بۇگىن الماتىدا تەراپيەۆت، پۋلمونولوگ، دەرماتولوگ، ريەۆماتولوگ، جالپى پراكتيكا دارىگەرلەرىنىڭ قاتىسۋىمەن VIII حالىقارالىق ريەۆماتولوگتار كونگرەسى جۇمىسىن باستادى.
كونگرەستى ق ر دەنساۋلىق ساقتاۋ مينيسترلىگىنىڭ قولداۋىمەن كارديولوگيا جانە ىشكى اۋرۋلار عزي، رەسپۋبليكالىق ريەۆماتولوگيالىق ورتالىق جانە قازاق ريەۆماتولوگيا القاسى ۇيىمداستىردى، دەپ حابارلايدى aqshamnews.kz.
«ءبىزدىڭ ينستيتۋت بازاسىندا ءۇشىنشى دەڭگەيدەگى ريەۆماتولوگيا ورتالىعىنىڭ قۇرىلۋىنا بايلانىستى بۇگىنگى ءىس-شارا اسا ماڭىزدى بولىپ وتىر. بۇل ريەۆماتولوگيالىق اۋرۋلارى بار پاسيەنتتەرگە مامانداندىرىلعان كومەكتى دامىتۋدا، سونداي-اق قازاقستاننىڭ ريەۆماتولوگيالىق قىزمەتىنىڭ عىلىمي-ادىستەمەلىك جانە ۇيىمداستىرۋشىلىق ءرولىن نىعايتۋدا ماڭىزدى قادام. ءبىز جاڭا ورتالىق دياگنوستيكا مەن ەمدەۋدىڭ وزىق تەحنولوگيالارىن ەنگىزۋگە، حالىقارالىق ىنتىماقتاستىقتى كەڭەيتۋگە جانە جوعارى بىلىكتى مامانداردى دايارلاۋعا ىقپال ەتەتىن كلينيكالىق، عىلىمي جانە ءبىلىم بەرۋ پلاتفورماسىنا اينالاتىنىنا سەنىمدىمىز»، – دەدى كارديولوگيا جانە ىشكى اۋرۋلار عزي باسقارما ءتوراعاسىنىڭ عىلىمي-كلينيكالىق جانە يننوۆاسيالىق قىزمەت جونىندەگى ورىنباسارى جاميليا قايبۋللايەۆا.
”ريەۆماتولوگيالىق اۋرۋلار، وكىنىشكە وراي، جاستار اراسىندا دا كەڭ تارالۋدا. بۇل اۋرۋلار ادامدى مۇگەدەكتىككە، مەزگىلسىز ءولىم قاۋپىنە اكەلۋى دە مۇمكىن. سوندىقتان اۋىر زاردابى تيەتىن كەسەلدەردى ەرتەرەك انىقتاۋ، ناتيجەلى ەمدەۋ ءۇشىن جاڭا يننوۆاسيالار ەنگىزىلۋدە. بۇگىنگى كۇنى وڭىرلەردە دە ريەۆماتولوگيالىق ورتالىقتار قۇرۋدىڭ ماڭىزى زور”، – دەپ اتاپ ءوتتى ق ر دەنساۋلىق ساقتاۋ مينيسترلىگىنىڭ شتاتتان تىس باس ريەۆماتولوگى، رەسپۋبليكالىق ريەۆماتولوگيا ورتالىعىنىڭ باسشىسى، قازاق ريەۆماتولوگيا القاسىنىڭ پرەزيدەنتى عالىمجان توعىزبايەۆ.
ءيا، قازاقستاندا دا، الەمدە دە ريەۆماتولوگيالىق اۋرۋلارى بار ناۋقاستاردىڭ سانى ءوسۋ ۇستىندە. بۇل اۋرۋلاردىڭ كوپشىلىگى اۋتويممۋندى. ولار يممۋنيتەتتىڭ دۇرىس جۇمىس ىستەمەۋىنەن تۋىندايدى. ولار جۇيەلىك دەپ اتالادى. ويتكەنى بىردەن بىرنەشە مۇشەنى قامتيدى. بارلىق دەرلىك تىندەر پروسەسكە قاتىسادى، ءبىراق بۋىندار، بۇيرەك، تەرى، مي، قان تامىرلارى ەڭ كوپ زارداپ شەگەدى. بۇل اۋرۋلار اداممەن ءومىرىنىڭ سوڭىنا دەيىن قالادى. ءبىراق بۇعان ۇكىم رەتىندە قاراۋدىڭ قاجەتى جوق. ءيا، بۇرىن ريەۆماتولوگيالىق اۋرۋلاردان كوپ ادام مۇگەدەك بولىپ قالاتىن، ءومىرى دە قىسقا بولاتىن. ال بۇگىندە ادامنىڭ ۇزاق ءومىر سۇرۋگە مۇمكىندىگى بار دەيدى ساراپشىلار.
ەكى كۇندىك كونگرەستە پلەنارلىق وتىرىس، تاقىرىپتىق سەكسيالار جانە ساتەلليت شەڭبەرىندە ريەۆماتولوگيا، پۋلمونولوگيا، دەرماتولوگيا، قوعامدىق دەنساۋلىق ساقتاۋ سالاسىنداعى 35 جەتەكشى شەتەلدىك جانە وتاندىق ساراپشى، سونىمەن قاتار جاس عالىمدار كلينيكالىق كەيستەرمەن عىلىمي باياندامالار جاسايدى. جۇيەلى قىزىل جەگى، ريەۆماتويدتى ارتريت، پوداگرا، پسوريازدى ارتريت، وستەوپوروز جانە وستەوارتريتتى ەمدەۋ، ونىڭ ىشىندە جاڭا گەندىك-ينجەنەرلىك بيولوگيالىق پرەپاراتتاردى قولدانۋ بويىنشا جاڭارتىلعان حالىقارالىق كلينيكالىق ۇسىنىستار ۇسىنىلادى.
كونگرەسس قاتىسۋشىلارىنا بەلگىلەنگەن ۇلگىدەگى سەرتيفيكاتتار بەرىلەدى.