جەر ۇيلەر 15-20 پايىز ارزانداپتى
ەلىمىزدە كۇزدە باسپانا باعاسى ارزاندايدى. جىلجىمايتىن مۇلىك اگەنتتىگىنىڭ ماماندارى وسىنداي بولجام جاسادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايتۋلارىنشا، ءقازىردىڭ وزىندە باستاپقى جانە قايتالاما نارىقتاعى پاتەر قۇنى 1-2 پايىز تومەندەگەن. باسپانانىڭ ارزانداعانىنا قاراماستان ۇيدەن ۇمىتتىلەر قاتارى سيرەپ كەتىپتى.
«تۇرعىن ءۇي نارىعىنداعى توقىراۋ كۇزدە باستالادى». مامانداردىڭ سوزىنە سەنسەك، بيىل كەز-كەلگەن ساناتتاعى باسپانا باعاسى ايتارلىقتاي تومەندەگەن. جەر ۇيلەر 15-20 پايىز ارزانداپتى. ال سۋ جاڭا دەگەن تۇرعىن ءۇي كەشەندەرىنىڭ ساتىلىمى كوڭىل قۋانتارلىق ەمەس كورىنەدى.
«وسى ءۇش ايدىڭ كولەمىندە قىسقا دەيىن پاتەرلەردى ساتىپ ۇلگەرۋ كەرەكسىز. سەبەبى كۇزدە ساتپاساڭىز، پاتەرلەر تۇرىپ قالادى. قىستا سۇرانىس ازايادى. باعالار وسى ۋاقىتتا وسپەيدى، سەبەبى نەسيە وتە قىمبات. 16-19 پايىز نەسيە وتە قىمبات»، – دەدى جىلجىمايتىن مۇلىك اگەنتتىگىنىڭ باسشىسى عالىم ىسقاقوۆ.
ساراپشى سوڭعى 3 ايدا باسپانا نارىعىندا ايتىرلىقتاي وزگەرىس بولعانىن ايتتى. تيىسىنشە باعا قۇبىلا ءتۇسىپتى. ءقازىر ەل بويىنشا جامبىل، سولتۇستىك قازاقستان وبلىسىندا پاتەر قۇنى ەڭ ارزان بولسا، ەڭ قىمباتى نۇر-سۇلتان، الماتى قالاسىندا ەكەن. باس قالاداعى ءۇيدىڭ شارشى مەترىن 380 - 410 مىڭ تەڭگە ارالىعىندا تاباسىز. ال وزگە وڭىرلەردە باعا 210 مىڭ تەڭگەدەن باستالادى.
«تۇرعىن ءۇي قۇرىلىسىنا ينۆەستيسيالار 2020 جىلمەن سالىستىرعاندا 19 پايىز ءوستىپ، 2،4 ترلن تەڭگە قۇرادى. سونىمەن قاتار 150 000 جۋىق ازاماتتار ءۇي جاعدايىن جاقسارتتى. مەملەكەتتىك ينۆەست شەڭبەرىندە 30 000 الەۋمەتتىك تۇرعىن ءۇي سالىندى. 18،5 مىڭ جەڭىلدىكتى قارىز بەرىلدى»، – دەدى ق ر ييدم تۇرعىن ءۇي قاتىناستارى باسقارماسىنىڭ باسشىسى سۇلتانعالي جالقۇل.
ۇلتتىق ستاتيستيكا بيۋروسىنىڭ اقپارىنشا، ناۋرىزدا باستاپقى جىلجىمايتىن مۇلىك باعاسى اقپانمەن سالىستىرعاندا بىردەن 5،5 پايىز قىمباتتاعان. تيىسىنشە، جىل باسىنان بەرى پايدالانۋعا بەرىلگەن تۇرعىن ۇيلەردىڭ جالپى الاڭى 0،5 پايىز تومەندەپتى. ساراپشى سۇرانىستىڭ كۇرت ازايۋ سەبەبىن قىمباتشىلىقپەن بايلانىستىردى.
تۇرعىن ۇيلەردى پايدالانۋعا بەرۋ ىسىندە قۇرىلىس قارقىنى اباي، ۇلىتاۋ، جەتىسۋ وبلىسىندا تومەندەگەن. بۇل ايماقتارعا جىل باسىنان بەرى 800 پاتەر عانا قولدانىسقا وتكەن ەكەن. ال جىل سوڭىنا دەيىن ەلدە 15 ملن شارشى مەتر تۇرعىن ءۇي پايدالانۋعا بەرىلەدى.