الماتىنىڭ ورتالىق قالالىق كلينيكالىق اۋرۋحاناسىندا ون ەكى ەلى ىشەكتىڭ پەرفوراتيۆتى جاراسىن لاپاروسكوپيالىق تاسىلمەن شۇعىل تىگۋ وتاسى جاسالدى.
ادەتتە مۇنداي وتا اشىق ادىسپەن جاسالادى. الايدا بۇل جاعدايدا پاسيەنتتىڭ جاس ەرەكشەلىگى جانە پەرفوراسيانىڭ ەرتە انىقتالۋىنا بايلانىستى حيرۋرگتار از ءينۆازيۆتى قولجەتىمدىلىكتى تاڭدادى. ناۋقاس 20 جاستا، وتانى حيرۋرگ تاشايەۆ سانجار ساليحان ۇلى جاسادى. ون ەكى ەلى ىشەكتىڭ پەرفوراسياسى – اسقازان-ىشەك جارا اۋرۋىنىڭ ەڭ ءقاۋىپتى اسقىنۋلارىنىڭ ءبىرى جانە دەرەۋ حيرۋرگيالىق كومەكتى قاجەت ەتەدى.
لاپاروسكوپيالىق ءادىس كەڭ تىلىك جاساماي-اق، بىرنەشە شاعىن تەسىك ارقىلى تولىققاندى وتا جاساۋعا مۇمكىندىك بەرەدى. مۇنداي ءتاسىل تىندەردىڭ جاراقاتتانۋىن ازايتىپ، وتادان كەيىنگى اسقىنۋلار ءقاۋپىن تومەندەتەدى، قان جوعالتۋدى ازايتادى جانە ناۋقاستىڭ تەزىرەك قالپىنا كەلۋىنە ىقپال ەتەدى.
دەر كەزىندە جۇرگىزىلگەن دياگنوستيكا حيرۋرگتارعا پەرفوراسيا بارىن جەدەل راستاۋعا جانە از ءينۆازيۆتى تەحنيكانى تاڭداۋعا مۇمكىندىك بەردى. لاپاروسكوپيا ارقىلى حيرۋرگتار قۇرساق قۋىسىنىڭ جاعدايىن تولىق باعالاپ، پەرفوراتيۆتى تەسىكتى تىگىپ، قاجەتتى ساناسيا جاسادى. وتا تمككك اياسىندا ءوتتى، ناۋقاستىڭ جاعدايى تۇراقتى، قالپىنا كەلۋ كەزەڭى جالعاسىپ جاتىر.
لاپاروسكوپيالىق ءتاسىل ەمدى اناعۇرلىم جەڭىلدەتىپ، ساۋىعۋ ۋاقىتىن قىسقارتادى جانە ستاسيونارلىق جۇكتەمەنى تومەندەتۋگە كومەكتەسەدى.