شۆەيساريا عالىمدارى ءقاۋىپتى ۆيرۋستارعا، ونىڭ ىشىندە تۇماۋ مەن COVID-19 جۇقپالى ىندەتەرىنە ورگانيزمى توتەپ بەرە المايتىن ادامداردىڭ يممۋندىق جۇيەسىن قورعاۋدى قالپىنا كەلتىرۋدىڭ تىڭ ءتاسىلىن ۇسىندى.
بۇل جايىندا islam.kz پورتالى Journal of Experimental Medicine سيۋريح مەرزىمدى باسىلىمىنا سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
اتالمىش ۋنيۆەرسيتەتىنىڭ ۇجىمى جۇرگىزگەن زەرتتەۋ ناتيجەسى ورگانيزمنىڭ ينفەكسيامەن كۇرەسۋىنە كەدەرگى كەلتىرەتىن اۋتوانتيدەنەلەردى قالاي بەيتاراپتاندىرۋعا نەمەسە زالالسىزداندىرۋعا بولاتىنىن كورسەتەدى. ەگدە جاستاعى ادامداردىڭ 2-4%-عا جۋىعىندا ءوز قانىندا ءوز ينتەرفەروندارىن، يممۋندىق قورعانىستى ىسكە قوساتىن اقۋىزداردى بوگەيتىن اۋتوانتيدەنەلەر بولادى. وسىنىڭ كەسىرىنەن، ءتىپتى، سۋىقتان تۋىندايتىن ۆيرۋستىق ينفەكسيالاردىڭ ءوزى ولارعا اۋىر تيەدى.
سيۋريح ۋنيۆەرسيتەتىنىڭ كومانداسى وسى ءقاۋىپتى انتيدەنەلەردىڭ «نازارىن» باسقا جاققا بۇراتىن، ياعني، انتيدەنەلەردىڭ ناعىز ينتەرفەروندارعا ارالاسۋىنا كەدەرگى كەلتىرە الاتىن تۇزاق مولەكۋلالارىن جاسادى. بۇل باعىتتاعى زەرتتەۋ جۇمىستارى سيۋريح ۋنيۆەرسيتەتتىك اۋرۋحاناسىنا جاتقىزىلعان، كوۆيد-19 جۇقتىرىپ، ءحالى اۋىر ناۋقاستاردىڭ بيوماتەريالىندا جۇرگىزىلدى. الدىمەن عالىمدار ينتەرفەرونداردىڭ قاي ايماقتارىن اۋتوانتيدەنەلەر «مويىندايتىنىن» انىقتاپ، كەيىن پاتولوگيالىق رەاكسيانى ءقاۋىپسىز جولمەن بۇعاتتاۋعا قابىلەتتى وسى «قولتاڭبا» بويىنشا سينتەتيكالىق مولەكۋلالار جاسادى.
زەرتحانا قابىرعاسىندا جاسۋشالارعا قاتىستى جۇرگىزىلگەن تالداۋ ناتيجەسى كورسەتكەندەي، جاڭا تەحنولوگيا ينتەرفەروندارعا وزدەرىنىڭ قورعانىش فۋنكسياسىن قايتارۋعا مۇمكىندىك بەرەدى – يممۋندىق جاسۋشالار قايتادان ۆيرۋسپەن ءتيىمدى كۇرەسە باستايدى. بۇدان باسقا، زەرتتەۋشىلەر قولدان جاسالعان مولەكۋلالار يممۋندىق قورعانىستىڭ قالعان بولىگىنە اسەر ەتپەي، قاننان زياندى اۋتوانتيدەنەلەردى ىرىكتەپ الىپ تاستاي الاتىنىن دالەلدەدى. عالىمدار بۇل جاڭالىقتى ميلليونداعان ادامدى ۆيرۋستىق ينفەكسيالاردىڭ اۋىر اسقىنۋىنان قورعايتىن دەربەستەندىرىلگەن تەراپيانى دامىتۋ جولىنداعى العاشقى، قادام دەپ اتايدى.