الماتىنىڭ مەدەۋ اۋدانىندا تۇرعىنداردى ساپالى اۋىز سۋمەن جانە ورتالىق كارىز جۇيەسىمەن قامتاماسىز ەتۋ ماسەلەسى كەزەڭ-كەزەڭىمەن شەشىلىپ وتىر. بۇل تۋرالى مەدەۋ اۋدانىنىڭ اكىمى ەركەبۇلان ورازالين الماتى قالاسىنىڭ وڭىرلىك كوممۋنيكاسيالار قىزمەتىندە حابارلادى.
بۇل جۇمىس 2023 جىلى باستالعان بولاتىن. سول كەزدە اۋداننىڭ جوعارعى بولىگىندە جەر استى سۋىنىڭ دەڭگەيى 2،5 ەسەگە تومەندەپ، 150 تەكشە مەتردەن 60 تەكشە مەترگە دەيىن ازايعان ەدى. وسىعان بايلانىستى ۇزىندىعى 73 شاقىرىم بولاتىن جاڭا ينجەنەرلىك جەلىلەر سالىنىپ، سونىڭ 35 مىڭنان استام تۇرعىن العاش رەت ورتالىقتاندىرىلعان سۋ جانە كارىز جۇيەسىنە قول جەتكىزدى.
2025 جىلى بۇل باعىتتاعى جۇمىس جالعاسىپ جاتىر. جالپى ۇزىندىعى 118 شاقىرىم بولاتىن جەلىلەردىڭ قۇرىلىسى «تاۋلى قىرات»، «كامەنسك ءۇستىرتى»، «كىشى ستانيسا»، «اتىراۋ»، «الاتاۋ» جانە «مۇزتاۋ» شاعىناۋداندارىندا قولعا الىنعان. جىل سوڭىنا دەيىن «الاتاۋ» جانە «مۇزتاۋ» شاعىناۋداندارىنداعى جۇمىس تولىق اياقتالادى، ال قالعانى 2026 جىلى ىسكە اسىرىلادى. سونىڭ ناتيجەسىندە 25 مىڭنان استام تۇرعىن اۋىز سۋ مەن كارىز جۇيەسىنە تۇراقتى قول جەتكىزەدى.
ەركەبۇلان ورازالين ينجەنەرلىك ينفراقۇرىلىمدى دامىتۋ بويىنشا كەشەندى جۇمىس اۋداننىڭ بارلىق بولىگىندە تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعانىن اتاپ ءوتتى.