قالا تازالىعىن ساقتاۋعا ارنالعان شاراعا قوعام قايراتكەرلەرى، ونەر جانە مادەنيەت وكىلدەرى، ەرىكتىلەر مەن قالا تۇرعىندارى بەلسەندى قاتىسۋدا.
بۇگىن «دوستىق ساياباعىندا» وتكەن ەكولوگيالىق اكسياعا ءار سالانىڭ بەلگىلى تۇلعالارى جينالدى. بۇل ءىس-شارا «تازا قازاقستان» رەسپۋبليكالىق ەكو-اكسياسىنىڭ باستاماسىمەن «الماتى – ءبىزدىڭ ورتاق ءۇيىمىز» ناۋقانى اياسىندا ۇيىمداستىرىلدى.
اكسيانىڭ باستى ماقساتى – قورشاعان ورتانى قورعاۋ، كولىكتەردەن، ءوندىرىس ورىندارىنان جانە تۇرمىستىق قالدىقتاردان كەلەتىن زياندى اسەردى ازايتۋ، سونداي-اق قالا تۇرعىندارىن ەكولوگيالىق مادەنيەتكە باۋلۋ.
ەكولوگيالىق شاراعا مەملەكەتتىك ءتىلدى دامىتۋ قورىنىڭ اتقارۋشى ديرەكتورى، قوعام قايراتكەرى بيجومارت قاپالبەك تە قاتىسىپ، ءوز پىكىرىن ءبىلدىردى:
– بۇل باستاما وتە قۇپتارلىق. ءبىراق وسىنداي اكسيالار ناۋقانشىلدىق سيپاتىندا قالىپ قويماۋى كەرەك. قورشاعان ورتانىڭ تازالىعىن ساقتاۋ – كۇندەلىكتى داعدىمىزعا اينالۋى ءتيىس. مىسالى، جاپون حالقى جۇرگەن جەرىن ءاردايىم تازا ۇستايدى. ءبىز دە وسىنداي مادەنيەتتى قالىپتاستىرۋىمىز قاجەت. سونىمەن قاتار، قالاداعى ەسكى اعاشتاردى جاڭارتىپ، جاسىل جەلەك كولەمىن ارتتىرۋ ماڭىزدى. اسىرەسە، قىسى-جازى وتتەگى ءبولىپ تۇراتىن ارشا، شىرشا سەكىلدى اعاشتار وتىرعىزىلسا، ءتىپتى جاقسى بولار ەدى، – دەدى ول.
ورتاق يگلىكتى ماقسات ەتكەن شاراعا ونەر وكىلدەرى دە سالىمىن قوسۋدا.
– قازاق حالقىنىڭ ۇلتتىق داستۇرىنە ساي، كوكتەم تازالىقتان باستالادى. كوپشىلىك بولىپ تازالىققا ۇلەس قوسۋعا ىقىلاس تانىتتىق. اركىم اينالاسىنان باستاسا، قالا كەلبەتى دە وزگەرەدى. ۇقىپتى بولۋ – مادەنيەتتىلىكتىڭ بەلگىسى، – دەدى ءانشى ءبىرجان حاسانعالييەۆ.
ەكولوگيالىق باستامالار قالا تۇرعىندارىنىڭ قورشاعان ورتاعا دەگەن جاۋاپكەرشىلىگىن ارتتىرۋعا ۇلكەن ۇلەس قوسارى ءسوزسىز.