7 قىركۇيەكتە بەلگيا قۇراماسى 2026 جىلعى الەم چەمپيوناتىنىڭ ىرىكتەۋىندە قازاقستاندى 6:0 ەسەبىمەن ويسىراتا جەڭدى. بۇل ساتسىزدىك ۇلتتىق قۇرامانىڭ باس باپكەرى ءالي الييەۆتىڭ وتستاۆكاسىمەن جالعاستى. باس باپكەر ماچتان كەيىنگى باسپا ءسوز ءماسليحاتىندا ءوز ەركىمەن قىزمەتتەن كەتەتىنىن مالىمدەدى. بۇل جايتتاردان نە كۇتەمىز؟ اqshamnews.kz ءتىلشىسى سپورت ساراپشىسىنىڭ بولجامىن ءبىلدى.
"كۇللى ەۋروپاعا ماسقارا بولدىق"
سپورت ساراپشىسى، جۋرناليست اينات قابيدۋللا قازاقستان فۋتبولىنىڭ بۇگىنگى جاعدايىنا الاڭداپ وتىر. ونىڭ ايتۋىنشا، ءاربىر ىرىكتەۋ كەزەڭى نەمەسە جولداستىق كەزدەسۋ جانكۇيەرلەرگە قۋانىش سىيلاۋدىڭ ورنىنا ماسقارامەن اياقتالىپ جاتىر.
"ادەتتەگىدەي تاعى دا جەڭىلدىك. جەڭىلىس قالىپتى جاعداي بولىپ بارا جاتىر. كۇللى ەۋروپاعا ماسقارا بولدىق. قۇرامىندا كاسىبي فۋتبولشىسى جوق ليحتەنشتەين ۇلتتىق قۇراماسى دا بەلگيادان ءدال وسىنداي ەسەپپەن ۇتىلدى. دەمەك، ءبىزدىڭ دەڭگەيىمىز الەمدەگى ەڭ ءالسىز قۇرامالارمەن تەڭ بولىپ تۇر ما دەگەن وي تۋادى"، – دەيدى ساراپشى.
قانداي جاعدايدا فەدەراسيا باسشىلىعى تۇگەل وتستاۆكاعا كەتۋى كەرەك؟
ءالي الييەۆتىڭ كەتۋى العاشقىدا فەدەراسيا ءۇشىن "وتاندىق باپكەرگە مۇمكىندىك بەرىپ جاتىرمىز" دەگەن سىلتاۋدى جاسىرۋعا ىڭعايلى بولعانى انىق. الايدا قابيدۋللانىڭ ايتۋىنشا، بۇلاي جانكۇيەرلەردى الداۋدىڭ ءجونى جوق:
"قازاق فۋتبولىنىڭ جانكۇيەرلەرى ويىنشىق ەمەس. ەلىمىزدە ۇلتتىق قۇرامانى باپتاي الاتىن دەڭگەيدەگى باپكەردىڭ جوق ەكەنىن ءبارى بىلەدى. ەگەر كەلەسى باپكەر تاعى دا قازاقستاننان نەمەسە پوستكەڭەستىك ەلدەردەن بولسا، فەدەراسيا باسشىلىعى تۇگەلىمەن وتستاۆكاعا كەتۋى كەرەك" دەدى ول.
جانكۇيەر مادەنيەتى: بىزگە نە جەتىسپەيدى؟
ساراپشى تاراپىنان قازاق فۋتبولىنىڭ جانكۇيەرلەرىنە قاتىستى دا وتكىر پىكىر ايتىلدى. ول ۋەلسكە قارسى استانادا وتكەن كەيىنگى ماچتى مىسالعا كەلتىردى:
"قانداي فۋتبولشىلار بولسا، سونداي جانكۇيەرلەر. سوڭعى ءوز الاڭىمىزدا ۋەلسكە قارسى وتكەن ماچتا ۆاللييلەر قۇددى ءبىر ءوز الاڭىندا ويناپ جاتقانداي اسەر قالدىردى. قىپ-قىزىل جەيدە، رۋحتى ۇراندار ۋەلس جانكۇيەرلەرىنىڭ اۋىزبىرشىلىگىن كورسەتتى. قازاق فۋتبولىنىڭ جانكۇيەرلەرى قاشان وسىنداي دەڭگەيگە جەتەدى ەكەن؟ سىرت الاڭداعى ەمەس ءوز الاڭىمىزداعى ويىندارعا سارى-كوك تۇستە، شاپان، تاقيامەن كەلۋگە قاشان اۋىزبىرشىلىگىمىز جەتەدى ەكەن؟ ەڭ وڭاي دەگەن "اتامەكەن" ءانىنىڭ ءسوزىن قاشان جاڭىلماي ايتامىز؟" دەگەن سۇراقتارمەن قايتقان ەدىك سول ماچتان" دەدى اينات قابيدۋللا.
ەسكە سالايىق، قازاقستان ۇلتتىق قۇراماسىنىڭ باس باپكەرى بەلگيادان جەڭىلگەن سوڭ وتستاۆكاعا كەتەتىنىن مالىمدەگەن ەدى. ارتىنشا قازاقستان فۋتبول فەدەراسياسىنىڭ پرەزيدەنتى مارات وماروۆ ونىڭ كەتۋىنە قاتىستى پىكىر ءبىلدىردى.
"جالپى ول كوماندانى جاسارتۋ جاعىنان ءوز مىندەتىن ورىندادى. قۇرامانىڭ ورتا جاسى – 25-26. ءبىراق ناتيجەلەر ءالى دە كوڭىل كونشىتپەيدى. سوندىقتان ول كەلگەن سوڭ كادرلىق شەشىمدەر قابىلدايمىز. مەن شەشىمدى ول كەلگەننەن كەيىن قابىلدايمىن. ءالى دە سويلەسەمىز"، – دەدى وماروۆ ۇكىمەت كۋلۋارىندا.