مەملەكەتتىك كەڭەسشى ەرلان قارين كىتاپ وقۋ مادەنيەتىن دامىتۋ قاجەتىن جانە بۇل قوعامنىڭ ورتاق مىندەتى ەكەنىن ايتتى، - دەپ حابارلايدى aqshamnews.kz ءتىلشىسى.
بۇل تۋرالى ول الەۋمەتتىك جەلىدەگى جازباسىندا ءبولىستى.
"جۋىردا "جاس الاش" گازەتىندە جاريالانعان ءبىر ماتەريالعا كوزىم ءتۇستى. تاقىرىبى - "كىتاپ وقىمايتىن قوعام: جالعان ستاتيستيكاعا جاسىرىنعان شىندىق". تالقىعا باسپاگەر شىڭعىس مۇقان، جازۋشى-باسپاگەر ارمان المەنبەت، كىتاپحانا قىزمەتكەرى ايدوس بەكتۇرسىن ءۇن قوسىپتى. كوتەرىلگەن ماسەلە شىنىندا دا وزەكتى. جۇرتشىلىقتى، اسىرەسە جاس جەتكىنشەكتەردى الەۋمەتتىك جەلىنىڭ جەتەگىنە جىبەرمەي، كىتاپ وقۋعا باۋلۋ - بارىمىزگە ورتاق ءىس، ورتاق جاۋاپكەرشىلىك. سوندىقتان بۇل باعىتتاعى كەز-كەلگەن يدەيا، كەز-كەلگەن باستاما قولداۋعا لايىقتى. كىتاپ وقۋ مادەنيەتىن دامىتۋ، كىتاپقۇمار قوعامعا، وقۋ-بىلىمگە قۇشتار ۇلتقا اينالۋ - بۇگىنگى كۇننىڭ باستى تالابى. مەملەكەت باسشىسى ايتقانداي، "وزىق ويلى ۇلت بولۋدىڭ توتە جولى - كىتاپ وقۋ". بۇل - دالەلدەۋدى قاجەت ەتپەيتىن اكسيوما"، - دەدى ول.
سونىمەن قاتار، ەرلان قارين "مەملەكەت ەشكىمدى كىتاپ وقۋعا مىندەتتەي المايدى" دەگەن ۇستانىمىن دا ناقتى جەتكىزدى. ونىڭ پايىمىنشا، بيلىكتىڭ باستى مىندەتى - كىتاپ وقۋعا قولايلى العىشارتتار قالىپتاستىرۋ. ياعني، وقىرمان سۇرانىسىن قاناعاتتاندىراتىن ساپالى كىتاپتار شىعارۋ، شەتەلدىڭ ۇزدىك تۋىندىلارىن اۋدارۋ، وقۋ كەڭىستىگىن كەڭەيتۋ، ءبىلىم مەن كىتاپ وقۋدى ناسيحاتتاۋ، ىنتالاندىرۋ.
وسى رەتتە قارين كەيىنگى جىلدارى قولعا الىنعان ءبىرقاتار باستامانى اتاپ ءوتتى: پرەزيدەنت باستاماسىمەن 23 ءساۋىر ۇلتتىق كىتاپ كۇنى بولىپ بەكىتىلدى، ءاربىر قازاقستاندىق وقۋعا ءتيىس 100 كىتاپتىڭ ءتىزىمى جاسالدى، "بالالار كىتاپحاناسى" جوباسى ىسكە قوسىلدى، Amanat پارتياسى "كىتاپ-Amanat" جوباسىن جۇزەگە اسىرىپ جاتىر. الماتىداعى بىرنەشە كىتاپحانانىڭ وقۋ زالى تاۋلىك بويى - 24/7 رەجيمىندە جۇمىس ىستەي باستادى، سونداي-اق پرەزيدەنت يدەياسى بويىنشا تاۋلىك بويى جۇمىس ىستەيتىن زاماناۋي كىتاپحانانىڭ قۇرىلىسى جوسپارلانىپ وتىر.
مەملەكەتتىك كەڭەسشىنىڭ مالىمەتىنشە، بۇگىندە كوپشىلىككە ارنالعان كىتاپحانالاردىڭ قورىندا 72 ميلليوننان اسا قۇجات بار، بيىل ولاردىڭ قورى 1 029 568 جاڭا باسىلىممەن تولىققان. سيفرلى فورماتتاعى رەسۋرستار دا ارتىپ كەلەدى: كىتاپحانالاردا 2،2 ميلليوننان اسا ەلەكترون ءونىم تىركەلگەن، ونلاين وقۋعا ارنالعان ءتۇرلى پلاتفورمالار جۇمىس ىستەيدى.
"قىسقاسى، وقيمىن دەگەن جانعا مۇمكىندىك مول، ءتيىستى جاعداي جاسالعان. ەندى جاپپاي كىتاپ وقۋ مادەنيەتىن قالىپتاستىرساق نۇر ۇستىنە نۇر بولار ەدى"، - دەپ جازادى ەرلان قارين.
ونىڭ ايتۋىنشا، ەندىگى ماڭىزدى قادام - كىتاپقا قولجەتىمدىلىكپەن قاتار، قوعامدا كىتاپ وقۋدى مارتەبە ەتەتىن ورتا قالىپتاستىرۋ، كوپشىلىككە ۇلگى بولار وقىرمان بۋىنىن ءوسىرۋ.
"سوندىقتان قوعامدىق دەڭگەيدە كىتاپقا دەگەن قولجەتىمدىلىك پەن قىزىعۋشىلىقتى ارتتىرۋ، كوپشىلىككە ۇلگى بولاتىن وقىرماندار ورتاسىن قالىپتاستىرۋ ماڭىزدى. بۇل - بارىمىزگە ورتاق ءىس"، - دەپ تۇيىندەدى مەملەكەتتىك كەڭەسشى.