بۇگىن ماجىلىستە "اق جول" پارتياسىنىڭ جاڭا دەپۋتاتى ولجاس نۇرالدينوۆ انت بەردى، - دەپ حابارلايدى Aqshamnews.kz ءتىلشىسى.
پارلامەنت ءماجىلىسىنىڭ جاڭا سەسسياسىنداعى العاشقى جالپى وتىرىسى "اق جول" فراكسياسىنداعى وزگەرىستەردەن باستالدى. ءماجىلىس سپيكەرى ەرلان قوشانوۆ دەپۋتاتتىق وكىلەتتىگىن توقتاتقان ەرجان بەيسەنبايەۆقا اتقارعان ەڭبەگى ءۇشىن العىس ءبىلدىردى.
"اق جول" دەموكراتيالىق پارتياسىنىڭ شەشىمىمەن ارىپتەسىمىز نۇرجان بەيسەنبايەۆتىڭ وكىلەتتىگى توقتاتىلدى. بارلىق دەپۋتاتتىق كورپۋس اتىنان ەرجان المابەكۇلىنا اتقارعان جەمىستى جۇمىسى ءۇشىن العىسىمىزدى بىلدىرەمىز"، – دەدى قوشانوۆ.
سپيكەردىڭ ايتۋىنشا، ورتالىق سايلاۋ كوميسسياسىنىڭ قاۋلىسىمەن "اق جول" دەموكراتيالىق پارتياسى اتىنان ءماجىلىس دەپۋتاتى بولىپ ولجاس نۇرالدينوۆ تىركەلدى.
جاڭا دەپۋتات كونستيتۋسياعا انت بەردى.
"قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيتۋسياسى مەن زاڭدارىنا قاتاڭ باعىنۋعا، دەپۋتات رەتىندە وزىمە جۇكتەلگەن مىندەتتەرگە ادال بولۋعا انت ەتەمىن"، – دەدى ولجاس نۇرالدينوۆ.
نۇرالدينوۆ ماجىلىستەگى قارجى جانە بيۋدجەت كوميتەتىنىڭ مۇشەسى بولىپ سايلاندى.
ەسكە سالا كەتەيىك، تامىزدىڭ اياعىندا "اق جول" پارتياسىنىڭ ءتوراعاسى ازات پەرۋاشيەۆ جۋىرداعى پلەنۋمدا ەرجان بەيسەنبايەۆ دەپۋتاتتىق وكىلەتتىگىن توقتاتقانىن حابارلاعان ەدى. ول بوساپ قالعان دەپۋتاتتىق مانداتتى پارتيانىڭ الماتى قالالىق فيليالىنىڭ ءتوراعاسى ولجاس نۇرالدينوۆقا بەرۋ تۋرالى شەشىم قابىلداعان.