ءتۇپقاراعان تۇبەگىنىڭ جاعالاۋىندا 4-5 قاراشا كۇندەرى 121 ءولى يتبالىقتىڭ دەنەسى تابىلدى.
گيدروبيولوگيا جانە ەكولوگيا ينستيتۋتىنىڭ مامانى اسەل بايمۇقانوۆانىڭ ايتۋىنشا، ماڭعىستاۋ وبلىسىنداعى ءتۇپقاراعان تۇبەگىنىڭ جاعالاۋىنان 27 قىركۇيەك پەن 30 قازان ارالىعىندا بارلىعى 305 يتبالىقتىڭ ولەكسەسى انىقتالعان.
اسەل بايمۋكانوۆانىڭ مالىمەتىنشە، ون يتبالىقتىڭ ولەكسەسىندە مەحانيكالىق جاراقاتتار، كەسىلگەن ىزدەر، تور مەن ارقانعا ورالۋ بەلگىلەرى بولعان. ءبىر ولەكسەدە باسى جوق بولعان.
«بۇل جاراقاتتاردىڭ كەيبىرى كەزدەيسوق بولعانىمەن، باسىم بولىگى زاڭسىز اۋلاۋدىڭ ناتيجەسى بولۋى مۇمكىن»، — دەپ ءتۇسىندىردى زەرتتەۋشى.
يتبالىقتاردىڭ كوپشىلىگىندە زورلىق-زومبىلىقتان ولگەن بەلگى بايقالماعان. زەرتتەۋ توبى ۇلگىلەردى الىپ ۇلگەرگەنىمەن، جانۋارلاردىڭ دەنەلەرى قاتتى ءشىرىپ كەتكەندىكتەن، تولىق تالداۋ جاساۋ مۇمكىن ەمەس.
«ەڭ الاڭداتاتىنى، زەرتتەلگەن انالىق يتبالىقتاردىڭ جارتىسىنان استامى بۋاز بولعان، ال بارلىق يتبالىقتار سەمىز ەدى. بۇل ولاردىڭ ولەر الدىندا جاس ءارى ومىرشەڭ بولعانىن كورسەتەدى. ولىمدەرى تابيعي ەمەس، كەنەتتەن بولعان ءتارىزدى»، — دەيدى اسەل بايمۇقانوۆا.
يتبالىقتار سولتۇستىك كاسپييگە كوبەيۋ ءۇشىن ميگراسيا جاساپ جاتقان كەزدە قىرىلعان. جانۋارلاردىڭ جاپپاي قىرىلۋىنا نە سەبەپ بولعانى ازىرگە بەلگىسىز: بۇل جەر سىلكىنىسىنىڭ اسەرى، تابيعي گازدىڭ ءبولىنۋى، تەڭىز سۋلارىنىڭ لاستانۋى نەمەسە ەپيدەميا بولۋى مۇمكىن.
ەستەرڭىزگە سالا كەتسەك بۇعان دەيىن ءتۇپقاراعان اۋدانىنىڭ باۋتين اۋماعىندا 151 يتبالىقتىڭ ولەكسەسى تابىلعانىن جازعان بولاتىنبىز.