الماتىدا مەدەۋ اۋدانىنىڭ سيفرلىق كەڭسەسىندە «شەكسىز ونەر» جاڭا ارت-جوباسىنىڭ اياسىندا «شەكسىز الەم» كوميكسىنىڭ كورمەسى اشىلدى. جوبانىڭ باستاماشىلارى – Almaty سreative كرەاتيۆتى يندۋستريالاردى دامىتۋ ورتالىعى مەن مەدەۋ اۋدانىنىڭ سيفرلىق كەڭسەسى.
فرانسۋز اليانسى ۇسىنعان «شەكسىز الەم» كوميكسىنىڭ كورمەسى ەكسپرەسسيۆتى ۆيزۋالدى ءتىل ارقىلى ءبىزدىڭ پلانەتامىزدىڭ ەكولوگياسى مەن بولاشاعى تۋرالى ماسەلەنى كوتەرەدى. كورمەنىڭ ادام اياعى كوپ جۇرەتىن حالىققا قىزمەت كورسەتۋ ورتالىعىندا اشىلعانى قۇپتارلىق. وندا كەزەك كۇتىپ وتىرعان ادامدار ۋاقىتىن بوسقا وتكىزبەي، ءبىر ءسات عالامدىق ماسەلەگە كوڭىل اۋدارىپ، وعان كورمەدە ۇسىنىلعان سۋرەتتەر ارقىلى ۇڭىلەتىن بولادى.
Almaty سreative كرەاتيۆتى يندۋستريالاردى دامىتۋ ورتالىعى مەن مەدەۋ اۋدانىنىڭ سيفرلىق كەڭسەسى ءبىر عيماراتتا ورنالاسقان، ياعني بىر-بىرىنە كورشى. سوندىقتان ولار نيەت، تىلەك، كۇش بىرىكتىرىپ، وسىنداي «شەكسىز ونەر» باستاماسىن بىرگە قولعا الىپ وتىر. بۇل ونەر مەن تەحنولوگيا، مەملەكەتتىك قىزمەتتەر مەن شىعارماشىلىق يندۋستريالار ءوزارا ارەكەتتەسۋدىڭ جاڭا فورماتتارىن قۇرا وتىرىپ، بىر-بىرىمەن قاتار ءومىر ءسۇرىپ، تولىقتىرا الادى دەگەن يدەيانىڭ تابيعي جالعاسى ىسپەتتەس دەيدى ۇيىمداستىرۋشىلار.
– «شەكسىز الەم» البومى ايگىلى فرانسۋز كوميكس اۆتورى كريستوف بلەن مەن كليمات سالاسىنا ماماندانعان جان-مارك جانكوۆيچيدىڭ تانىستىعىنىڭ ناتيجەسىندە پايدا بولعان. بۇل كوميكس كليماتتىڭ وزگەرۋىنىڭ سەبەپتەرى مەن سالدارىن تەرەڭ ءارى جەڭىل تۇردە باياندايدى. 2021 جىلى جارىق كورگەن ساتتەن باستاپ ۇلكەن جەتىستىككە جەتكەن كوميكس بۇگىندە بىرنەشە تىلگە اۋدارىلىپ، 2022 جىلى فرانسيادا 500 مىڭ دانامەن ساتىلىپ، بەستسەللەر اتاندى.
فرانسيا ينستيتۋتى بۇل كوميكستى ەكولوگيالىق كورمەگە اينالدىرۋ تۋرالى شەشىم قابىلداپ، ناتيجەسىندە فرانسۋز اليانسى مەن Almaty Creative كرەاتيۆتى يندۋستريالاردى دامىتۋ ورتالىعى بىرلەسىپ بۇگىنگى كورمەنى ۇسىندىق. بۇل كورمە كوميكستىڭ نەگىزگى تاقىرىپتارىن – ەنەرگەتيكا مەن كليمات تۋرالى وزەكتى تاقىرىپتى قوزعايدى، – دەيدى جوبا جەتەكشىسى، Almaty Creative كرەاتيۆتى يندۋستريالاردى دامىتۋ ورتالىعى سالالىق دامۋ دەپارتامەنتىنىڭ باسشىسى شولپان ماحمۋدوۆا.