قازاقستان رەسپۋبليكاسىنىڭ ۇلتتىق كىتاپحاناسىندا مادەني ماڭىزى زور تاعىلىمدى شارا ءوتتى. تاۋەلسىزدىك كۇنى قارساڭىندا ۇيىمداستىرىلعان سالتاناتتى راسىمدە مەملەكەتتىك اكادەميالىق ناتاليا ساس اتىنداعى بالالار مەن جاسوسپىرىمدەرگە ارنالعان ورىس تەاترى ءوزىنىڭ باي تاريحىن قامتىعان بىرەگەي كىتاپتاردى ۇلتتىق كىتاپحانا قورىنا تابىستادى. بۇل شارا ءبىر مەزەتتە ەكى ماڭىزدى مەرەيتويدى توعىستىردى.
بيىل – قازاقستانداعى تۇڭعىش كاسىبي بالالار تەاترى سانالاتىن تەاتر ساستىڭ 80 جىلدىعى، سونداي-اق ۇلتتىق كىتاپحانانىڭ 115 جىلدىعى اتالىپ وتۋدە. وسى ايتۋلى كۇن اياسىندا تەاتر ۇجىمى ءوز تاريحىن، شىعارماشىلىق جولىن، ساحنالىق ءداستۇرىن باياندايتىن ارنايى باسىلىمنىڭ ءۇش داناسىن ۇلتتىق قورعا ماڭگىلىك ساقتاۋعا بەردى.
قازاقستان رەسپۋبليكاسىنىڭ ۇلتتىق كىتاپحاناسىنىڭ ديرەكتورى عازيزا نۇرعالييەۆا بۇل تارتۋدىڭ ماڭىزىن ەرەكشە اتاپ ءوتتى. ونىڭ ايتۋىنشا، تەاتر تاريحىنا ارنالعان مۇنداي باسىلىمدار - تەك ونەر شەجىرەسى عانا ەمەس، ەلدىڭ مادەني جادىنىڭ اجىراماس بولىگى.
– بۇل كىتاپتار زەرتتەۋشىلەرگە، ستۋدەنتتەرگە جانە ونەرسۇيەر قاۋىمعا باعا جەتپەس رۋحاني قازىنا بولماق. ۇلتتىق كىتاپحانا ءۇشىن وسىنداي مادەني مۇرانى ساقتاۋ – باستى مىندەتتەردىڭ ءبىرى. بارشاڭىزدى مەرەيتويمەن قۇتتىقتايمىن. شىعارماشىلىق تابىس تىلەيمىن. كىتاپتى ازىرلەۋ مەن ونى ۇلتتىق قورعا تابىستاۋ جولىنداعى ەڭبەكتەرىڭىز ءۇشىن زور العىسىمدى بىلدىرەمىن، – دەدى ول.
شاراعا تەاتر ساستىڭ تانىمال ونەر وكىلدەرى دە قاتىسىپ، تەاتر تاريحىنان سىر شەرتتى. قازاقستاننىڭ ەڭبەك سىڭىرگەن ءارتىسى تاتيانا تارسكايا مەن قازاقستاننىڭ حالىق ءارتىسى ولگا كورجيەۆا تەاتردىڭ قالىپتاسۋ جولىنداعى قيىندىقتار مەن شىعارماشىلىق جەتىستىكتەرگە توقتالسا، «قۇرمەت» وردەنىنىڭ يەگەرى، اكتەر ماحسات ساحي ۇلى بۇل كىتاپتاردىڭ جاس ۇرپاق ءۇشىن تاربيەلىك ءمانى زور ەكەنىنە توقتالا كەتتى :
– وسىدان ون بەس جىل بۇرىن مەن دە وسى كىتاپحاناعا ءجيى كەلەتىنمىن. ابايدىڭ كرىلوۆتان اۋدارعان مىسالدارىن ءدال وسى جەردەن الىپ، وقىپ، جازىپ، دايىندالدىم. ونەر اكادەمياسىنا ءتۇسۋ ءۇشىن كىتاپ ىزدەپ، ولەڭ، پروزا، پوەزيا، ءتۇرلى مىسالداردى وسى كىتاپحانادان تاپتىم. ول كەزدە مۇنداعى تىنىشتىق پەن ەرەكشە اتموسفەرا ادامنىڭ بويىنا ءبىلىم مەن جاۋاپكەرشىلىكتى سىڭىرەتىن. بۇل – بۇگىنگى جاستار ءۇشىن اسا قاجەت دۇنيە. ءقازىر ءبارى سيفرلاندىرىلعانىمەن، كىتاپحاناداعى رۋحاني ورتا ەشقاشان ءوز ماڭىزىن جوعالتپايدى، – دەدى اكتەر.
كىتاپتاردىڭ ۇلتتىق كىتاپحانا قورىنا تاپسىرىلۋى – ونەر مەن ءبىلىمنىڭ، ساحنا مەن كىتاپحانانىڭ ءوزارا ۇندەستىگىن كورسەتكەن سيمۆولدىق ساتكە اينالدى. بۇل باستاما ۇرپاقتار ساباقتاستىعىن ساقتاپ، مادەني مۇرانى كەلەر بۋىنعا امان جەتكىزۋگە باعىتتالعان ماڭىزدى قادام ەكەنى انىق.
ايتا كەتۋ كەرەك، اتالعان كىتاپتار ەندى ۇلتتىق كىتاپحانانىڭ سيرەك قورىندا ساقتالىپ، تەاتر تاريحىنا قىزىعۋشىلىق تانىتقان بارشا وقىرمان مەن زەرتتەۋشىگە قولجەتىمدى بولادى.