كىتاپ - اسىل قازىنا

ادەبي-تانىمدىق بايقاۋى ءوتىپ جاتىر

 بۇگىن الاتاۋ اۋدانىنداعى كرەاتيۆتىك ورتالىقتا «كىتاپ – اسىل قازىنا» دەپ اتالاتىن ادەبي بايقاۋ ءوتىپ جاتىر. الماتى قالالىق قوعامدىق دامۋ ورتالىعى باستاماسىمەن ۇيىمداستىرىلعان بۇل بايقاۋعا قالاداعى مەكتەپتەردىڭ جوعارى سىنىپ وقۋشىلارى مەن جوو ستۋدەنتتەرى قاتىسۋدا.

ادەبي-تانىمدىق ءىس-شارا قازاق ادەبيەتىنىڭ اسا كورنەكتى تۇلعالارى - اباي قۇنانبايەۆ- 180 جىل، ساپارعالي بەگالين- 130 جىل، ءسابيت مۇقانوۆ- 125 جىل، ءابۋ سارسەنبايەۆ- 120 جىل، ءىلياس ەسەنبەرلين- 110 جىل، مالىك عابدۋللين- 110 جىل مەرەيتويلارىنا ارنالعان. 
 

بايقاۋدا قازىلىق ەتۋگە بەلگىلى ساراپشىلار،  جۋرناليستەر، ونەر قايراتكەرلەرى شاقىرىلىپتى. 

مۇرات مۇقاش، جۋرناليستيكا ارداگەرى،  قازىلار القاسى مۇشەسى:
بۇگىنگى بايقاۋ جان-جاقتى ۇيىمداستىرىلىپتى. باستىسى كىتاپ وقيتىن، ونى تالداپ-تالقىلاۋعا بەيىمى بار جوعارعى سىنىپ وقۋشىلارى مەن ۋنيۆەرسيتەت ستۋدەنتتەرى كەلىپتى. وقۋ باعدارلاماسىنان بولەك، وسىنداي بايقاۋ، تۆورچەستۆولىق كەشتەر جاس بۋىننىڭ وزدەرىنىڭ دە شىعارماشىلىققا بەت بۇرۋىنا اسەر ەتەرى ءسوزسىز.  شىن مانىندە كىتاپ اسىل قازىنا.  كىتاپ وقىعان بۋىننىڭ بىلەتىنى كوپ، ءبىلىمى تەرەڭ بولادى . 

 گۇلشات كوپتىلەۋوۆا،  اباي اتىنداعى رەسپۋبليكالىق مەكتەپ وقۋشىسى،  بايقاۋعا قاتىسۋشى: 
ءبىز وسىنداي بايقاۋلار ارقىلى تانىمدىق-تاعىلىمدىعىمىزدى كەڭەيتىپ،  بىلەتىنىمىزدى جەتىلدىرەمىز. اسىرەسە،  شىعارماشىلىقپەن اينالىساتىندارعا مول مۇمكىندىك. الماتى باسشىلىعى مەملەكەتتىك ءتىلدىڭ ءورىسىن كەڭەيتەتىن وسىنداي ءىس شارالاردى ءجيى ۇيىمداستىرسا دەگەن تىلەك بار. 

بايقاۋ قورىتىندىسى بويىنشا جەڭىمپازدارعا ارنايى ديپلومدار، العىس حاتتار،  سىيلىقتار بەرىلەدى.