الماتى قالاسىنىڭ №2 بالالار قالالىق كلينيكالىق اۋرۋحاناسىندا «بالالارداعى جاڭا تۋعان كەزەڭدەگى ەپيلەپتيكالىق جاعدايلار» تاقىرىبىندا حالىقارالىق ورتالىق ازيالىق ماستەر-كلاسس ءوتتى.
ءىس-شارا ەۋروپالىق بالالار نيەۆرولوگتارىنىڭ قاۋىمداستىعىنىڭ (EPNS) قولداۋىمەن «مي ساۋلىعى» جاھاندىق ۇرانىمەن نيەۆرولوگيالىق كومەكتى جاقسارتۋ بويىنشا ددسۇ سالاارالىق جوسپارى اياسىندا ۇيىمداستىرىلدى. سەمينارعا قازاقستان، قىرعىزستان، وزبەكستان، ءازىربايجان جانە رەسەيدەن كەلگەن ماماندار جينالىپ، بالالار ەپيلەپسياسىمەن كۇرەستە حالىقارالىق ىنتىماقتاستىقتىڭ ماڭىزدىلىعىن تالقىلادى.
«ءىس-شارانىڭ نەگىزگى ماقساتى – بالالار نيەۆرولوگياسى جانە ەپيلەپتولوگياسى سالاسىنداعى مامانداردىڭ تەوريالىق، پراكتيكالىق جانە كلينيكالىق دەڭگەيىن ارتتىرۋ. نەگىزگى نازار نەوناتالدىق جانە ەرتە بالالىق ەپيلەپسيانىڭ وزەكتى دياگنوستيكالىق الگوريتمدەرىنە، تەراپيا مەن باقىلاۋدىڭ جاڭا تاسىلدەرىنە، باسقا پاروكسيزمالدى جاعدايلارمەن ديففەرەنسيالدى دياگنوستيكاعا جانە پاسيەنتتەردى ەمدەۋدىڭ كوپسالالى ادىستەرىنە اۋدارىلادى»، – دەيدى الماتى قالاسىنىڭ №2 بالالار قالالىق كلينيكالىق اۋرۋحاناسىنىڭ ديرەكتورى مارات راباندياروۆ.
ەپيلەپسيا – بالالارداعى ەڭ كوپ تارالعان نيەۆرولوگيالىق اۋرۋلاردىڭ ءبىرى. اسىرەسە، جاڭا تۋعان سابيلەر مەن كىشكەنتاي بالالاردا كوپ كەزدەسەدى، تىرىسۋ ميدىڭ زاقىمدانۋىنىڭ العاشقى جانە ماڭىزدى كورىنىسى بولىپ تابىلادى. وسى جاستا ەپيلەپسيانى ەرتە انىقتاۋ، ناقتى دياگنوستيكا جانە ۋاقتىلى ەمدەۋ بالانىڭ دامۋىنىڭ بولجامىنا كۇرت اسەر ەتۋى مۇمكىن.
قازىرگى زامانعى مەديسينادا ەپيلەپسيانى باقىلاۋدىڭ كەڭ اۋقىمى – دارىلىك تەراپيادان حيرۋرگيالىق ادىستەرگە جانە ديەتالىق ادىستەرگە دەيىن بار.
الماتى قالاسىنداعى ەپيلەپسيامەن اۋىراتىن بالالارعا كەشەندى كومەك قازاقستان-رەسەي مەديسينا ۋنيۆەرسيتەتىنىڭ نيەۆروپاتولوگ، ەپيلەپتولوگ، نەيروفيزيولوگ، نەيروحيرۋرگ، بولىمشە قىزمەتكەرلەرىنەن قۇرالعان تاجىريبەلى كوپسالالى كومانداسى بار جەتەكشى مەكەمە – №2 بالالار قالالىق كلينيكالىق اۋرۋحاناسىندا كورسەتىلەدى.