الماتىدا «تازا قازاقستان» اكسياسى اياسىندا ۇيىمداستىرىلعان «الماتى – ورتاق ءۇيىمىز» تازالىق ناۋقانى جالعاسۋدا.
بۇل شارانىڭ باستى ماقساتى – قالانىڭ ەكولوگيالىق جاعدايىن جاقسارتۋ، اۋا ساپاسىن باقىلاۋ جانە تۇرعىنداردى قورشاعان ورتانى قورعاۋعا ىنتالاندىرۋ.
بۇگىن مۋزارت life توبىنىڭ جىگىتتەرى دە يگى شارانىڭ ورتاسىنان تابىلدى. سەرىكبولسىن كىشكەنبايەۆ پەن نۇرحات سەگىزباي ەرەكشە باستاماعا اتسالىسىپ، تۇركسىب اۋدانىنداعى №9 ەكولوگيالىق بەكەتكە ارنايى باردى. ەسترادانىڭ جۇلدىزدارى ەكولوگتارمەن جانە جەرگىلىكتى پوليسيا قىزمەتكەرلەرىمەن بىرگە اۋا ساپاسىن باقىلاۋ جۇمىستارىنا قاتىستى.
اسەم قالانىڭ اسپانى بۇگىن شايداي اشىق. مۇنداي قولايلى اۋا رايىندا قالا اۋماعىنداعى تازالىق شارالارىنا قاتىستى بارلىق جۇمىس ءونىمدى بولاتىنى ءسوزسىز. جۇلدىزدار ەكى ساعات بويى ەكوپوستتاعى ماماندارمەن بىرگە جۇمىس ىستەپ، زياندى قالدىقتاردى انىقتايتىن قۇرالداردىڭ كومەگىمەن اۆتوكولىكتەردىڭ گاز شىعارۋ دەڭگەيىن تەكسەردى. بۇل باستاما – تەك ەكولوگيا ماماندارىنىڭ عانا ەمەس، ونەر ادامدارىنىڭ دا قورشاعان ورتاعا جاناشىرلىقپەن قارايتىنىن كورسەتتى.
اۋانى قورعاۋعا ۇلەس
انشىلەر كوپكومپونەنتتى گاز تالداعىشتاردىڭ كومەگىمەن بەنزين جانە گازبەن جۇرەتىن اۆتوكولىكتەردىڭ پايدالانىلعان گازدارىن تەكسەرىپ، كومىرسۋتەگى، كومىرتەگى وكسيدى مەن ديوكسيدىنىڭ مولشەرىن انىقتاۋعا كومەكتەستى. وسىلايشا، ولار ەكولوگيالىق تالاپتارعا ساي ەمەس كولىكتەردىڭ قالا اۋاسىنا تيگىزەتىن زيانىن ءوز كوزدەرىمەن كورىپ، پىكىر ءبىلدىردى.
– الماتى – ءبىز ءۇشىن ەڭ ادەمى، ەڭ سۇلۋ قالا. ونىڭ تازا اۋاسى، قورشاعان ورتاسى ءبىز ءۇشىن قاشان دا ماڭىزدى. بۇگىن ەكوپوستتاعى ماماندارمەن بىرگە جۇمىس ىستەپ، كولىكتەردىڭ تەحنيكالىق جاعدايىنىڭ ەكولوگياعا قانشالىقتى اسەر ەتەتىنىن تۇسىندىك. اۋا – بارىمىزگە ورتاق، ونى قورعاۋ – ءاربىر ازاماتتىڭ مىندەتى. بارشا تۇرعىنداردى كولىكتەرىنىڭ اقاۋىن ۋاقتىلى جوندەۋگە جانە قورشاعان ورتانى قورعاۋعا جاۋاپكەرشىلىكپەن قاراۋعا شاقىرامىن، - دەيدى «مۋزارت-لايف» توبىنىڭ ءانشىسى سەرىكبولسىن كىشكەنبايەۆ.
ال ءانشى نۇرحات سەگىزباي بولسا، قالانىڭ ەكولوگيالىق جاعدايىن جاقسارتۋ ءۇشىن قوعامدىق كولىكتى دامىتۋ مەن ەلەكتروموبيلدەرگە كوشۋدىڭ ماڭىزدىلىعىن اتاپ ءوتتى:
– ەكولوگيانى قورعاۋ – ءاربىر ازاماتتىڭ مىندەتى. قالادا تىنىس الۋ اۋرۋلارى ءجيى كەزدەسەدى، استما، برونحيت سەكىلدى سىرقاتتاردىڭ باستى سەبەبى – اۋاداعى زياندى زاتتار ەكەنى ءسوزسىز. بىزگە كولىكتەردىڭ ەكولوگيالىق تالاپتارعا ساي بولۋىن قاداعالاۋ وتە ماڭىزدى. قوعامدىق كولىكتى دامىتۋ، جاسىل ايماقتاردى كوبەيتۋ – قالامىزدى تازا ۇستاۋدىڭ نەگىزگى جولدارى، - دەيدى ونەرپاز.
• ەكولوگتار نە دەيدى؟
ەسكى نەمەسە جاڭا كولىك دەپ بولمەيمىز
«رەننەسانس پليۋس» ج ش س اعا ەكولوگ-وپەراتورى ءابدىحاميت امانقۇلدىڭ ايتۋىنشا، الماتى قالاسى بويىنشا 19 ەكولوگيالىق بەكەت جۇمىس ىستەيدى. وتكەن جىلى 204 مىڭنان استام كولىك تەكسەرىلگەن. ونىڭ ىشىندە 17%-ى ەكولوگيالىق تالاپتارعا ساي كەلمەگەن.
– ءبىز جۇرگىزۋشىلەردى ەسكى نەمەسە جاڭا كولىك دەپ بولمەيمىز، بارلىق كولىكتەر بىردەي تەكسەرىلەدى. كەيدە جاڭا كولىك ەسكىدەن دە كوپ زياندى قالدىقتار شىعارادى. سوندىقتان ءاربىر جۇرگىزۋشى ءوز كولىگىنىڭ تەحنيكالىق جاعدايىنا مۇقيات بولۋى قاجەت. ەكوبەكەتتەر – اۋانى قورعاۋداعى ماڭىزدى قۇرال، ولاردىڭ تيىمدىلىگىن ارتتىرۋ قاجەت، – دەيدى ەكولوگ.
ەكولوگيالىق بەكەتتە جۇمىس ىستەگەن مۋزارت-لايف توبىنىڭ مۇشەلەرى قورشاعان ورتانى قورعاۋعا ۇلەس قوسىپ جاتقان ماماندارعا العىس ايتىپ، تازالىق شاراسىنا قاتىسۋشىلاردى كورىسۋ كۇنىمەن قۇتتىقتادى.
«قالا تازالىعى – ءبارىمىز ءۇشىن ماڭىزدى. الماتى جالعىز، ءبىز كوپپىز. سوندىقتان ءار ازامات ەكولوگياعا بەيجاي قاراماۋى كەرەك»،– دەدى انشىلەر.
ەكولوگيا – ورتاق ءىس. الماتىنىڭ تازالىعىن بىرگە قورعايىق!
ەكولوگيالىق بەكەتتەردىڭ ماڭىزى
ەكوبەكەتتەر قالا ەكولوگياسىن جاقسارتۋعا ۇلكەن ۇلەس قوسىپ وتىر. ولار:
✔️ اۋانىڭ لاستانۋ دەڭگەيىن تومەندەتەدى؛
✔️ ەكولوگيالىق تالاپتارعا ساي كەلمەيتىن كولىكتەردىڭ قوزعالىسىن رەتتەيدى؛
✔️ تۇرعىنداردىڭ ەكولوگيالىق مادەنيەتىن ارتتىرادى.