الەمنىڭ 47-راكەتكاسى اتانعان قازاقستاندىق تەننيسشى يۋليا پۋتينسيەۆا Astana Open WTA 250 ءتۋرنيرىنىڭ جارتىلاي فينالىنا شىقتى، دەپ حابارلايدى Almaty-akshamy.kz Olympic.kz-كە سىلتەمە جاساپ.
وسى دودانىڭ ءبىرىنشى راكەتكاسى بولىپ تىركەلگەن قازاقستاندىق تەننيسشى شيرەك فينالدا دۇنيەجۇزىلىك رەيتينگتە 160-ورىندا تۇرعان رەسەيلىك اناستاسيا گاسانوۆامەن كەزدەستى. ءبىرىنشى سەتتە پۋتينسيەۆا 6:3 ەسەبىمەن باسىمدىلىق كورسەتتى. ەكىنشىسىندە قارسىلاسى ەسە قايىردى - 6:4. ءۇشىنشى، شەشۋشى پارتيادا يۋليا پۋتينسيەۆا گاسانوۆانى تاس-تالقان ەتتى - 6:0. ەكى ساعاتتان استام ۋاقىتقا سوزىلعان ماچتا پۋتينسيەۆا 2 ەيس جاساپ، 18 برەيك-پوينتتىڭ سەگىزىن پايدالانا ءبىلدى. قارسىلاسى 1 ەيس، 4 برەيكتەن اسا المادى.
يۋ.پۋتينسيەۆا فينالعا شىعۋ ءۇشىن الەمنىڭ 80-راكەتكاسى، تاعى ءبىر رەسەيلىك اناستاسيا پوتاپوۆا نەمەسە ودان التى ساتىعا تومەن تۇرعان شۆەسيالىق رەبەككا پەتەرسوننىڭ بىرەۋىمەن تالاسادى.