ماماندار الماتىداعى ليفتىلەردىڭ جاعدايى قاناعاتتانارلىق ەكەنىن ايتتى

الماتىدا 6 مىڭعا جۋىق ليفت بار.

قازاقستان ليفتشىلەر ۇلتتىق قاۋىمداستىعىنىڭ پرەزيدەنتى ەرجان يگىبايەۆ الماتىداعى جەدەلساتىلاردىڭ تەحنيكالىق جاعدايىنا باعا بەرىپ، بۇل جابدىقتى قانشالىقتى ءجيى تەكسەرىپ تۇرۋ كەرەكتىگىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.  

«بۇگىندە الماتىدا 6 مىڭعا جۋىق ليفت بار. ولاردىڭ جاعدايىن قاناعاتتانارلىق دەپ باعالاۋعا بولادى. 2019 جىلدىڭ باسىندا قالادا جاڭعىرتۋدى قاجەت ەتەتىن 1000-عا جۋىق ليفت بولعان. بۇگىندە بۇل سان 300 ليفتىگە دەيىن قىسقاردى. ولاردى 2022 جىلدىڭ سوڭىنا دەيىن اۋىستىرۋ جوسپاردا بار. ءبىراق بۇل تۇراقتى پروسەسس، ويتكەنى ءار ءليفتىنىڭ ءوز قىزمەت ەتۋ مەرزىمى بار»، - دەدى ەرجان يگىبايەۆ.

ونىڭ ايتۋىنشا، نارىقتا قازاقستاندا قولدانىلاتىن جوعارى ساپالى ليفت برەندتەرى وتە كوپ.

«بۇل - جۇڭگو مەن كورەيادان شىققان جەدەلساتىلار. سونداي-اق رەسەي مەن بەلارۋس ليفتىسىنەن كەم تۇسپەيتىن، قاۋىپسىزدىكتىڭ بۇكىل ستاندارتتارىنا ساي كەلەتىن قازاقستاندىق ليفتىلەر دە بار»، - دەپ قوستى سپيكەر.

سونداي-اق، قاۋىمداستىق باسشىسى، زاڭعا سايكەس، ءليفتىنى جىلىنا كەمىندە ءبىر رەت مامانداندىرىلعان ۇيىم تەكسەرەتىنىن اتاپ ءوتتى.

بۇل رەتتە قىزمەت كورسەتەتىن كومپانيا اي سايىن ليفت جابدىقتارىن تەكسەرۋدەن وتكىزۋگە مىندەتتى.

ەرجان يگىبايەۆ قازاقستاننىڭ ءىرى قالالارىندا، اتاپ ايتقاندا، الماتى مەن نۇر-سۇلتاندا ليفتتەرگە قىزمەت كورسەتەتىن 60-تان 80-گە دەيىن كاسىپورىن بار ەكەنىن، ءبىراق ولاردىڭ ءبارى بىردەي سەرتيفيكاتتاۋدان وتپەگەنىن اتاپ ءوتتى.

ايتۋىنشا، اتالعان ۇيىمداردا ست-رك 3305-2018 ۇلتتىق ستاندارتىنا سايكەستىك سەرتيفيكاتى بولۋى كەرەك.

بۇعان دەيىن ول الماتىداعى «Mega Towers» تۇرعىن ءۇي كەشەنىندە 25-قاباتقا دەيىن بار جىلدامدىقپەن كوتەرىلىپ بارىپ، ءۇيدىڭ توبەسىنە سوعىلعان ءليفتىنىڭ تەكسەرىلگەنىن ايتقان بولاتىن.