كولىك مينيسترلىگى اقىلى جولداردا تولەم جاساۋ ءتارتىبىن جاڭارتۋدى جوسپارلاپ وتىر. جاڭا وزگەرىستەر جۇرگىزۋشىلەرگە تولەمدى ۋاقىتىندا وتەۋگە كوبىرەك مۇمكىندىك بەرىپ، ايىپپۇلعا ىلىگۋ ءقاۋپىن ازايتۋدى كوزدەيدى، دەپ حابارلايدى AqshamNews.kz ءتىلشىسى.
كولىك مينيسترلىگىنىڭ حابارلاۋىنشا، ءقازىر قولدانىستاعى ەرەجە بويىنشا جۇرگىزۋشى اقىلى جول اقىسىن 7 كۇنتىزبەلىك كۇن ىشىندە تولەمەسە، 8-كۇنى ماتەريالدار اقبتك تالاپتارىنا ساي كولىك باقىلاۋ ورگاندارىنا جولدانادى.
الداعى ۋاقىتتا بۇل ءتارتىپ جەڭىلدەتىلەدى: ەندى جەكە تۇلعالارعا تولەم جاساۋعا 30 كۇنتىزبەلىك كۇن بەرىلەدى. ەگەر جولاقى پايدالانعان كۇننەن باستاپ 30 كۇن ىشىندە تولەنبەسە، ماتەريالدار 31-كۇنى كولىك باقىلاۋ ورگاندارىنا جىبەرىلمەك.
سونىمەن قاتار جاڭا ەرەجەدە زاڭدى تۇلعالار ءۇشىن بولەك مەحانيزم ەنگىزىلەدى. ەگەر زاڭدى تۇلعا ەسەپتىك كەزەڭ اياقتالعاننان كەيىنگى ايدىڭ 20-سىنا دەيىن تولەم جاساماسا، ماتەريالدار كەلەسى كۇنى كولىك باقىلاۋ ورگاندارىنا جولدانادى.
مينيسترلىك بۇل وزگەرىستەر تولەم پروسەسىن بارىنشا ىڭعايلى ءارى تۇسىنىكتى ەتىپ، تولەم مەرزىمىن ۇلعايتۋعا جانە وبەكتيۆتى سەبەپتەرمەن كەشىككەن جاعدايدا اكىمشىلىك جاۋاپكەرشىلىككە تارتىلۋ تاۋەكەلىن تومەندەتۋگە باعىتتالعانىن اتاپ ءوتتى.