الماتىنىڭ مەدەۋ اۋدانىندا سىرتقى جارىقتاندىرۋ جۇيەسىن جاڭعىرتۋ جالعاسىپ جاتىر. بيىل جىل سوڭىنا دەيىن اۋداننىڭ بارلىق كوشەسى، ورتالىق جانە جەكە اۋماقتار، سونىڭ ىشىندە باۋ-باقشا سەرىكتەستىكتەرى دە جارىقتاندىرىلادى. بۇل تۋرالى اۋدان اكىمى ەركەبۇلان ورازالين وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا ايتتى.
"مەدەۋ اۋدانىنداعى جارىقتاندىرىلماعان كوشەلەر مەن باۋ-باقشا سەرىكتەستىكتەرىندە جاڭا سىرتقى جارىقتاندىرۋ جەلىلەرىن سالۋ" جوباسى اياسىندا 2 598 شام مەن 33 باسقارۋ شكافى ورناتىلىپ جاتىر. جاڭا جەلىلەردىڭ ۇزىندىعى 70 شاقىرىم. بۇگىندە 114 ۋچاسكەنىڭ 100-ىندە جۇمىس اياقتالعان.
سونداي-اق، تۇرعىن ۇيلەردىڭ قاسبەتىن ساۋلەتتىك جارىقتاندىرۋ جۇمىستارى جۇرگىزىلىپ جاتىر. بۇل جۇمىس 75 ءۇيدى قامتيدى، ونىڭ 69-ى اعىمداعى جوندەۋدەن ءوتىپ جاتىر، ال 51ء-ى ساندىك شامدارمەن تولىق جارىقتاندىرىلادى. مۇنداي جارىقتاندىرۋ ءال-فارابي جانە دوستىق داڭعىلىندا، پۋشكين، جولداسبەكوۆ جانە رايىمبەك باتىر كوشەلەرىندە جۇزەگە اسىرىلادى.
اتقارىلعان جۇمىستار مەدەۋ اۋدانىندا كوشە جارىعىن ءجۇز پايىز قامتۋمەن قاتار، كەشكى ۋاقىتتا قاۋىپسىزدىك دەڭگەيىن ارتتىرۋعا جانە جايلى قالالىق ورتا قۇرۋعا ىقپال ەتەدى.