2026 جىلدان باستاپ كۇشىنە ەنەتىن جاڭا سالىق كودەكسى اياسىندا رەسپۋبليكادا جەڭىلدەتىلگەن جانە بولشەك سالىق رەجيمدەرى 4% مولشەرلەمەمەن بىرىكتىرىلەدى. وسىعان وراي الماتى قالاسى اكىمدىگى كاسىپكەرلەرگە قوسىمشا قولداۋ كورسەتىپ، بيزنەس جۇرگىزۋگە قولايلى جاعداي جاساۋ باستاماسىن كوتەردى.
قالا اكىمى دارحان ساتىبالدىنىڭ توراعالىعىمەن وتكەن كەڭەس قورىتىندىسى بويىنشا، 2026 جىلدان باستاپ جاڭا جەڭىلدەتىلگەن سالىق رەجيمىن قولداناتىن بارلىق كاسىپكەرلەر ءۇشىن ءتيىمدى مولشەرلەمەنى 3% دەڭگەيىندە بەلگىلەۋ تۋرالى ماسەلەنى ءماسليحاتتىڭ قاراۋىنا شىعارۋ جونىندە شەشىم قابىلداندى.
بۇل شارا شاعىن جانە ورتا بيزنەستىڭ سالىقتىق تۇراقتىلىعىن ساقتاۋعا، قوسىمشا ينفلياسيالىق تاۋەكەلدەردىڭ الدىن الۋعا جانە B2C-سەگمەنتتەگى نىسانداردى — ءۇي ماڭىنداعى دۇكەندەر، شاشتارازدار، شەبەرحانالار مەن تۇرمىستىق قىزمەت كورسەتۋ ورىندارىن — قولداۋعا مۇمكىندىك بەرەدى.
اكىمدىك ۇسىنعان باستاما كاسىپكەرلەردىڭ مەملەكەتتىك ينستيتۋتتارعا دەگەن سەنىمىن نىعايتىپ، ينۆەستيسيالىق احۋالدى تۇراقتى ساقتاۋعا جانە ىسكەرلىك بەلسەندىلىكتىڭ وسۋىنە ىقپال ەتەدى دەپ سانايدى.