الماتى وبلىسىندا گاز جارىلىسىنان ءبىر ادام مەرت بولدى

تاعى 5 ادام جاراقات الدى

وقيعا ىلە اۋدانىنىڭ وتەگەن باتىر كەنتىندە بولعان، دەپ حابارلايدى Almaty-akshamy.kz.

31 تامىز ساعات 10:21-دە الماتى وبلىسى تجد پۋلتىنە حابار ءتۇستى. وندا ىلە اۋدانىنىڭ وتەگەن باتىر كەنتىندە جەرۇيىق كوشەسىندە PolpanInsulation ج ش س زاۋىتىنىڭ جىلۋ وقشاۋلاعىش پليتا وندىرەتىن عيماراتىندا گاز-اۋا قوسپاسىنىڭ تارسىلى، كەيىننەن 50 شارشى مەتر الاڭدا قابىرعا قاپتاماسى جانعانى جانە جالپى اۋدانى 400 شارشى مەتر شاتىر مەن قابىرعانىڭ وپىرىلىپ قۇلاعانى ايتىلعان.
ماماندار دەرەۋ جىبەرىلدى.

وقيعا ورنىنا ساعات 10:24-تە كەلگەن كەزدە 50 شارشى مەتر الاڭدا ەكى قاباتتى عيماراتتىڭ قابىرعاسىنىڭ قاپتاماسى جانىپ جاتقانى، سونداي-اق جارىلىس سالدارىنان عيماراتتىڭ شاتىرى مەن قابىرعاسىنىڭ وپىرىلىپ قۇلاعانى انىقتالدى. ونىڭ جالپى اۋدانى - 1250 شارشى مەتر.

«ءورت ساعات 10:35-تە اۋىزدىقتالىپ، ساعات 10:50-دە ءسوندىرىلدى. جالپى اۋدانى - 50 شارشى مەتر»،- دەلىنگەن الماتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى تاراتقان حابارلامادا.

ۆەدومستۆونىڭ اقپاراتىنا سايكەس، توتەنشە جاعداي سالدارىنان 5 ادام ورتاشا اۋىر جاراقات الىپ، ءبىر ادام كوز جۇمعان.

«ءورتتى سوندىرۋگە الماتى وبلىسى تجد 15 قىزمەتكەرى مەن 4 تەحنيكاسى، سونداي-اق پوليسيا قىزمەتكەرلەرى، 3 جەدەل جاردەم بريگاداسى جانە باسقا دا ءوزارا ءىس-قيمىل قىزمەتتەرى قاتىستى. توتەنشە جاعدايدىڭ سەبەبى انىقتالىپ جاتىر»،- دەپ تولىقتىردى اتالعان ۆەدومستۆونىڭ باسپا ءسوز قىزمەتى.