ءا.نۇرشايىقوۆ – 100
اتالمىش تەلەحيكايادان كەيىن ەربول مەن مەڭتاي شاڭىراق كوتەرگەن.
الماتى تورىنەن ورىن تەپكەن ا.پ. چەحوۆ اتىنداعى ورتالىق قالالىق كىتاپحانانىڭ كىتاپحاناشىسى اينۇر بالاۋبايەۆا «ماحاببات، قىزىق مول جىلدار» اتتى ادەمى دە سىرلى، ادەبي-سازدى كەش ۇيىمداستىردى. وندا وقىرماندار اباي اتىنداعى سەمەي مەملەكەتتىك قازاق مۋزىكالىق-دراما تەاترى (قازىرگى اباي وبلىسى) قويعان «ماحاببات، قىزىق مول جىلدار» سپەكتاكلىندە مەڭتايدى ساحنالاعان اكتريسا، قالامگەردىڭ تۋعان جەرىنەن ارنايى ات ارىتىپ كەلگەن سۇلۋشاش تولەكوۆامەن، سونداي-اق، وسىدان ەكى جىل بۇرىن Qazaqstan ۇلتتىق تەلەارناسى تۇسىرگەن «ماحاببات، قىزىق مول جىلدار» تەلەسەريالىندا ەربول مەن مەڭتايدى ويناعان ەرمەك تۇرعانبەك جانە نارقىز ايداروۆامەن كەزدەستى.
ءازىلحان اتانىڭ اق باتاسى
ق ر مادەنيەت سالاسىنىڭ ۇزدىگى، حالىقارالىق «شابىت» فەستيۆالىنىڭ لاۋرەاتى، رەجيسسەر سۇلۋشاش تولەكوۆا بىزگە قالامگەردىڭ سپەكتاكلدى سەمەيگە ارنايى كەلىپ تاماشالاعانىن، اق باتاسىن بەرگەنىن اڭگىمەلەپ بەردى.
– مەڭتاي روماندا وتە يناباتتى، سىپايى، مەيىرىمدى جان بولىپ سۋرەتتەلەدى. رەجيسسەرىمىز دە مەنىڭ بويىمنان سول قاسيەتتەردى كورگەنىن ايتىپ، وسى ءرولدى ۇسىنعاندا قۋانعانىم راس. ول تۇستا بۇل كىتاپتى وقىماعان قازاق كەمدە-كەم ەدى عوي. ۇلكەن-كىشىنىڭ جاستىعىنىڭ استىنا قويىپ، ءسۇيىپ وقيتىن كىتابى بولعان دەسەم، قاتەلەسپەسپىن. سوندىقتان وقىرمانعا جاقسى تانىس ادەمى كەيىپكەردى سول كۇيىندە جەتكىزە الامىن با، جەتكىزە المايمىن با دەپ جۇرەكسىنگەنىم دە بار. ونىڭ ۇستىنە، سپەكتاكلدىڭ ەڭ العاشقى كورەرمەنى - شىعارمانىڭ اۆتورى، ياعني ءازىلحان نۇرشايىقوۆتىڭ ءوزى بولاتىنىن ەستىگەندە، بويىمدا قورقىنىش بولعانى دا جاسىرىن ەمەس. "ول كىسىنىڭ جۇرەگىندەگى مەڭتايدى بەرە الماي قالسام شە؟" - دەپ قاتتى قوبالجىعانىم ەسىمدە. ءسويتىپ، موينىمىزعا ۇلكەن جاۋاپكەرشىلىك جۇكتەلىپ، بارىمىزدى سالدىق. تەاتر زالىندا ءازىلحان اتامىزدىڭ ءبىر ءوزى وتىردى كورەرمەن بولىپ. ارينە، ءوز كوڭىلىمىزگە ويداعىداي ويناپ شىققان سەكىلدى بولدىق. ءبىراق سپەكتاكل اياقتالعاندا بايقاساق، ءازىلحان اتا كوزىن ءسۇرتىپ، جىلاپ وتىر ەكەن. ابدىراپ قالدىم، «دۇرىس ويناي المادىم با ەكەن، كوڭىلىنەن شىقپاعان بولدىق-اۋ» دەپ. ءبارىمىز اياعىمىزدى يمەنە باسىپ، جانىنا باردىق. ماعان باستان-اياق ۇزاق قاراپ تۇردى. ەشتەڭە دەمەدى. ودان سايىن قوبالجىپ كەتتىم. ءبىراق قولىمنان ۇستاپ، جىبەرمەي قاتتى قىسىپ، ءۇنسىز ۇزاق تۇرعاندا، كوڭىلى تولعانىن سەزدىم. سوسىن ءبارىمىزدىڭ ماڭدايىمىزدان ءسۇيىپ شىقتى.
پرەمەرادان كەيىن ءبارىمىز ۇلكەن داستارحان باسىندا جينالدىق. سوندا ءازىلحان اتامىز اسا ءبىر ىلتيپاتپەن قولىمنان قىسىپ تۇرىپ: «اينالايىن، سۇلۋشاش بالام! وتباسىڭ، جولداسىڭ، بالا-شاعاڭ بار ەكەن، باقىتتى بول! ماحابباتتىڭ ءوزى ۇشكە بولىنەدى، بالا ماحاببات، شالا ماحاببات جانە ماڭگىلىك ماحاببات دەپ. مەن سونىڭ سوڭعىسىن، ياعني ماڭگىسىن تىلەيمىن»، – دەپ باتاسىن بەردى. مەن سونداي جۇرەگى نازىك، ىزگىلىككە تولى ۇلكەن تۇلعانىڭ كوزىن كورگەنىمدى، باتاسىن العانىمدى اركەز ماقتان ەتىپ كەلەمىن، – دەدى وسىدان ون ەكى جىل بۇرىنعى وقيعانى ەسكە العان سۇلۋشاش تولەكوۆا.
ءسال شەگىنىس. سۇيىسپەنشىلىككە تولى «ماحاببات، قىزىق مول جىلدار» رومانىنداعى ەربول (ءازىلحان نۇرشايىقوۆ) مەن مەڭتاي (نۇرعاليما) - ومىردە بولعان جاندار. ال نەگىزىندە بۇل كىتاپتاعى مەڭتاي وبرازىن سومداۋدا اياۋلى جارى، ءبىتىم-بولمىسى ەرەك حاليمانىڭ اسەر ەتكەندىگىن جازۋشى سۇحباتتارىندا ءجيى ايتاتىن.
ءتۇسىرىلىم الاڭىندا ويانعان سەزىم
حالىق جازۋشىسى ءازىلحان نۇرشايىقوۆتىڭ ايگىلى رومانىنىڭ جەلىسى بويىنشا تۇسىرىلگەن 20 ءبولىمدى «ماحاببات، قىزىق مول جىلدار» تەلەسەريالىنا اكتەرلار Cinexus سايتى ارقىلى ونلاين تاڭدالعان. 7300-دەن استام ءوتىنىش تۇسكەن ەكەن. كورەرمەنگە تەليەۆيزيالىق كوركەم فيلم رەتىندە جول تارتقان تەلەسەريال جەلىسى مايداننان امان ورالعان جازۋشىنىڭ بەيبىت ومىردەگى تىنىس-تىرشىلىگىنەن باستاۋ الادى. باستى كەيىپكەر – ەربول وبرازى ارقىلى قازاق جاۋىنگەرلەرىنىڭ ەرلىگى مەن شىنايى ماحابباتى سۋرەتتەلەدى. تەلەحيكايانىڭ بەلگىلى ءانشى ءالي وقاپوۆ ورىنداعان ساۋندترەگى جازۋشىنىڭ «قىزىل كورپە» ولەڭىنە جازىلعان.
ەڭ العاش كاستينگ تۋرالى ەستىگەن «قازاق ارۋى – 2020» جەڭىمپازى، ت.جۇرگەنوۆ اتىنداعى ونەر اكادەمياسىنىڭ ستۋدەنتى، بۇعان دەيىن ۇلتتىق ارنانىڭ «كۇي-عۇمىر»، «عازيز جۇرەك»، «ومىر-وزەن» تەلەسەريالدارىندا نەگىزگى رولدەردى سومداعان نارقىز ايداروۆانىڭ مەڭتاي ءرولىن ويناۋعا قۇشتارلىعى ويانىپ، ۇزاق ويلانىپ جاتپاستان، كاستينگ تالاپتارىنا ساي انكەتاسىن تولتىرىپ، جونەلتەدى.
ال ت.جۇرگەنوۆ اتىنداعى ونەر اكادەمياسىن اكتەر، تەلەديكتور ماماندىعى بويىنشا ءتامامداعان، راديودا جۇمىس ىستەيتىن، بۇعان دەيىن Qazaqstan تەلەارناسىنىڭ «اۋىلداستار» تەلەحيكاياسىندا ويناعان جاس اكتەر ەرمەك تۇرعانبەك كاستينگ تۋرالى ەستىگەنىمەن، قاربالاسقان ءتۇرلى شارۋانىڭ باسىندا ءجۇرىپ، وعان قاتىسۋدى ۇمىتىپ تا كەتكەن كورىنەدى.
ەرمەك:
– سول جىلعى (2020 ج.) مامىردىڭ سوڭىنا تامان مەنى ىرىكتەۋگە شاقىرىپ، سۋرەتكە ءتۇسىردى. الدىمەن «فوتوپروبا» بولدى. ودان كەيىن «بەينەپروباعا» شاقىردى. ءسويتىپ، ەكى-ۇش رەت شاقىرىلعاننان كەيىن، تەلەحيكايا پروديۋسەرى ەرنار مالىكوۆ حابارلاسىپ، «ەربول ءرولىن ويناۋعا قالاي قارايسىڭ، تاڭداۋىمىز ساعان ءتۇسىپ تۇر» دەگەندە، ارينە، قۋاندىم. اكادەميادا ۇستازدارىمىز «شىنايى ماحابباتتىڭ بويتۇمارىنا اينالعان وسى شىعارمانى وقىڭدار، ۇلگى الىڭدار دەپ ابدەن سانامىزعا قۇيعان رومانداعى باس كەيىپكەردىڭ ءبىرىن ويناۋ مارتەبەسى بۇيىرىپ تۇرعاندا، قالاي كەلىسپەسسىز! ەربولدىڭ كاستينگىنە 3،5 مىڭ جىگىت قاتىسقان ەكەن. مەن مۇنى تاعدىرىمنىڭ ەرەكشە سىيى دەپ قابىلدادىم. ءازىلحان نۇرشايىقوۆ اتامىز ومىردە وسال ادام بولماعان، قان مايداندى ءجۇرىپ وتكەن، ومىردە كوپ قيىندىق كورسە دە، مويىماعان اياۋلى تۇلعا. ەگەر ءسىزدى سول كىسىگە ۇقساتىپ جاتسا، قالاي باس تارتامىن؟!
نارقىز:
– ماعان كاستينگكە جىبەرگەن انكەتامنان كەيىن ارادا ەكى اي وتكەننەن كەيىن ساعات تۇنگى 12-دە حابارلاسىپ، شاقىردى. مەن دە قۋاندىم، ارينە. ەستۋىمشە، ءبىر مەڭتايدىڭ رولىنە 5 مىڭ قىزدان ءوتىنىش تۇسكەن ەكەن. شىنى كەرەك، مەنىڭ كىتاپتاعى مەڭتايمەن بولمىسىمدا كوپ ۇقساستىق بولدى. بەتىمدەگى تابيعي مەڭىم دە ۇقسايدى. سول ءۇشىن دە وتكەن شىعارمىن (كۇلدى).
ەرمەك:
– مەن ول كەزدە ونەر اكادەمياسىنىڭ 3ء-شى، ال نارقىز 1-كۋرسىندا وقيتىن. ءبىر-بىرىمىزدى سىرتتاي عانا تانيمىز، كۇندە ءبىر دالىزبەن جۇرەمىز دەگەندەي. مەن ءوزى كوپ ەشكىممەن ارالاسا بەرمەيمىن، تومەنگى كۋرستىڭ قىزدارى «اعا» دەپ سىيلاپ، «سالەمەتسىز بە» دەپ وتە شىعادى. ءبىز دە قارىنداستارعا ىزەت كورسەتىپ، باس يزەسىپ، اۋديتوريامىزعا اسىعىس باسىپ كەتە بەرەمىز. ءبىراق نارقىزدىڭ ورنىقتى، بايسالدى مىنەزىن، ادەمىلىگىن بايقاپ جۇرەتىنمىن. ال بىرەۋ «كۇندەردىڭ كۇنىندە ارالارىڭدا سەزىم، ماحاببات بولادى» دەسە، سەنبەس ەدىك. ءتىپتى، ءتۇسىرىلىم باستالاردان بىرەر اپتا بۇرىن رەجيسسەردىڭ ءبىزدى تانىستىرىپ تۇرىپ: «سەريال اياقتالعاندا، سەندەر وتباسىن قۇراسىڭدار، بىرگە بولاسىڭدار»، - دەگەنى بار.
ءتۇسىرىلىم الاڭىنا بارماس بۇرىن بىرنەشە كۇن كەڭسەدە جينالىپ، دايىندالىپ جۇردىك. ول كەزدە نارقىز ەكەۋمىز بىر-بىرىمىزبەن مۇلدە ارالاسقان ەمەسپىز. ءتۇسىرىلىم باستالعان كەزدە عانا «ءومىرىم وزگەرەدى-اۋ وسى» دەگەن وي قىلاڭ بەردى باسىمدا. ءسويتىپ، ءبىر-بىر جارىم اي وتكەننەن كەيىن بىر-بىرىمىزگە دەگەن كينوداعى «عاشىقتىعىمىز» شىن ومىردەگى سەزىمگە ۇلاسا باستادى.
نارقىز:
– ءيا، ءبىر جارىم اي ىشىندە وتباسىن قۇردىق. ءبىر-بىرىمىزدى تانىپ-بىلۋگە وسى ۋاقىت جەتكىلىكتى بولدى. ماحابباتىمىزعا سەبەپكەر – وسى سەريال. ماحابباتىمىز ءتۇسىرىلىم الاڭىندا ءوتتى ءسويتىپ. ەرمەك العاشقى كۇندەرى تۇسىرىلىمنەن كەش شىققاندا، «ءوزىڭ جالعىز جۇرمە، قورقىپ قالارسىڭ» دەپ شىعارىپ سالاتىن، ءبارى سودان باستالدى عوي. ارينە، بىردەن ۇناتىپ كەتتىم دەپ ايتا المايمىن. ءتۇسىرىلىم بارىسىندا سەزىمگە تولى كەرەمەت ساحنالار بولدى بىزدە. ەربول مەن مەڭتايدى سومداپ ءجۇرىپ، شىن سەزىمگە بەرىلىپ، بىر-بىرىمىزگە باۋىر باسىپ كەتكەن سەكىلدىمىز.
جاس وتاۋ
ءتۇسىرىلىمنىڭ ەڭ العاشقى كۇنى. تاڭەرتەڭ ەرتەمەن جينالعان ءبارى. رەجيسسەر «ءقازىر ءسۇيىسۋ ساحناسى بولادى» دەگەن كەزدە، نارقىزدىڭ ابدەن قوبالجىعانى بار. ەرمەك بۇرىن-سوڭدى ونداي ساحنالاردا ويناعان، ءارى جىگىت قوي. ال نارقىزدا ونداي ساحنا بولماعان. «ءبىر-بىرىمىزدى تانىمايمىز دا. ەرتەڭ تەلەسەريال قالىڭ ەلگە كورسەتىلەدى، اتا-انامنىڭ الدىندا ۇيات شىعار» دەپ ويلاعان ۇياڭ ارۋ بىردەن اكە-شەشەسىنە حابارلاسىپ، رۇقسات سۇرايدى. ول كىسىلەر «جۇمىسىڭ عوي، تۇسىنەمىز» دەگەندە بارىپ كوڭىلى ورنىنا تۇسەدى. سويتسە، سول ساحنا ءۇشىن سول كۇنى ەرمەك تە قوبالجىعان بولىپ شىقتى.
«ماحاببات، قىزىق مول جىلدار» تەلەسەريالىنىڭ ءتۇسىرىلىم جۇمىستارى ءۇش جارىم ايعا سوزىلدى. سوڭعى نۇكتەسى 19 قىركۇيەكتە قويىلىپ، ەرتەڭىنە، ياعني 20 قىركۇيەكتە نارقىز ەرمەككە قازاقتىڭ كادەسىمەن ۇزاتىلدى. جىگىت جاق تا توي جاساپ، اعايىن-تۋىس، دوس-جاراندار باقىت تىلەدى.
ەڭ قىزىعى سول، ەرمەك تە، نارقىز دا «بولاشاقتا جارىم ءوزىم سەكىلدى اكتەر، اكتريسا، جالپى، ونەر ادامى بولمايدى، باسقا سالانىڭ ادامىن تاڭدايمىن» دەپ ويلاعان ەكەن. ال ءقازىر ەكەۋى ءبىر سالانىڭ، ءبىر باعىتتىڭ ادامدارى بولعاندىعىنا بەك قۋانىشتى. ويتكەنى، ءبىر-بىرىن جاقسى تۇسىنەدى. ءبىرى ءتۇن جارىمىنا دەيىن تۇسىرىلىمدە جۇرسە، ەكىنشىسى ءجونسىز رەنجىپ، قايتا-قايتا تەلەفون سوعىپ، مازاسىن المايدى، جۇمىس بارىسى سولاي بولاتىنىن تۇسىنەدى. ەكەۋىنىڭ اڭگىمەسى ورتاق، وتباسى تۋرالى، ونەر، شىعارماشىلىق تۋرالى دا. ءبىر-بىرىن ۇزاق تىڭداۋعا بار، ءبىر-بىرىن جالىقتىرمايدى. ءبىر-بىرىن قايتا دەمەپ، قولداپ وتىرادى.
P.S. كەيىپكەرلەر ا.چەحوۆ اتىنداعى كىتاپحانانىڭ ەستەلىك-كىتابىنا قولتاڭبالارىن، جىلى لەبىزدەرىن قالدىردى. وقىرماندارمەن ەستەلىك سۋرەتكە ءتۇستى.
«Almaty-akshamۋ» №147 (6282) 13 جەلتوقسان، سەيسەنبى، 2022 جىل