الماتى مۋزەيىندە 9 مامىر - جەڭىس كۇنى قارساڭىندا جەڭىس تۋىن تىككەن حالىق قاھارمانى راحىمجان قوشقاربايەۆتىڭ تۋعانىنا 100 جىل تولۋىنا وراي «ەرلىكتىڭ وشپەس داڭقى» اتتى كورمە اشىلدى.
كورمەگە قازاقستان رەسپۋبليكاسىنىڭ قارۋلى كۇشتەر اسكەري-تاريحي مۋزەيىنىڭ جانە الماتى مۋزەيىنىڭ قورىنان الىنعان جادىگەرلەر قويىلدى.
ۇلى وتان سوعىسى باتىرلارىنىڭ فوتوسۋرەتتەرى، قۇجاتتارى، جەكە كەشەندەرى مەن ماراپاتتارى جانە سوعىس كەزىندەگى قارۋ-جاراقتار كوپتىڭ كوزايىمىنا اينالدى.
سونىمەن قاتار كەڭەس وداعىنىڭ باتىرى، تاۋەلسىز قازاقستاننىڭ تۇڭعىش قورعانىس ءمينيسترى، حالىق قاھارمانى، ارميا گەنەرالى ساعادات نۇرماعامبەتوۆ جانە 1945 جىلى جەڭىس شەرۋىنە قاتىسۋشى، قازاق كسر ىشكى ىستەر ءمينيسترى اندرەي گەورگييەۆيچ پلاتايەۆتىڭ اسكەري كيىمدەرى جانە مەدالدارى كورمە ەكسپوزيسياسىنا قويىلدى.
اتالعان ءىس-شاراعا قازاقستان رەسپۋبليكاسىنىڭ قارۋلى كۇشتەرى اسكەري-تاريحي مۋزەيىنىڭ قىزمەتكەرى اسقار ابدۋالي ۇلى، تاريح عىلىمدارىنىڭ كانديداتى، دوسەنت ارمان قابدەش ۇلى، جازۋشى، تاريحشى ەلەنا گەوريگيەۆنا جانە ءىلياس ەسەنبەرلين اتىنداعى №25 گيمنازيا مەكتەپ وقۋشىلارى قاتىستى.
