قازاقستان ۇلتتىق قۇراماسىنىڭ سپورتشىلارى دۇنيەجۇزىلىك كوشپەندىلەر ويىندارىنىڭ بەسىنشى جارىس كۇنىن تابىستى اياقتادى، دەپ حابارلايدى aqshamnews.kz.
كوكپاردان قازاقستان ۇلتتىق قۇراماسى قىرعىزستان كومانداسىن 5:4 ەسەبىمەن جەڭىپ، التىن جۇلدەگە يە بولدى. ال كوك بورۇدەن قازاقستان كومانداسى قىرعىزستان قۇراماسىنا 4:10 ەسەبىمەن ەسە جىبەرىپ، كۇمىس جۇلدە الدى.
ەتنواۋىلدا تەڭگە ىلۋدەن وتكەن جارىستا بەكنۇر سەرىكوۆ – بەس بەلەس سايىسىنان، ال راحات قامباروۆ قوس قۇلاش سايىسىنان التىن جۇلدە الدى.
ەتنواۋىلدا قۇسبەگىلىكتەن ىرىكتەۋ جانە جارتىلاي فينالدىق سىن ءوتتى. ۇلتتىق قۇراما سپورتشىلارى بۇركىت، قارشىعا جانە سۇڭقار سالۋدان فينالعا شىقتى.
«ارعىماق» ات-سپورت كەشەنىندە وتكەن ءداستۇرلى ساداق اتۋدان جارىس ءوز مارەسىنە جەتتى. كوماندالىق سايىستا قازاقستان قۇراماسى اۋستراليادان كەلگەن ساداقشىلاردان 2:3 ەسەبىمەن جەڭىلىپ، كۇمىس جۇلدەگە يە بولدى. ساداقشىلار كوشپەندىلەر ويىندارىن ءبىر التىن، ەكى كۇمىس، بەس قولا جۇلدەمەن اياقتادى.
جاقسىلىق ۇشكەمپىروۆ اتىنداعى جەكپە-جەك سارايىندا تاتار حالقىنىڭ كونە ۇلتتىق بەلبەۋ كۇرەسى كوراشتەن ەرلەر اراسىندا ءتورت سالماق دارەجەسى بويىنشا جارىس ءوتتى. ءبىرجان شايمەردەنوۆ (90 كەلى) التىن جۇلدە السا، ادىلەت شالعىنبەك ۇلى (64 كەلى) مەن نۇرداۋلەت جارىلعاپوۆ (+100 كەلى) كۇمىس جۇلدەگە يە بولدى. بەكنۇر بەكتاي (75 كەلى) قولا جۇلدە الدى.
«الاۋ» مۇز سارايىندا تۇرىك حالقىنىڭ ۇلتتىق كۇرەسى اشىرتمالى ابا گيۋرەشىنەن بەس سالماق دارەجەسى بويىنشا جارىس ءوتتى. قازاقستاندىق ءۇش بىردەي سپورتشى كۇمىس جۇلدەگە يە بولدى. ولار ەرنۇر سۇلەيمەن (60 كەلى)، ادىلەت احمەتعالي (70 كەلى)، ايدوس عالىموۆ (90 كەلى).
«الاۋ» مۇز سارايىندا قىرعىز حالقىنىڭ ۇلتتىق ويىنى وردودان قازاقستان قۇراماسى فينالعا شىقتى. اقتىق باسەكە 13 قىركۇيەك كۇنى وتەدى.
«دۋمان» قوناق ءۇي جانە سپورت كەشەنىندە باتىس افريكا حالىقتارىنىڭ زياتكەرلىك وي̆ىنى وۆاريدەن وتكەن جارىستا اسەل دالييەۆا التىن جۇلدە السا، اڭساعان ءقوجاناسىپ قولا جۇلدە يەلەندى.