كاسىپكەرگە قاجەت قوسىمشا

مەملەكەتتىك كىرىستەر كوميتەتىمەن «e-Salyq Business» ءموبيلدى قوسىمشاسى  ازىرلەنىپ، 2022 جىلدىڭ 1 قاڭتارىنان باستاپ ىسكە قوسىلدى.  جاڭا سيفرلىق شەشىم جەكە كاسىپكەرلەرگە  سالىق مىندەتتەمەسىن ورىنداۋدى جەڭىلدەتەدى، ول، اسىرەسە، جاڭادان تىركەلگەن كاسىپكەرلەرگە ىڭعايلى، دەپ حابارلايدى اlmaty-akshamy.kz قارجى مينيسترلىگىنىڭ مەملەكەتتىك كىرىستەر كوميتەتىنە سىلتەمە جاساپ.

سالىق كودەكسىنىڭ اعىمداعى جىلدان باستاپ قولدانىسقا ەنگىزىلگەن ەرەجەلەرىنە سايكەس، اتالعان قوسىمشا ارناۋلى ءموبيلدى قوسىمشانى پايدالانۋمەن نەمەسە وڭايلاتىلعان دەكلاراسيا نەگىزىندە ارناۋلى سالىق رەجيمىن قولداناتىن دارا كاسىپكەرلەردىڭ سالىق مىندەتتەمەلەرى مەن الەۋمەتتىك تولەمدەر بويىنشا مىندەتتەمەلەرىن ورىنداۋىن وڭايلاتۋعا ارنالعان. 

بۇدان باسقا، كوميتەت پاتەنت نەگىزىندە ارناۋلى سالىق رەجيمىن قولداناتىن كاسىپكەرلەرگە ارنالعان قوسىمشانىڭ فۋنكسيونالىن پيلوتتىق جوبا شەڭبەرىندە قولدانۋ مۇمكىندىگىن كوزدەيتىن قازاقستان رەسپۋبليكاسى قارجى ءمينيسترىنىڭ بۇيرىق جوباسىن ازىرلەدى.

قازىرگى ۋاقىتتا بۇيرىق جوباسى ۇسىنىستاردى، ونىڭ ىشىندە «اتامەكەن» ق ر ۇلتتىق كاسىپكەرلەر پالاتاسىنان الىنعان ۇسىنىستاردى، سونداي-اق جوباعا سىبايلاس جەمقورلىققا قارسى ساراپتاما جۇرگىزۋ قورىتىندىلارى بويىنشا ەسكەرتۋلەردى ەسكەرە وتىرىپ پىسىقتالادى.

قوسىمشانىڭ فۋنكسيونالى جەكە كاسىپكەر رەتىندە تىركەلۋگە، سالىق رەجيمىن تاڭداۋعا جانە وزگەرتۋگە، چەكتەر بەرۋگە، كىرىستەر ءتىزىلىمىن قالىپتاستىرۋعا جانە سالىق جانە الەۋمەتتىك تولەمدەر بويىنشا مىندەتتەمەلەردى قوسىمشامەن اۆتوماتتى تۇردە ەسەپتەۋ ءۇشىن قىزمەتكەرلەردىڭ كىرىستەرىنىڭ ەسەبىن جۇرگىزۋگە جانە وڭايلاتىلعان دەكلاراسيانىڭ ءتيىستى جولدارىن تولتىرۋعا مۇمكىندىك بەرەدى. پاتەنت نەگىزىندە ارناۋلى سالىق رەجيمىن قولداناتىن كاسىپكەرلەر «e-Salyq Business» ءموبيلدى قوسىمشاسىنىڭ پايدالانۋشىلارى بولا وتىرىپ، پاتەنت قۇنىنىڭ ەسەپ-قيسابىن ۇسىنۋدان جانە تابىس العانعا دەيىن الدىن الا (اۆانسپەن) سالىق جانە الەۋمەتتىك تولەمدەردى تولەۋدەن بوساتىلادى، - دەلىنگەن اقپاراتتا.

قوسىمشامەن ەسەپتەلگەن جەكە تابىس جانە الەۋمەتتىك سالىق سوماسىن ەلەكتروندىق ۇكىمەتتىڭ تولەم شليۋزىندە جاريالانعان حالىق بانكىنىڭ سەرۆيسىمەن ينتەگراسيانى پايدالانا وتىرىپ، تىكەلەي ءموبيلدى قوسىمشادا تولەۋگە بولادى.

بۇدان باسقا، كاسىپكەرلەردىڭ ىڭعايلىلىعى ءۇشىن قوسىمشادا سالىق ءاميانىنىڭ سەرۆيستەرى (ونىڭ ىشىندە بەرەشەكتى قاراۋ جانە وتەۋ، ارتىق تولەمدى باسقارۋ بويىنشا)، مەملەكەتتىك كىرىستەر ورگاندارىنىڭ ءبىرقاتار حابارلامالارىن الۋ، سونداي-اق، جەكە كاسىپكەر قىزمەتىن وڭايلاتىلعان تارتىپپەن توقتاتۋ سەرۆيسى قولجەتىمدى. قوسىمشا «Play Market»، «App Store»  جانە «App Gallery» الاڭدارىندا قولجەتىمدى.

قوسىمشا مۇمكىندىگىنە قاراي اعىمداعى جىلى دا فۋنكسيونالىن كەڭەيتۋ بولىگىندە، ونىڭ ىشىندە وتكەن جىلدىڭ سوڭىندا اقمولا جانە جامبىل وبلىستارىندا وتكىزىلگەن پيلوتتىق جوباعا قاتىسقان كاسىپكەرلەردىڭ ۇسىنىستارى بويىنشا جەتىلدىرىلەتىن بولادى. مىسال رەتىندە، اعىمداعى جىلى جەكە كاسىپكەر قىزمەتكەرلەرىمەن ەڭبەك شارتتارىن ەسەپكە الۋ بويىنشا ەڭبەك جانە حالىقتى الەۋمەتتىك قورعاۋ مينيسترلىگىنىڭ ءتيىستى اقپاراتتىق جۇيەسىمەن ەڭبەك شارتتارى بويىنشا اقپارات الماسۋ بويىنشا  جۇمىستار جۇرگىزۋ جوسپارلانعان.