كاسپيي تەڭىزىنىڭ قازاقستاندىق اكۆاتورياسىنداعى سولتۇستىك بولىگى تارتىلىپ بارادى.
بۇل تۋرالى «قازاقستان عارىش ساپارى» ۇك» اق-نىڭ باسپا ءسوز قىزمەتى حابارلادى. مالىمەتكە سۇيەنسەك، عارىشتان جۇرگىزىلگەن مونيتورينگ كاسپيي تەڭىزىنىڭ تارتىلۋ اۋقىمىن كورسەتىپ وتىر، دەپ حابارلايدى Almaty-akshamy.kz Elorda.info-عا سىلتەمە جاساپ.
«تاريحي كەزەڭ ىشىندەگى (15 جىل) ءارتۇرلى ۋاقىتتاعى عارىشتىق ءتۇسىرىلىم دەرەكتەرى بويىنشا كاسپيي تەڭىزىنىڭ جاعدايىنا مونيتورينگ جۇرگىزىلدى. عارىشتىق تۇسىرىلىمدەردىڭ مۇراعات دەرەكتەرىنە سايكەس، قازاقستان اكۆاتورياسىنىڭ سولتۇستىك بولىگىندە تەڭىز ءتۇبى كورىندى. كاسپيي تەڭىزى تارتىلىپ بارادى. جەردى قاشىقتىقتان زوندتاۋ دەرەكتەرى بويىنشا سوڭعى 15 جىلدا كاسپيي تەڭىزىنىڭ قازاقستاندىق سەكتورىنىڭ اكۆاتورياسى ايتارلىقتاي (7،1%-عا) قىسقاردى»، -دەلىنگەن كومپانيا تاراتقان مالىمەتتە.
سوىنمەن قاتار عىلىمي ورتالىق شەكاراداعى 2008-2023 جىلدار ارالىعىنداعى سۋ بەتىنىڭ اۋدانىنداعى وزگەرىستەر ديناميكاسىن جاريالادى.
«كاسپيي تەڭىزىنىڭ قازاقستاندىق سەكتورىنىڭ سۋ بەتى اۋدانى 2008 جىلى 113 866،67 شارشى شاقىرىمدى، 2023 جىلى بۇل كورسەتكىش 105 745،23 شارشى شاقىرىمدى قۇرادى. 15 جىل ىشىندە ءارتۇرلى ۋاقىتتا تۇسىرىلگەن عارىشتىق سۋرەتتەردىڭ ءاناليزى سۋ بەتى اۋدانىنىڭ ازايعانىن انىقتادى. ءبىراق، تەڭىز دەڭگەيى تومەندەگەنى دە مۇمكىن، بۇل جان-جاقتى كەشەندى زەرتتەۋدى قاجەت ەتەدى. كاسپيي تەڭىزى دەڭگەيىنىڭ تومەندەۋى ەكوجۇيەگە دە، تەڭىز شارۋاشىلىعىنا دا اسەر ەتەتىن ءبىرقاتار جاعىمسىز سالدارعا اكەلۋى مۇمكىن. جقز مالىمەتتەرىنە سايكەس ەڭ وسال ورىن اتىراۋ قالاسىنا جاقىن جەردەگى كاسپيي تەڭىزىنىڭ قازاقستاندىق بولىگى بولىپ تابىلادى»، - دەپ جازدى «قازاقستان عارىش ساپارى» ۇك» اق-نىڭ باسپا ءسوز قىزمەتى