كونستيتۋسيالىق كەڭەس رەسپۋبليكا پرەزيدەنتى ق.ك. توقايەۆتىڭ «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋ ەنگىزۋ تۋرالى» قازاقستان رەسپۋبليكاسى زاڭى جوباسىنىڭ كونستيتۋسيانىڭ 91-بابىنىڭ 2-تارماعىنا سايكەستىگىن تەكسەرۋ تۋرالى ءوتىنىشى بويىنشا شەشىم قابىلدادى، دەپ حابارلايدى Almaty-akshamy.kz كەڭەستىڭ سايتىنا سىلتەمە جاساپ.
زاڭ جوباسى كونستيتۋسيادا رەسپۋبليكا پرەزيدەنتىنىڭ ءبىر مارتە جەتى جىلدىق وكىلەتتىك مەرزىمىن بەلگىلەۋدى، سونداي-اق ەل استاناسىنىڭ اتاۋىن وزگەرتۋگە بايلانىستى نەگىزگى زاڭنىڭ 2-بابىنا تۇزەتۋلەر ەنگىزۋدى كوزدەيدى.
كونستيتۋسيالىق كەڭەستىڭ پىكىرىنشە، پرەزيدەنتتىك جانە پارلامەنتتىك سايلاۋ ينستيتۋتى مەملەكەتتىلىكتىڭ كونستيتۋسيالىق مودەلىنىڭ بارلىق كومپونەنتتەرىن قوزعايتىن ەرەكشە كونستيتۋسيالىق قۇندىلىق. سول سەبەپتى ول مەملەكەتتىڭ ماڭىزدى ورگاندارىن جاڭارتۋدىڭ ءتيىمدى قۇرالى بولىپ تابىلادى. وسى ارقىلى رەسپۋبليكانىڭ الەۋمەتتىك نەگىزى، حالىقتىڭ مەملەكەتتىك بيلىك باستامالارىن قولداۋى نىعايتىلادى.
كونستيتۋسيالىق كەڭەس سايلاۋ ناۋقاندارى كەزەڭىندە ازاماتتىق قوعامنىڭ ءارتۇرلى سەگمەنتتەرى جانداناتىنىنا نازار اۋداردى. وسى جاعدايلاردا قازاقستان رەسپۋبليكاسىنىڭ كونستيتۋسياسىندا باياندى ەتىلگەن بارلىق قۇندىلىقتار سەرپىندى ءارى ۇيلەسىمدى ىس-ارەكەت ەتۋگە ءتيىس.
كونستيتۋسيالىق كەڭەستىڭ پايىمداۋىنشا، پرەزيدەنتتىك مانداتتىڭ ءبىر مارتە جەتى جىلدىق مەرزىمىن بەلگىلەۋ اعىمداعى جىلعى 5 ماۋسىمداعى رەسپۋبليكالىق رەفەرەندۋمدا قابىلدانعان مەملەكەتتىك بيلىكتى مونوپوليزاسيالاۋعا جول بەرمەۋگە باعىتتالعان كونستيتۋسيالىق نوۆەللالاردىڭ مانىنە ساي كەلەدى.
پرەزيدەنتتىك مانداتتى ءبىر مەرزىممەن شەكتەيتىن كونستيتۋسيانىڭ 42-بابى 5-تارماعىنىڭ ۇسىنىلىپ وتىرعان رەداكسياسى اتالعان جوعارى لاۋازىمدى تۇلعا لاۋازىمىنا سايلاناتىن بارلىق ادامدارعا تەڭ نەگىزدە قولدانىلاتىن بولادى. ونىمەن كونستيتۋسيالىق سوت سۋديالارىنىڭ ءبىر مارتە سەگىز جىلدىق وكىلەتتىك مەرزىمىن انىقتاۋ ۇيلەسەدى.
وسى ورايدا، كونستيتۋسيالىق كەڭەس «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋ ەنگىزۋ تۋرالى» زاڭ جوباسى كونستيتۋسيادا بەلگىلەنگەن تالاپتارعا سايكەس دەپ سانايدى.
كونستيتۋسيالىق كەڭەس قورىتىندىسىنىڭ تولىق ءماتىنى بۇقارالىق اقپارات قۇرالدارىندا جاريالانادى.
كونستيتۋسيالىق كەڭەس شەشتى:
1. «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋ ەنگىزۋ تۋرالى» قازاقستان رەسپۋبليكاسى زاڭىنىڭ جوباسى قازاقستان رەسپۋبليكاسىنىڭ كونستيتۋسياسىنا، سونىڭ ىشىندە نەگىزگى زاڭنىڭ 91-بابىنىڭ 2-تارماعىندا بەلگىلەنگەن تالاپتارعا، سايكەس دەپ تانىلسىن.
2. قازاقستان رەسپۋبليكاسى كونستيتۋسياسىنىڭ 74-بابىنىڭ 3-تارماعىنا سايكەس قازاقستان رەسپۋبليكاسى كونستيتۋسيالىق كەڭەسىنىڭ قورىتىندىسى قابىلدانعان كۇنىنەن باستاپ كۇشىنە ەنەدى، رەسپۋبليكانىڭ بۇكىل اۋماعىندا جالپىعا بىردەي مىندەتتى، تۇپكىلىكتى بولىپ تابىلادى جانە شاعىمدانۋعا جاتپايدى.
3. وسى قورىتىندى رەسپۋبليكالىق رەسمي باسىلىمداردا قازاق جانە ورىس تىلدەرىندە جاريالانسىن.