورنىنان باستالدى. مۇندا بەلگىلى سپورتشىلار دميتريي بالاندين، ەرلان تىلەۋىمبەتوۆ، سالتانات قازىبايەۆا، داۋلەتبەك ەلحان، ميحايل بابايەۆ جانە تاۋدى جاقسى كورەتىندەر قورشاعان ورتانى رەتكە كەلتىرىپ قانا قويماي، قوناقتارعا كوپشىلىك باراتىن ورىنداعى مادەني مىنەز-قۇلىق تۋرالى ايتىپ بەردى.
سودان كەيىن كوميۋنيتي ورتالىقتاردىڭ رەزيدەنتتەرى قاتارىنداعى جاستار جانە بەلسەندى ۇزاق ءومىر ءسۇرۋ ورتالىقتارىنا باراتىن اعا بۋىن وكىلدەرى كۇش بىرىكتىرىپ، ۇلكەن الماتى وزەنىنىڭ جاعالاۋىن تازارتتى. بەلسەندى ۇزاق ءومىر ءسۇرۋ ورتالىقتارىنا كەلۋشىلەر قاتارىنان بارلىعى 80-گە جۋىق زەينەتكەر جانە «جاسىل ەل» مەن كوميۋنيتي ورتالىقتارىڭ 120 مۇشەسى جينالدى.
تابيعاتقا، جالپىقالالىق نىساندارعا ۇقىپتى قاراۋ مادەنيەتىن قالىپتاستىرۋعا باعىتتالعان ەكولوگيالىق ءىس-شارالاردىڭ جاڭا كەزەڭ نىساندارىنىڭ ءبىرى ماقاتايەۆ اتىنداعى سكۆەر. قالانىڭ بەلسەندى تۇرعىندارى، ولاردىڭ اراسىندا «دامۋ بالا» شىعارماشىلىق جانە سپورت سەكسياسىنا باراتىن بالالار سكۆەر اۋماعىن تازالاپ، ءشوبىن شابىپ، تال-شىلىكتى كەسىپ، اقىننىڭ ەسكەرتكىشىن جۋىپ تازارتتى.
سونىمەن قاتار، بالالار ءۇشىن سكۆەردە اشىق اسپان استىنداعى كىتاپحانادا ءدارىس وتكىزىلدى. وقۋشىلارعا بۋككروسسينگ تۋرالى ايتىلدى، سونداي-اق وتانعا دەگەن سۇيىسپەنشىلىك پەن پاتريوتيزم تاقىرىبىندا وتاندىق اۆتورلار جازعان كىتاپتار ۇسىنىلدى.
سونداي-اق، ەكوەستافەتاعا «تازا قازاقستان» رەسپۋبليكالىق اكسياسىن قولداۋ ءۇشىن سكۆەرگە ارنايى كەلگەن قازاقستاندىق ەسترادا جۇلدىزدارى قاتىستى.
«الماتى جازى» ەكوەستافەتاسىنىڭ كەلەسى پۋنكتى ناۋرىزباي اۋدانىنداعى ساق قورعاندارى كەشەنى بولدى، وندا قالانىڭ ەتنومادەني ورتالىقتارىنىڭ، شىعارماشىلىق زيالى قاۋىمنىڭ وكىلدەرى جانە بەلسەندى قالا تۇرعىندارى سكۆەردى تازارتتى. قالانىڭ كوممۋنالدىق قىزمەتىنىڭ كۇشىمەن كوشە جيھازدارى، شاعىن ساۋلەت نىساندارى رەتكە كەلتىرىلدى، اعاشتار مەن بۇتالار كەسىلدى. Damu bala ۇيىرمەسىنە قاتىساتىن بالالار پلەنەردە قازاقستاننىڭ تۋعان ولكەسى مەن تابيعاتىن بەينەلەگەن.
قازاقستان جازۋشىلار وداعىنىڭ ءتوراعاسى مەرەكە قۇلكەنوۆ ۇرپاقتار ساباقتاستىعىنىڭ جانە وسكەلەڭ ۇرپاقتىڭ بويىندا وتانسۇيگىشتىك پەن وتانعا دەگەن سۇيىسپەنشىلىك سەزىمىن تاربيەلەۋدىڭ ماڭىزدىلىعىن اتاپ ءوتتى.
«قازاقستاننىڭ اسەم تابيعاتىن اقىندار جىرعا قوسقان. ءبىزدىڭ اتا-بابالارىمىز ءشوپتى تاپتاۋعا، سۋدى لايلاۋعا بولمايدى، كەرىسىنشە اينالامىزداعى تابيعاتتى قورعاۋ كەرەك دەدى. ءقازىر ءبىزدىڭ سوعان ورالا باستاعانىمىز قۋانتادى. بۇل ساياباققا اتا-اجەلەر مەن نەمەرەلەر اعاش سۋارۋ جانە سەرۋەندەۋ ءۇشىن كەلەدى. الماتى ەرەكشە قالا، ەگەر ءبىز ءاربىر اعاش پەن گۇلدى قورعاساق، وندا ول الەمدەگى ەڭ كەرەمەت قالا بولادى. ەندى ءبىز تۇرعىندارعا ىڭعايلى بولۋ ءۇشىن قالامىزدىڭ ينفراقۇرىلىمىن جاقسارتۋىمىز كەرەك. ساق قورعاندارى قاسيەتتى ورىن جانە ونى مىندەتتى تۇردە تازا ۇستاۋ كەرەك»، - دەدى شىعارماشىلىق بىرلەستىكتىڭ باسشىسى م.قۇلكەنوۆ.
«الماتى جازى» ەكوەستافەتاسى بارلىق اۋداندا جالعاسىپ، بىرنەشە كۇنگە سوزىلادى. وسىلايشا، بۇكىل قالانى رەتكە كەلتىرۋ مەن تۇرعىنداردىڭ نازارىن كورىكتەندىرۋ ماسەلەسىنە اۋدارۋ جونىندەگى ءىس-شارالار وتەدى.