التى وبلىستا جاڭادان سەگىز سۋ قويماسى سالىنادى - ۇكىمەت

پرەمەر-مينيستر ءاليحان سمايىلوۆتىڭ توراعالىعىمەن قازاقستاننىڭ سۋ كەڭەسىنىڭ وتىرىسى ءوتتى. 

ونىڭ بارىسىندا سۋ سالاسىن دامىتۋدىڭ 2023-2025 جىلدارعا ارنالعان كەشەندى جوسپارىنىڭ جوباسى قارالدى، دەپ حابارلايدى Almaty-alshamy.kz قازاقپاراتقا سىلتەمە جاساپ. 

كەشەندى جوسپاردا سۋ كودەكسىن جاڭا رەداكسيادا ازىرلەۋ، سۋ رەسۋرستارى مەن سۋ شارۋاشىلىعى ماسەلەلەرى جونىندەگى عىلىمي ورتالىق قۇرۋ، سۋدى پايدالانۋدى رەتتەۋدىڭ ەكونوميكالىق تەتىكتەرىن ىسكە اسىرۋ، سۋ شارۋاشىلىعى ينفراقۇرىلىمىن دامىتۋ جانە باسقا دا ءىس-شارالار كوزدەلگەن.

اتاپ ايتقاندا، اقمولا، اقتوبە، الماتى، جامبىل، شىعىس قازاقستان جانە قاراعاندى وبلىستارىندا 8 جاڭا سۋ قويماسىن سالۋ جانە 16 اپاتتى سۋ قويماسىن رەكونسترۋكسيالاۋ جوسپارلانۋدا. بۇل قوسىمشا سۋ كولەمىن جيناقتاۋعا، 124 ەلدى مەكەندە سۋ تاسقىنى ءقاۋپىن ازايتۋعا جانە 170 مىڭ گەكتاردان استام جاڭا سۋارمالى جەرلەردى اينالىمعا ەنگىزۋگە مۇمكىندىك بەرەدى.

بۇدان باسقا، سۋارۋ ارنالارىن رەكونسترۋكسيالاۋ، ماگيسترالدىق جانە شارۋاشىلىقارالىق ارنالاردى اۆتوماتتاندىرۋ، سونداي-اق سۋ رەسۋرستارىن باسقارۋدى سيفرلاندىرۋ كوزدەلگەن، بۇل سۋدىڭ ىسىرابى مەن ارتىق شىعىنىن ايتارلىقتاي ازايتادى.

«الداعى ءۇش جىلدا ءبىز ەكونوميكاعا جانە ازاماتتارىمىز ءۇشىن بارىنشا ءتيىمدى بولاتىن وزەكتى ماسەلەلەردى شەشۋىمىز كەرەك. الدىمەن، جوعارى ناتيجە بەرەتىن، سونداي-اق، ءبىرىنشى كەزەكتە رەكونسترۋكسيالانۋى ءتيىس سۋ قۇرىلىستارىنىڭ قاۋىپسىزدىگىن قامتاماسىز ەتەتىن باسىم جوبالاردى ىرىكتەپ الۋىمىز كەرەك»، - دەدى ءاليحان سمايىلوۆ.