قازاقستان بانكتەرىندە بەرىلە باستايدى.
ەلىمىزدە يسلام قارجىلاندىرۋ جۇيەسىن دامىتۋعا باعىتتالعان جاڭا زاڭ جوباسى دايىندالىپ جاتىر، دەپ حابارلايدى aqshamnews.kz
بانكتەر "يسلام تەرەزەلەرى" اتتى جاڭا جۇيەمەن جۇمىس ىستەي باستاۋى مۇمكىن. بۇل تۋرالى سەناتتا قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى نۇرلان ءابدىراحمانوۆ مالىمدەدى.
ەلىمىزدە يسلام بانكتەرىنىڭ قىزمەتىنە قۇقىقتىق نەگىز 2009 جىلى قالانعان، ال 2015 جىلى يسلام ساقتاندىرۋ جۇيەسى ەنگىزىلدى. بۇگىندە قازاقستاندا ەكى يسلام بانكى جۇمىس ىستەيدى. ءبىراق ولاردىڭ جالپى بانك جۇيەسىندەگى ۇلەسى نەبارى 0،4 پايىزدى قۇرايدى. بۇل سالانى دامىتۋ ءۇشىن حالىقارالىق تاجىريبەنى زەرتتەپ جاتىرمىز. كوپتەگەن مۇسىلمان ەلدەرىندە يسلام بانكتەرى ءداستۇرلى بانك سەكتورىمەن قاتار قىزمەت ەتە بەرەدى. وسىعان بايلانىستى جاڭا زاڭ جوباسى اياسىندا بانكتەرگە «يسلام تەرەزەلەرىن» اشۋ تەتىگىن ەنگىزبەكپىز. بۇل باستاما ءداستۇرلى بانكتەرگە پايىزدىق جۇيەمەن دە، يسلامدىق پايىزسىز قارجىلاندىرۋمەن دە قاتار جۇمىس ىستەۋگە مۇمكىندىك بەرەدى، – دەدى ءابدىراحمانوۆ.
مينيسترلىكتىڭ جوسپارىنا سايكەس، زاڭ جوباسى وسى جىلدىڭ تامىز ايىندا ەنگىزىلەدى. بۇل وزگەرىس بانكتەردىڭ قارجىلىق ينفراقۇرىلىمىن كەڭەيتىپ، حالىقتىڭ كەڭ اۋقىمىنا قىزمەت كورسەتۋىنە جول اشادى. سونىمەن قاتار، جاڭا رەفورما شەتەلدىك يسلام قارجىلىق ينستيتۋتتارىن تارتۋعا دا ىقپال ەتۋى مۇمكىن.
يسلام بانكتەرى قازاقستان ەكونوميكاسىنا 12 ملرد تەڭگە تىكەلەي ينۆەستيسيا سالدى. الداعى ۋاقىتتا بۇل كورسەتكىش ەسەلەپ وسەدى دەپ كۇتىلۋدە. شەتەلدىك ينۆەستورلار كولىك، ەنەرگەتيكا، دەنساۋلىق ساقتاۋ سالالارىنا قارجى قۇيۋعا قىزىعۋشىلىق تانىتىپ وتىر، – دەپ قوستى ءابدىراحمانوۆ.
بۇل باستامانى قارجى ساراپشىلارى دا قولداپ وتىر. "حالىق بانك" ءتوراعاسىنىڭ ورىنباسارى، تاۋەلسىز ساراپشى داۋرەن سارتايەۆتىڭ پىكىرىنشە، يسلام قارجى جۇيەسىنىڭ دامۋى ءۇشىن ءبىرىنشى كەزەكتە "يسلام تەرەزەلەرىن" اشۋ ماڭىزدى.
رەسمي ستاتيستيكاعا سايكەس، قازاقستاندىقتاردىڭ 60%-دان استامى يسلام ءدىنىن ۇستاناتىنىن ايتقان، ال 20%-ى ءوزىن ءدىن جولىنداعى مۇسىلمان سانايدى. الايدا يسلام قارجىسىنىڭ ۇلەسى نەبارى 0،4% عانا. بۇل كورسەتكىشتى ارتتىرۋ ءۇشىن بانكتەر وزدەرىنىڭ ينفراقۇرىلىمى ارقىلى يسلام قارجىلاندىرۋ تەتىكتەرىن ۇسىنۋى كەرەك. قازىرگى زاڭناما بويىنشا، شاريعات تالاپتارىنا ساي قارجىلاندىرۋدى جۇزەگە اسىرۋ ءۇشىن بولەك زاڭدى تۇلعا قۇرۋ قاجەت، بۇل – ۇزاق ءارى شىعىندى پروسەسس. ال ەگەر بانكتەر ءوز ينفراقۇرىلىمىنىڭ نەگىزىندە يسلام قارجىسى قىزمەتىن ۇسىنسا، بۇل ءۇردىس الدەقايدا جىلدام ءارى ءتيىمدى جۇرەدى، – دەدى سارتايەۆ.
ونىڭ ايتۋىنشا، بۇل باعىتتا سالىق زاڭناماسىن جەتىلدىرۋ دە ماڭىزدى ءرول اتقارادى.
يسلام بانكتەرى بيزنەس قۇرىلىمدارىمەن سەرىكتەستىك نەگىزىندە جۇمىس ىستەيدى. سوندىقتان قوسىمشا قۇن سالىعى مەن تابىس سالىعى ماسەلەسىن دۇرىس رەتتەۋ قاجەت. ەكى تاراپ تا تۇراقتى ءارى ءادىل پايدا تابۋ ءۇشىن ناقتى قۇقىقتىق بازا بولۋى كەرەك،" – دەپ اتاپ ءوتتى ساراپشى.
قارجى نارىعىن رەتتەۋ جانە دامىتۋ اگەنتتىگى زاڭ جوباسىن بيىل تامىزدا پارلامەنتكە ەنگىزگەلى وتىر.