بۇگىن ق ر عىلىم جانە جوعارى ءبىلىم ءمينيسترى، حالىقارالىق تۇركى اكادەمياسى عىلىمي كەڭەسىنىڭ ءتوراعاسى ساياسات نۇربەك بۇرىن زەرتتەلمەگەن كونە تۇركى ەسكەرتكىشتەرىن تاپقان تۇركولوگ عالىمداردى ماراپاتتادى، دەپ حابارلايدى Almaty-akshamy.kz.
موڭعوليانىڭ عىلىم اكادەمياسى تاريح جانە ارحەولوگيا ينستيتۋتىنىڭ ارحەولوگى A. ەنحتورگە، تۇركولوگ عالىمدار ن. بازىلحان مەن ن. بوگەنبايەۆقا مينيسترلىكتىڭ «عىلىمدى دامىتۋعا سىڭىرگەن ەڭبەگى ءۇشىن» توسبەلگىسى تابىستالدى. سونداي-اق، اتالعان عالىمدارعا جانە حالىقارالىق تۇركى اكادەمياسىنىڭ پرەزيدەنتى د. قىدىرالىگە ءمينيستردىڭ العىس حاتتارى بەرىلدى.
24-تامىز كۇنى نومگون (موڭعوليا) وڭىرىندە جۇرگىزىلگەن عىلىمي ارحەولوگيالىق ەكسپەديسيانىڭ ناتيجەلەرى جاريالاندى. ەكسپەديسيانى حالىقارالىق تۇركى اكادەمياسى مەن موڭعوليا عىلىم اكادەمياسىنىڭ ارحەولوگيا ينستيتۋتى بىرلەسىپ جۇرگىزگەن بولاتىن.
نومگونداعى قازبا جۇمىستارىنىڭ ارقاسىندا ورتالىق ازياداعى شىعىس تۇركىلەرىنىڭ قاعان-كنياز تيپىندەگى مەموريالدىق كەشەندەرىن ەرەكشەلەيتىن نەگىزگى ارحيتەكتۋرالىق كومپونەنتتەردەن تۇراتىن تۇركى ءداۋىرىنىڭ بۇرىن بەلگىسىز بولعان تاعى ءبىر ەسكەرتكىشى اشىلدى. كونە تۇركىلىك رۋنا جانە سوعدى تىلىندە قاشالعان جازۋى بار بىتىكتاستىڭ ءبىر بولىگى، تاسباقا تۇعىرى، انتروپومورفتى ءبادىز بولىگى (قاعاننىڭ جارتىلاي بەينەسى) جانە زوومورفتى مۇسىندەر (ارىستان مەن قوي مۇسىندەرى) جانە ت.ب. تابىلدى.
عالىمداردىڭ نومگون كەشەنىن كۇلتەگىن مەن بىلگە قاعاننىڭ اكەسى، تۇرىك قاعاندىعىن قايتا جاڭعىرتۋشى قۇتلىق ەلتەرىس قاعانعا ارنالعان دەگەن بولجام جاساپ وتىر.
مينيستر ساياسات نۇربەك بۇل جاڭالىقتىڭ ماڭىزدىلىعىن اتاپ ءوتىپ، حالىقارالىق ەكسپەديسيا مۇشەلەرىنە تۇركولوگياعا جانە الەمدىك عىلىمعا قوسقان ۇلەسى ءۇشىن العىس ءبىلدىردى.
«موڭعولياداعى نومگون مەموريالدىق كەشەنىنىڭ تابىلۋى وتاندىق جانە شەتەلدىك تۇركىتانۋشى عالىمداردىڭ تاريحي جەتىستىگى دەپ ەسەپتەيمىن. ءبىزدىڭ ەلىمىز، تۇركىتىلدەس مەملەكەتتەر مەن الەمدىك قاۋىمداستىق ءۇشىن بۇل زەرتتەۋ جۇمىستارىنىڭ ماڭىزى زور»، — دەدى ساياسات نۇربەك.
سونىمەن قاتار مينيستر موڭعوليانىڭ ءبىلىم جانە عىلىم مينيسترلىگىنە جانە عىلىم اكادەمياسىنا قولداۋ بىلدىرگەنى ءۇشىن العىس ايتا وتىرىپ، كەلەشەكتە دە بىرلەسكەن عىلىمي جوبالاردى جۇزەگە اسىرۋعا سەنىم ءبىلدىردى.