كوپەن امىربەك ومىردەن وزدى

تانىمال ساتيريك كوپەن امىربەك 73 جاسقا قاراعان شاعىندا ومىردەن وزدى. قارالى حاباردى اقىن، قازاقستان جازۋشىلار وداعىنىڭ مۇشەسى سەرىك سەيىتمان جەتكىزدى، دەپ حابارلايدى Almaty-akshamy.kz.
«كوڭىلدەرىڭىزگە كوپ راقمەت. كوپەن اعام ءبىزدى تاستاپ كەتتى...»، - دەپ جازدى اقىن Facebook- پاراقشاسىندا.
كوپەن امىربەك 1950 جىلى 29 ناۋرىزدا وڭتۇستىك قازاقستان وبلىسىنىڭ وتىرار اۋدانىنا قاراستى ەشكىقورا ەلدىمەكەنىندە دۇنيەگە كەلگەن. ورتا مەكتەپتى بىتىرگەن سوڭ وتىرارداعى حالىق تەاترىندا ەڭبەك جولىن باستاعان.
ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن 1973 جىلى ءبىتىرىپ، قيىر شىعىستا ەكى جىلدىق اسكەري-پارتيا مەكتەبىندە وقىعان.
1978 جىلى ماسكەۋدە، 1980 جىلى تاشكەنتتە وتكەن بۇكىلوداقتىق جاس سىقاقشىلار فەستيۆالىنە قاتىسىپ، «پراۆدا» باسپاسىنان شىققان «نادەيسيا ي جدي»، «كروحوتنىە زۆەزدى» اتتى ورىس تىلىندەگى ۇجىمدىق جيناقتا ءازىل-سىقاقتارى جاريالانعان.
ساياسي-ساتيرالىق «ارا-شمەل» جۋرنالىندا ادەبي قىزمەتكەر، ءبولىم مەڭگەرۋشىسى، جاۋاپتى حاتشى، باس رەداكتور، عىلىمي-تەحنيكالىق «ءبىلىم جانە ەڭبەك» جۋرنالىندا جاۋاپتى حاتشى، «قازاق ادەبيەتى» گازەتىندە ساتيرا جانە يۋمور ءبولىمىنىڭ مەڭگەرۋشىسى، «ەگەمەن قازاقستان» گازەتىندە فەلەتون ءبولىمىنىڭ مەڭگەرۋشىسى، قازاقستان رەسپۋبليكاسى باس پروكۋراتۋراسى مەن جوعارعى سوتىندا باسپا ءسوز حاتشىسى، قازاق راديوسىندا باس رەداكتور بوپ قىزمەت ىستەدى.
كوپەن امىربەك «قىمىزحانا»، «تاماشا» ويىن-ساۋىق وتاۋىنىڭ بەلسەندى اۆتورى رەتىندە، سونداي-اق ءوزى قۇرعان «كوپەن كەلە جاتىر!...» اتتى ساتيرالىق تەاترىمەن كورەرمەنگە كەڭىنەن تانىلدى. ورىس ادەبيەتىنىڭ كلاسسيكتەرى ي.كرىلوۆ، س.ميحالكوۆ، س.مارشاكتىڭ مىسال-مىسقىلدارى مەن لەزگين ساتيريگى ءجاميديننىڭ جانە وزبەك ازىلكەشى ابدۋللا قاھاردىڭ ءبىرسىپىرا سىقاق ولەڭدەرىن قازاق تىلىنە اۋداردى. «اتى جوق كىتاپ»، «الىپ»، «ءتىلىم قىشىپ بارادى»، «قىسىر اڭگىمە»، «مىڭ ءبىر مىسال»، «اۋىزباستىرىق»، «ءوزىڭدى تانيسىڭ با؟»، «كوپەن كەلە جاتىر!...»، «ءىز»، «كوكەمنىڭ كوزى»، «پا، شىركىن، پاروديا!...» اتتى ءازىلسىقاق، سىن ماقالالار كىتابىنىڭ اۆتورى.
پرەزيدەنت گرانتى مەن «پاراسات» وردەنىنىڭ يەگەرى، حالىقارالىق «الاش» ادەبي سىيلىعىنىڭ لاۋرەاتى.