قازاقستاندا كولىكتەرگە مىندەتتى تەحنيكالىق بايقاۋ جۇيەسى شىنايى قاۋىپسىزدىك كەپىلى ەمەس، ءفورمالدى قاعازعا اينالىپ بارادى. بۇل تۋرالى ءماجىلىس دەپۋتاتى، "AMANAT" پارتياسى فراكسياسىنىڭ مۇشەسى ءمادي جايىمبەتوۆ پرەمەر-مينيستردىڭ ورىنباسارى – يندۋستريا جانە قۇرىلىس ءمينيسترى رومان سكليارعا جولداعان دەپۋتاتتىق ساۋالىندا ايتتى، - دەپ حابارلايدى اqshamnews.kz ءتىلشىسى.
دەپۋتاتتىڭ سوزىنشە، سايلاۋشىلار دا، الەۋمەتتىك جەلىدەگى پىكىرلەر دە قازىرگى بايقاۋ پروسەسىنىڭ نەگىزگى ماقساتى جۇرگىزۋشىلەردىڭ قاۋىپسىزدىگىن قامتاماسىز ەتۋ ەمەس، بەلگىلى ءبىر جەكە قۇرىلىمداردىڭ تابىسىنا باعىتتالعانىن كورسەتەدى.
جول اپاتتارىنىڭ نەگىزگى سەبەبى – ادام فاكتورى مەن جول ساپاسى
ىشكى ىستەر مينيسترلىگىنىڭ دەرەگىنشە، 2025 جىلى تىركەلگەن 12 مىڭ جول اپاتىنىڭ تەك تورتەۋى عانا كولىكتىڭ تەحنيكالىق اقاۋىنان بولعان. ال 2024 جىلى بولعان 31 مىڭ اپاتتىڭ نەبارى 17ء-سى تەحنيكالىق سەبەپكە بايلانىستى.
"بۇل دەرەكتەر جول-كولىك وقيعالارىنىڭ نەگىزگى سەبەبى جۇرگىزۋشىلەردىڭ ەرەجە بۇزۋى مەن جول ساپاسىنا تىكەلەي بايلانىستى ەكەنىن دالەلدەيدى"، – دەدى جايىمبەتوۆ.
تەحبايقاۋ وپەراتورلارىنىڭ جىلدىق تابىسى – 17 ملرد تەڭگە
ءقازىر ەلدە 6،2 ملن كولىك تىركەلگەن، ونىڭ 4،9 ميلليونى جىل سايىن مىندەتتى تەكسەرۋدەن وتەدى. 2024 جىلى 3،5 ملن، ال 2025 جىلدىڭ العاشقى توقسانىندا 1،5 ملن كولىك بايقاۋدان وتكەن. ورتا ەسەپپەن 5 مىڭ تەڭگە تۇراتىن تەكسەرۋدىڭ نارىقتاعى وپەراتورلارعا اكەلگەن تابىسى – جىلىنا شامامەن 17 ملرد تەڭگە.
جۇيەنىڭ كولەڭكەلى تۇسى كوپ
2024 جىلى بۇل سالادا 283 زاڭبۇزۋشىلىق انىقتالىپ، 8 ملن تەڭگە ايىپپۇل سالىنعان. 2025 جىلدىڭ ءبىرىنشى توقسانىندا تاعى 105 حاتتاما تولتىرىلىپ، 2،6 ملن تەڭگە ءوندىرىلدى. دەپۋتات بۇل دەرەكتەر جۇيەنىڭ اشىق ەمەستىگىن جانە جەمقورلىق تاۋەكەلدەرىن كورسەتەتىنىن اتاپ ءوتتى.
"اۋىلداعى جۇرگىزۋشىلەر ءۇشىن بۇل جۇيە مۇلدە قولايسىز. بايقاۋ ورتالىقتارى جەتىسپەيتىن وڭىرلەردە ازاماتتار جۇزدەگەن شاقىرىم ءجۇرىپ، ءبىر كۇنىن وسىعان جۇمساۋعا ءماجبۇر"، – دەدى ول.
حالىقارالىق تاجىريبە مەن ۇسىنىستار
كوپتەگەن ەۋروپا ەلىندە تەحنيكالىق بايقاۋ نەگىزىنەن كوممەرسيالىق كولىكتەرگە عانا نەمەسە ۇزاق مەرزىم ارالىعىندا جاسالادى. وسى تاجىريبەنى ەسكەرە وتىرىپ، جايىمبەتوۆ ءۇش نەگىزگى ۇسىنىس ايتتى:
-
جەكە تۇلعالاردىڭ جاڭا ەمەس، ءبىراق كاسىپكەرلىككە پايدالانىلمايتىن جەڭىل كولىكتەرىنە 2-3 جىلدا ءبىر رەت مىندەتتى تەحنيكالىق تەكسەرۋ ەنگىزۋ.
-
بايقاۋ سالاسىنداعى زاڭبۇزۋشىلىقتاردى قۇقىق قورعاۋ ورگاندارىمەن بىرلەسىپ كەشەندى تەكسەرۋ.
-
بارلىق بايقاۋ ورتالىقتارىن ناقتى تالاپتارعا سايكەس قايتا ليسەنزيالاۋ.
"AMANAT" پارتياسى بۇل سالانى ادىلەتتى، اشىق ءارى ءتيىمدى ەتۋ كەرەك دەپ ەسەپتەيدى. دەپۋتات ۇكىمەتتەن وسى ۇسىنىستاردى قاراستىرىپ، زاڭدا بەلگىلەنگەن مەرزىمدە رەسمي جاۋاپ بەرۋدى سۇرادى.