كوپجىلدىق ماسەلەنى شەشۋ: الماتى اكىمى مەدەۋ اۋدانىنىڭ تۇرعىندارىمەن كەزدەستى
الماتى اكىمى ەربولات دوسايەۆ مەدەۋ اۋدانىنىڭ تۇرعىندارىمەن كەزدەسىپ، ەكونوميكالىق كورسەتكىشتەردى ايتىپ، تۇرعىنداردىڭ سۇراعىنا جاۋاپ بەردى، دەپ حابارلايدى aqshamnews.kz
قالا باسشىسى ەڭ ۇلكەن اۋداندا بيزنەس ورتا دامىپ كەلە جاتقانىن اتاپ ءوتتى، بۇگىندە مۇندا 45 مىڭنان استام كاسىپكەرلىك سۋبەكت جۇمىس ىستەيدى. وسى جىلدىڭ 7 ايىنىڭ قورىتىندىسى بويىنشا ولار بيۋدجەتكە 250 ملرد تەڭگەدەن استام قۇيعان نەمەسە جالپى قالالىق سالىق ءتۇسىمنىڭ 23%-ى سولارعا تيەسىلى.
سونىمەن قاتار، جىل باسىنان بەرى قۇرىلىس جۇمىستارى 13،3% ۇلعايدى، نەگىزگى كاپيتالعا سالىنعان ينۆەستيسيا 12،5% ءوسىپ، 133 ملرد تەڭگەگە جەتتى.
اۋدان تۇرعىندارىن ساپالى سۋمەن جانە كارىزبەن قامتاماسىز ەتۋ باسىم ماسەلەنىڭ ءبىرى بولىپ قالا بەرەدى. بۇل باعىتتا ماڭىزدى ناتيجەگە قول جەتتى – شاھار باسشىسىنىڭ تاپسىرماسىمەن بيىل «بالقاش» تازا سۋ رەزەرۆۋارى پايدالانۋعا بەرىلدى. 7،3 مىڭ تەكشە مەتر سۋعا 7 رەزەرۆۋار سالىندى، تاۋلىگىنە 15،7 مىڭ م3 سۋ وتكىزۋ قابىلەتى بار 3 جاڭا ۇڭعىما قايتا جاڭارتىلىپ، 3 جاڭا ۇڭعىما سالىندى. بۇل «كامەنسك ءۇستىرتى» شاعىن اۋدانىنداعى سۋ تاپشىلىعى ماسەلەسىن شەشتى.
بيىل شىلدەدە مەملەكەت باسشىسىنىڭ تاپسىرماسىمەن قۋاتى تاۋلىگىنە 32 مىڭ تەكشە مەتر سۋمەن جابدىقتاۋدىڭ رەزەرۆتىك سحەماسى پايدالانۋعا بەرىلدى. سۋدىڭ نەگىزگى كوزدەرى جەر استى سۋلارىنىڭ تالعار كەن ورىندارى، ول جەردەن سۋ كاسكادتى تاسىلمەن بەرىلەدى. جوبانى جۇزەگە اسىرۋدىڭ ارقاسىندا اۋداننىڭ 50 مىڭ تۇرعىنى سۋمەن تۇراقتى قامتاماسىز ەتىلدى.
ەربولات دوسايەۆ تاۋلى جانە تاۋ بوكتەرىندەگى اۋدان تۇرعىندارىنىڭ قاۋىپسىزدىگىن قامتاماسىز ەتۋ ماسەلەسىن قوزعادى. اتاپ ايتقاندا، قالا باسشىسى بيىل اقپاندا «تاۋسامالى» شاعىن اۋدانىندا بولعان لاي كوشكىنىنىڭ سالدارىن جويۋ بويىنشا قابىلدانىپ جاتقان شارالارعا توقتالدى. 2024 جىلى ناۋرىز ايىنان باستاپ 1 500 شارشى مەتر ەڭىستىك اۋماعى قوقىستان جانە قيراعان قۇرىلىمنان تازارتىلدى، كولەمى 800 تەكشە مەتر تەمىربەتون قۇرىلىمى بولشەكتەلدى، گابيون كونسترۋكسيالارى ورناتىلدى. كەرەگەلى-تورلى جۇيەنى ورناتۋ جالعاسۋدا. وسى جىلدىڭ قازان ايىنا دەيىن درەناجدىق قۇبىرلار، ارىق جۇيەسى جانە قۇدىقتار ورناتىلادى. بۇل جۇمىستارعا 1،5 ملرد تەڭگە ءبولىندى.
قالا اكىمىنىڭ تاپسىرماسىمەن قۇرىلعان جۇمىس توبى اۋداننىڭ 74 ءقاۋىپتى ۋچاسكەسىن تەكسەردى، 10 ۋچاسكەدە جاعداي تۇراقتى، قوسىمشا جۇمىستار جۇرگىزۋدى تالاپ ەتپەيدى. كوشكىن ءقاۋپى جوعارى 11 ۋچاسكەنىڭ 5ء-ىن نىعايتۋ جانە قالعان 6 ۋچاسكەنى ساتىپ الۋ جونىندە شەشىم قابىلدانادى. 53 ۋچاسكە بويىنشا كەشەندى جۇمىستار جوسپارلانعان.
- جول-كولىك ينفراقۇرىلىمىن دامىتۋدى تىلگە تيەك ەتكەن قالا باسشىسى جىل سوڭىنا دەيىن 64 مىڭ ش.م. جول توسەمى اعىمداعى جوندەۋدەن وتەتىنىن، ءقازىر 43،3 مىڭ ش. م. جوندەلگەنىن، سونداي-اق 26 كوشەدە 23 كم جولدى ورتاشا جوندەۋ جۇرگىزىلىپ جاتقانىن، ونىڭ ىشىندە 6،6 كم جول جوندەلگەنىن ايتتى.
- مەدەۋ اۋدانىندا وقۋشى ورىندارىنىڭ تاپشىلىعى ماسەلەسىن شەشۋ ءۇشىن 2025 جىلدىڭ سوڭىنا دەيىن ءۇش جاڭا مەكتەپ اشۋ جوسپارلانعان. ولار «جايلى مەكتەپ» ۇلتتىق جوباسى اياسىندا سالىنىپ جاتقان 2 مىڭ ورىندىق جانە «دۋمان» شاعىن اۋدانىندا جانە تالعار تاس جولىنداعى 1 800 ورىندىق ەكى مەكتەپ.
جايلى دەمالىس ءۇشىن الماتىلىقتاردىڭ سۇيىكتى ورنىنا اينالعان – تەررەنكۋر قايتا جاڭعىرتىلىپ جاتىر، سونداي-اق «بۋتاكوۆكا» وزەنىنىڭ ارناسى نىعايتىلىپ، جانىندا جاڭا قوعامدىق كەڭىستىك پايدا بولادى. ەكى نىسانداعى جۇمىستاردى وسى جىلدىڭ سوڭىنا دەيىن اياقتاۋ كوزدەلگەن.