ناقشبانديا تاريقاتىنىڭ باسقا سوپىلىق مەكتەپتەردەن ايىرماشىلىعى – قوعاممەن ارالاسۋدى ناسيحاتتاپ، ءومىردىڭ رۋحاني جانە ءدۇنياۋي جاقتارىن بىرىكتىرۋءى. ناقشبانديا ءداستۇرلى سوپىلىق ادىستەردەن ەرەكشەلەنىپ، دۇنيەدەن تولىق باس تارتۋدى ەمەس، كەرىسىنشە، ىشكى رۋحاني تازارۋ ارقىلى اللاعا جاقىنداۋدى، ال سىرتقى ومىردە قوعاممەن تىعىز بايلانىستا بولۋدى ۇستانادى.
تاريقاتتىڭ نەگىزگى ۇرانى – «حالىقتىڭ ىشىندە، ءبىراق جۇرەگى – اللامەن».
ءبىز ناقشبانديا تاريقاتىنىڭ قازىرگى قازاقستانداعى جاعدايى مەن ونىڭ قوعامدا الاتىن ورنى تۋرالى «بەربانگ» قازاقستان كۇردتەرى اسسوسياسياسى باسقارما كەڭەسىنىڭ ءتوراعاسى، قازاقستان حالقى اسسامبلەياسى رەسپۋبليكالىق قورىنىڭ ءتوراعاسى، قازاقستان حالقى اسسامبلەياسى كەڭەسىنىڭ مۇشەسى ميرزويەۆ رافيك ياكۋبوۆيچتىڭ پىكىرىن سۇراعان ەدىك.
قازاقستانداعى ناقشبانديا تاريقاتىنىڭ وكىلدەرى، نەگىزىنەن، ەلدىڭ وڭتۇستىك جانە وڭتۇستىك-شىعىس ايماقتارىندا شوعىرلانعان. بۇل ايماقتارعا تۇركىستان، الماتى، شىمكەنت جانە جامبىل وبلىستارى جاتادى. ناقشبانديا تاريقاتى قوعامدى رۋحاني تاربيەلەۋگە جانە بەيبىتشىلىككە شاقىرادى. الايدا، تاريقاتتىڭ سىرتقى ساياسي كۇشتەر تاراپىنان مانيپۋلياسياعا ۇشىراۋى مۇمكىن ەكەندىگىن ەسكەرە وتىرىپ، ونىڭ قىزمەتىن مۇقيات باقىلاۋ جانە دۇرىس باعىتتا دامىتۋ ماڭىزدى.
وسى جەردە كەيىنگى كەزدەرى ەلدى اداستىرىپ جۇرگەن ءقۇربانالى احمەتكە قاتىستى قاراما-قايشى كوزقاراس قوعامدا كەڭىنەن تالقىلانىپ ءجۇر. ءقۇربانالى احمەت قاجى – سوپىلىق ءداستۇردىڭ وكىلى رەتىندە تانىلعان تۇلعالاردىڭ ءبىرى. شاكىرتتەرى ونى ناقشبانديا تاريقاتىنىڭ 36-نشى ءپىرى دەپ بىلەدى. ونىڭ قۇران سوزدەرىن بۇرمالاعانى جانە ءوزىنىڭ رۋحاني مارتەبەسىن اسىرا كورسەتۋى سىني پىكىرلەرگە نەگىز بولۋدا. ءقۇربانالى احمەت قاجى كەيبىر ارەكەتتەرى مەن ۋاعىزدارىندا يسلامنىڭ باستاپقى قاعيداتتارىنا قايشى كەلەتىن ەلەمەنتتەر بار. اينالاسىنداعىلار اياعىن ءسۇيىپ، وعان ەرەكشە قۇرمەت كورسەتۋى مۇسىلمان قاۋىمى اراسىندا ۇلكەن نارازىلىق تۋعىزدى. سول سياقتى، كەيبىر سوپىلىق اعىمداردا كەزدەسەتىن پىرگە ەرەكشە قۇرمەت كورسەتۋ دە شەكتەن شىعۋ بولىپ سانالادى. ءقۇربانالى احمەت قاجىعا قاتىستى وسىنداي جايتتار ونىڭ سوپىلىق ءداستۇردىڭ نەگىزگى قاعيدالارىنان اۋىتقىعانىن كورسەتەدى. سونىمەن قاتار، بۇل جەردە ماسەلەنىڭ ءبىر ۇشى ادامداردىڭ سوقىر سەنىمى مەن اداسۋشىلىعىنا، ءدىني ءبىلىمىنىڭ تومەندىگىنە كەلىپ تىرەلەدى.
يسلامدا مۇحاممەد پايعامباردىڭ ءوزى دە ەشقاشان اياعىن سۇيگىزگەن ەمەس جانە ءوزىن ءپىر تۇتۋعا جول بەرمەگەن. سوندىقتان ءقۇربانالى احمەت قاجىنىڭ ءىزباسارلارىنىڭ ارەكەتتەرى يسلام ءدىنىنىڭ نەگىزگى قاعيداتتارىنا قايشى ەكەنى ايدان انىق.
سول سەبەپتى كۇماندى ءدىني اعىمداردان اۋلاق بولىپ، سۇراقتار تۋىنداعان جاعدايدا تەك رەسمي ءدىني بىرلەستىكتەرگە جۇگىنۋگە كەڭەس بەرەمىز.