2026 جىلعا ارنالعان جەرگىلىكتى بيۋدجەتتىڭ كىرىسى 2،5 ترلن تەڭگە كولەمىندە جوسپارلانعان. بۇل تۋرالى قالا اكىمى دارحان ساتىبالدى ءماسليحاتتىڭ كەزەكتەن تىس XXIX سەسسياسىندا مالىمدەدى.
ونىڭ ايتۋىنشا، قالانىڭ ەكونوميكالىق وسىمىمەن بىرگە جەرگىلىكتى بيۋدجەتكە تۇسەتىن قاراجات تا تۇراقتى وڭ ديناميكا كورسەتىپ كەلەدى. بۇگىندە الماتى بيۋدجەتى نەگىزىنەن جەرگىلىكتى تۇسىمدەر ەسەبىنەن قالىپتاسادى. قالا رەسپۋبليكالىق بيۋدجەتتىڭ نەگىزگى دونورلارىنىڭ ءبىرى بولىپ قالا بەرەدى، جالپى كىرىستىڭ بەستەن بىرىنەن استامىن قامتاماسىز ەتىپ وتىر. سونىمەن قاتار، قالا بيۋدجەتىنەن الىناتىن قاراجات كولەمى ايتارلىقتاي ارتقان: 2025 جىلى 250 ملرد تەڭگەدەن 2026 جىلى 491 ملرد تەڭگەگە دەيىن وسەدى.
"جالپى، الداعى ءۇش جىلدا رەسپۋبليكالىق بيۋدجەتكە شامامەن 1،8 ترلن تەڭگە اۋدارىلادى. بۇل الدىڭعى ءۇش جىلدىق كەزەڭمەن سالىستىرعاندا 2،6 ەسە كوپ. قارجىلىق جۇكتەمەنىڭ ارتۋىنا قاراماستان، ءبىز جەرگىلىكتى بيۋدجەت قاراجاتى ەسەبىنەن، سونداي-اق قارىز تارتۋ ارقىلى اۋقىمدى ينۆەستيسيالىق جوبالاردى ىسكە اسىرۋدى باستايمىز"، - دەدى الماتى اكىمى.
2026 جىلى جەرگىلىكتى بيۋدجەتتىڭ شىعىسى 2،8 ترلن تەڭگە كولەمىندە جوسپارلانعان، ونىڭ ۇشتەن ءبىرى - 850 ملرد تەڭگە ەكونوميكالىق ءوسىمدى ىنتالاندىرۋعا باعىتتالادى.
"ايتا كەتۋ كەرەك، بيىل قازىرگى شىعىستاردى وڭتايلاندىرۋ جۇمىستارى جۇرگىزىلىپ، ونىڭ ناتيجەسىندە قاراجاتتى دامۋ بيۋدجەتىنە قايتا بولۋگە مۇمكىندىك تۋدى"، - دەپ ءسوزىن قورىتىندىلادى دارحان ساتىبالدى.