قازاقستاندا كلينينگ قىزمەتى شامامەن ونشاقتى جىل بۇرىن تانىلا باستادى. ءقازىر ءۇيىن جيناتۋ ءۇشىن كلينينگ شاقىرمايتىن وتباسى سيرەك كەزدەسەدى. سوعان قاراماستان، قوعامدا ءالى كۇنگە دەيىن ايەل ادام ءوز ءۇيىن ءوزى جيناۋى كەرەك، بۇل جالقاۋلارعا كەرەك قىزمەت نەمەسە كلينينگ تەك بايلارعا ارنالعان دەگەن تۇسىنىك بارى راس.
وسى تاقىرىپقا قاتىستى قوعامداعى پىكىرلەردى ەسكەرە كەلە كلينينگكە دەگەن كوزقاراستى شارتتى تۇردە جەتى ساناتقا بولۋگە بولادى:
1. كلينينگكە ۇزىلدى-كەسىلدى قارسى ادامدار. ولاردىڭ ويىنشا، ۇيدە كەلىن بار، ءۇيدىڭ وتاناسى بار، قىزى مەن باسقا دا وتباسى مۇشەلەرى بار، قىسقاسى اركىم ءوز ءۇيىن ءوزى جيناۋى كەرەك.
2. ۇيگە بوتەن ادامنىڭ كىرۋىنە، زاتتارىنا قول تيگىزۋىنە قارسىلىق تانىتاتىندار.
3. بوگدە ادامدارعا سەنبەي، بىردەڭەم جوعالسا شە، زاتىمدى سىندىرىپ الماي ما؟ دەپ الاڭدايتىندار.
4. كلينينگتى تەك جوندەۋ جۇمىستارىنان كەيىنگى تازالىق ءۇشىن عانا شاقىراتىندار.
5. جىلىنا ءبىر رەت تولىق تازالاتۋ ءۇشىن كاسىبي مامان شاقىرۋدى قۇپ كورەتىندەر.
6. كلينينگكە وڭ كوزقاراستاعىلار، ويتكەنى ءۇي جيناۋ – ايەلدىڭ ومىرلىك ميسسياسى ەمەس دەپ ەسەپتەيتىندەر.
7. ءۇيدى باسقا ادامنىڭ جيناۋىنا قارسى ەمەس، ءبىراق ول كلينينگ قىزمەتى ەمەس، تەك ءبىر تەكسەرىلگەن، تۇراقتى ءۇي قىزمەتكەرى بولعانىن قالايتىندار.
ءتۇرلى كوزقاراستىڭ بارىنا قاراماستان، ءبىزدىڭ قوعام كلينينگتىڭ قالىپتى ءارى ىڭعايلى قىزمەت ەكەنىن قابىلداي باستادى. بۇل ءدال تاماق جەتكىزۋ قىزمەتى سياقتى سەرۆيستىڭ ءتۇرى. دەمەك، بولاشاق كەلىندەر ءۇشىن تۇرمىستى باسقا ادامدارعا سەنىپ تاپسىرىپ، ۋاقىتىن ودان دا جاعىمدى ىستەرگە ارناۋعا مۇمكىندىك بار. ەڭ باستىسى ەنەنىڭ دە، كۇيەۋدىڭ دە كوزقاراسىن وزگەرتۋ.
كلينينگ تۋرالى ەل تۇرعىندارى نە ويلايدى؟
نۇرگۇل، 39 جاستا:
مەنىڭ كۇيەۋىم بۇل قىزمەتكە اسا جاقسى قاراي بەرمەيدى. ونىڭ وتباسىندا ەشكىم كلينينگ قولدانباعان، «باسقالار دا بارىنە ۇلگەرىپ ءجۇر عوي، ءبىز دە ىستەي الامىز» دەيدى. بىردە جوندەۋدەن كەيىن كلينينگ شاقىردىق، سول كەزدە عانا ريزا بولدى. ءبىراق كۇندەلىكتى نەمەسە اي سايىنعى تازالىققا كلينينگ شاقىرۋعا قارسى. «وزىڭە قيىن با؟» دەيدى. ال مەن ايىنا ءبىر رەت تولىق تازالاپ بەرۋگە شاقىرساق جەتكىلىكتى دەر ەدىم.
كامشات، 27 جاستا:
ءوز باسىم كلينينگكە وتە قارسىمىن، ال كۇيەۋىم كەرىسىنشە جاقسى كوزقاراستا. ۇيدە بوتەن ادامداردىڭ جۇرگەنىن، مەنىڭ دۇنيەلەرىمدى ۇستاعانىن ۇناتپايمىن. ءبىر رەت شاقىرىپ كوردىم، ساپاسى دا كوڭىلىمنەن شىقپادى، ودان كەيىن ءتىپتى بۇل تۋرالى ويلامايتىن دا بولدىم.
زارينا، 25 جاستا:
ءبىزدىڭ وتباسىمىزدا كلينينگكە دەگەن قارسىلىق جوق، ءبىراق ازىرگە بۇل قىزمەتتى قالتامىز كوتەرمەيدى، سەبەبى ءۇيىمىز ۇلكەن، ال مۇنداي ۇلكەن اۋماقتىڭ شارشى مەترىنە ەسەپەگەندە ايتارلىقتاي قىمباتقا شىعادى.
تايسيا، كلينينگ كومپانياسىنىڭ نەگىزىن قالاۋشى:
ءبىزدىڭ نەگىزگى كليەنتىمىز – ورتا تاپ وكىلدەرى. ولار – ۋاقىتى تاپشى، ءوز ەڭبەگىن باعالايتىن ادامدار. ءبىزدىڭ قىزمەتتى قالتاسى كوتەرمەيتىندەر كوبىنە ءۇيىن ءوزى جينايدى، ال اۋقاتتى ادامدار كوبىنە تۇراقتى ءۇي قىزمەتكەرلەرىن جالدايدى. ال جوندەۋدەن كەيىنگى تازالىققا كوپ وتباسى قارجىلىق جاعدايىنا قاراماستان كلينينگ شاقىرادى، سەبەبى ول – كۇردەلى، ارنايى قۇرال مەن ءبىلىمدى تالاپ ەتەتىن جۇمىس.
قازاقستاندا ءالى دە «پىسىق ايەل ءبارىن ءوزى ىستەۋى كەرەك» دەگەن كوزقاراس بار. ءبىراق مەگاپوليستەردە بۇل كوزقاراس بىرتىندەپ وزگەرىپ كەلەدى. قالادا ءومىر قاربالاس، كوپ ايەل ەرىمەن بىردەي جۇمىس ىستەيدى، سوندىقتان كلينينگ – ۇلكەن كومەك.
سۇرانىسقا كوپ يە بولعان قىزمەتىمىز – تولىق تازالاۋ. بۇل جۇمىس ءبىر كۇنگە سوزىلادى، ويتكەنى ۇيدەگى مۇلىك پەن قابىرعا تولىق تازالانادى.
قاۋىپسىزدىككە الاڭدايتىن كليەنتتەر ءۇشىن ءبىز جۇمىسقا كىرىسپەس بۇرىن كەلىسىمشارت جاسايمىز جانە مۇلىككە تولىق جاۋاپ بەرەمىز. سونىمەن قاتار، كلينەرلەر پاتەردەن شىعار الدىندا سومكەلەرىن اشىپ كورسەتەدى – بۇل سەنىمدىلىكتى ارتتىرادى.