الماتى ينجەنەرلىك-كوممۋنيكاسيالىق ينفراقۇرىلىمدى جان-جاقتى جاڭارتۋدى قولعا الىپ، جىلۋ، ەلەكتر، سۋ قۇبىرى مەن كارىز جەلىسىن قايتا جاڭعىرتىپ، ستراتەگيالىق ماڭىزى بار سۋ قابىلداۋ نىساندارىن سالا باستادى. وڭىرلىك كوممۋنيكاسيالار قىزمەتىندە قالا اكىمىنىڭ ورىنباسارى الماسحان سماتلايەۆ وسىلاي دەپ، قالاداعى جۇيەلەردىڭ تۇراقتىلىعىن ارتتىرىپ، قىسقى كەزەڭگە قامدانۋ ءۇشىن بيىل ءبىراز جۇمىس بىتكەنىن اتاپ ءوتتى.
الماسحان سماتلايەۆتىڭ ايتۋىنشا، بيىل 39 شاقىرىم جىلۋ جەلىسى مەن 17 قازاندىق قايتا جاڭعىرتىلعان. بۇل جىلۋ جەلىلەرىنىڭ توزۋىن 56،1%-دان 54،3%-عا، قازاندىقتاردىڭ توزۋىن 65،1%-دان 62،1%-عا تومەندەتۋگە مۇمكىندىك بەردى. ەلەكتر جەلىسىن دە قاتار جاڭارتىپ جاتىر: 221 شاقىرىم جەلى جاڭارىپ، جىل سوڭىنا دەيىن بۇل كورسەتكىش 238 شاقىرىمعا جەتپەك.
330،7 شاقىرىم سۋ قۇبىرى دا سالىنىپ، 60 شاقىرىمى جاڭعىرعان. سونىڭ ارقاسىندا قۇبىردىڭ توزۋى بىلتىرعى 53،8%-بەن سالىستىرعاندا 51%-عا تومەندەدى. سۋ بۇرۋ جۇيەسىندە 306،4 شاقىرىم كارىز جەلىسى سالىنىپ، 5،5 شاقىرىمى جاڭاردى، بۇل دا توزۋ دەڭگەيىن 49،5%-عا تومەندەتىپ وتىر.
اكىمنىڭ ورىنباسارى جاڭا سۋ قابىلداۋ نىساندارىن سالۋعا ەرەكشە توقتالدى. ونىڭ ايتۋىنشا، «اكساي» سۋ قابىلداعىشى 95%-عا دايىن، ول باتىس پەن تاۋعا ىرگەلەس اۋداندارداعى شامامەن 140 مىڭ تۇرعىندى سۋمەن قامتاماسىز ەتەدى. جاۋىن-شاشىندى كەزەڭدەگى ىسكە قوسۋ-رەتتەۋ جۇمىسى اياقتالعاننان كەيىن، نىساندى 2026 جىلدىڭ مامىر ايىنا تامان ىسكە قوسپاق ويدا. «ەرمەنساي» سۋ قابىلداعىشى 2026 جىلدىڭ قاراشاسىندا اياقتالىپ، بوستاندىق اۋدانىنىڭ وڭتۇستىك-شىعىس بولىگىن سۋمەن قامتيتىن بولادى.
اپاتتىق جاعدايعا قاتىستى پىكىرىندە سماتلايەۆ 13 قاراشادا الاتاۋ اۋدانىنداعى جارىقتىڭ ءوشىپ قالعانىن دا مىسالعا كەلتىردى. گاز قۇبىرىن توسەۋ كەزىندە مەردىگەر 110 كۆ كابەلدى زاقىمداپ، 32 مىڭنان استام ادام جارىقسىز قالعان. الايدا اپات ءبىر تاۋلىكتە تولىق جويىلىپ، 64 ملن تەڭگە كولەمىندەگى شىعىندى كىنالى ۇيىم وتەيتىن بولىپ ۇيعارىلدى.
اكىمنىڭ ورىنباسارى مەردىگەرلەرگە باقىلاۋ كۇشەيىپ جاتقانىن اتاپ ءوتتى: ءبىراز كومپانيانىڭ ليسەنزياسى قايتارىپ الىندى، سوتقا 30 تالاپ-ارىز دايىندالىپ، ەندى بارلىعىن سالالىق باسقارمالارمەن كەلىسىپ ىستەمەكشى.
«ءبىز جۇمىستىڭ ساپاسى مەن مەرزىمىن قامتاماسىز ەتە الاتىن مىقتى، ءتارتىپتى مەردىگەرلەر پۋلىن قالىپتاستىرىپ جاتىرمىز. الماتىنىڭ ينفراقۇرىلىمى سەنىمدى ءارى كەلەسى ونداعان جىلعا ەسەپتەلگەن بولۋى ءتيىس»، – دەيدى اليحان سماتلايەۆ.