قازاقستاندا راديواكتيۆ قالدىقتاردى يگەرۋ جونىندەگى جاڭا زاڭ جوباسى ازىرلەنەدى. ونىڭ اياسىندا يادرولىق قاۋىپسىزدىك سالاسىنا قاتىستى ءبىرقاتار تۇزەتپە ەنگىزۋ قاراستىرىلعان. وسىعان بايلانىستى ءماجىلىس ءتوراعاسى ەرلان قوشانوۆ باستاعان دەلەگاسيا الماتىداعى يادرولىق فيزيكا ينستيتۋتىنا بارىپ، بەيبىت اتومدى پايدالانۋ بويىنشا وتاندىق جوبالارمەن تانىسىپ، زاڭ جوباسىن ازىرلەۋ تاسىلدەرىن عالىمدارمەن بىرگە تالقىلادى، دەپ حابارلايدى aqshamnews.kz.
ەرلان قوشانوۆتىڭ ايتۋىنشا، جاڭا زاڭنامالىق نورمالار ەلدە اەس سالۋ جانە اتوم سالاسىن دامىتۋ ءۇشىن بارىنشا قولايلى جاعداي جاساۋدى كوزدەيدى. بۇل رەتتە ماگاتە-نىڭ حالىقارالىق تالاپتارى ەسكەرىلەتىن بولادى. ءماجىلىس سپيكەرى تۇزەتۋلەر ماجىلىستە اشىق تالقىلاۋدان ءوتىپ، قوعامنىڭ جانە بارلىق مۇددەلى تاراپتاردىڭ پىكىرلەرى ەسكەرىلەتىنىن اتاپ ءوتتى.
ينستيتۋت قىزمەتكەرلەرىمەن اڭگىمە بارىسىندا اەس ءۇشىن كادر دايارلاۋ، يادرولىق قالدىقتاردى قايتا وڭدەۋ، يادرولىق يندۋستريا ونىمدەرىنە جاڭا ستاندارتتار ەنگىزۋ جانە اتوم سالاسىنىڭ ەل ەكونوميكاسىنا تولىققاندى جۇمىس ىستەۋى ءۇشىن قاجەتتى جاعداي جاساۋ بويىنشا ءبىرقاتار ۇسىنىس ايتىلدى. بۇل رەتتە ۇزدىك شەتەلدىك تاجىريبەلەر ەسكەرىلەدى.
دەپۋتاتتار بولاشاق اەس-تىڭ شاعىن كوشىرمەسى سانالاتىن ۆۆر-ك زەرتتەۋ رەاكتورىمەن تانىستى. يادرولىق فيزيكا ينستيتۋتىنىڭ باس ديرەكتورى، فيزيكا-ماتەماتيكا عىلىمىنىڭ دوكتورى، قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى سايابەك ساحييەۆ ينستيتۋتتا جوعارى ءبىلىمدى مامانداردى تاجىريبەلىك تۇرعىدا دايارلاۋعا ارنالعان بازا بار ەكەنىن اتاپ ءوتتى.
يادرولىق فيزيكا ينستيتۋتى قىزمەتكەرلەرىمەن كەزدەسۋدە ەرلان قوشانوۆ بۇل عىلىمي مەكەمەنىڭ اەس قۇرىلىسى جوباسىن جۇزەگە اسىرۋداعى ەرەكشە ءرولىن اتاپ ءوتتى.
ول ينستيتۋتتىڭ ماگاتە-نىڭ ۇزدىك الەمدىك ستاندارتتارىنا ساي ەلىمىزدە بەيبىت اتوممەن جۇمىس ىستەۋگە تاجىريبەسى دە، بىلىكتىلىگى دە جەتكىلىكتى ەكەندىگىنىڭ ايقىن دالەلى ەكەنىن ايتتى. سونداي-اق ساپار بارىسىندا دەپۋتاتتار راديوفارمپرەپاراتتار ءوندىرىسى كەشەنىمەن تانىستى. وندا قازاقستانداعى جالعىز Cyclone-30 قوندىرعىسى جۇمىس ىستەيدى.