وقۋشىلار سارايىنىڭ ۇلكەن كونسەرت زالىندا بەلگىلى مەملەكەت جانە قوعام قايراتكەرى كاكىمبەك سالىقوۆتىڭ ءومىرى مەن قىزمەتىنە ارنالعان تاعىلىمدى كەش ءوتتى. جيىندى مەدەۋ اۋدانىنىڭ اكىمدىگى، «AMANAT» پارتياسى، ءبىرقاتار مۇددەلى ۇيىمدار مەن «جاس ۇرپاق» اقپاراتتىق-اعارتۋشىلىق، پاتريوتتىق ورتالىعى ۇيىمداستىردى.
«جاس ۇرپاق» ءاقپاراتتىق-بىلىم بەرۋ پاتريوتتىق ورتالىعى ۇيىمداستىرىپ وتىرعان جيىنعا بەلگىلى عالىم-ادەبيەتتانۋشى، فيلولوگيا عىلىمدارىنىڭ كانديداتى، الماتى قالاسى اكىم اپپاراتىنىڭ ادەپ جونىندەگى ۋاكىلى ماماي احەتوۆ، مەملەكەتتىك جانە جەرگىلىكتى باسقارۋ ينستيتۋتىنىڭ رەكتورى، پروفەسسور، «ءماسليحات جانە اكىمدىك» جۋرنالىنىڭ باس رەداكتورى ابكەن توقتىبەكوۆ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ارداگەرلەر كەڭەسىنىڭ ءتوراعاسى بەرىكجان ايتقۇل ۇلى، مەدەۋ اۋدانى ارداگەرلەر كەڭەسىنىڭ ءتوراعاسى الماس تىلەۋبايەۆ، «AMANAT» پارتياسى الماتى قالالىق فيليالى ءتوراعاسىنىڭ ورىنباسارى قۋانىش تەلەپوۆ قاتىستى.
باسقوسۋدى «جاس ۇرپاق» ورتالىعىنىڭ ءتوراعاسى باحتيار كامال ۇلى اشىپ، جۇرگىزىپ وتىردى.
جالپى، اتالمىش باسقوسۋ وسىمەن بەسىنشى مارتە ءوتىپ وتىر. بۇل وتىرىستىڭ باستى ماقساتى – وقۋشى جاستاردى كورنەكتى تۇلعالاردى تاۋەلسىز قازاقستاننىڭ قالىپتاسۋى مەن دامۋىنا قوسقان ۇلەسىمەن تانىستىرىپ، جاس ۇرپاقتىڭ بويىندا پاتريوتيزم سەزىمىن، ازاماتتىق جاۋاپكەرشىلىكتى جانە ەلىمىزدىڭ تاريحي مۇراسىنا دەگەن قۇرمەتتى قالىپتاستىرۋ.
«جاس ۇرپاق» اقپاراتتىق-اعارتۋشىلىق، پاتريوتتىق ورتالىعى مەملەكەت دامۋىنا ەلەۋلى ۇلەس قوسقان قوعام قايراتكەرلەرىنىڭ ءومىر جولى مەن قوعامدىق قىزمەتىن ناسيحاتتاۋ، سونداي-اق وقۋشى جاستار اراسىندا ورنىقتى رۋحاني-ادامگەرشىلىك قۇندىلىقتاردى قالىپتاستىرۋ باعىتىنداعى جۇمىستاردى جالعاستىرا بەرەتىن بولادى. بۇل رەتتە باحتيار كامالوۆ بىلاي دەيدى:
"ءبىزدىڭ پاتريوتتىق ورتالىعىمىزدىڭ باستى ماقساتى – ەلىمىزدىڭ دامۋىنا ولشەۋسىز ۇلەس قوسقان تۇلعالاردىڭ ءومىر جولىمەن، ەڭبەگىمەن، مەملەكەتكە سىڭىرگەن قىزمەتىمەن جاستاردى تانىستىرۋ. ويتكەنى ءبارىمىز جاقسى بىلەمىز، تۇلعاسىز تاريح جاسالمايدى. تاريحتى تۇلعا ارقىلى تانيمىز. سوندىقتان ءبىز جاس ۇرپاقتى مەملەكەت جانە قوعام قايراتكەرلەرىنىڭ ومىربايانىمەن، ەلگە دەگەن ادالدىعىمەن، ەڭبەكتەگى تابىستارىمەن تەرەڭىرەك تانىستىرۋدى كوزدەپ وتىرمىز. «AMANAT» پارتياسىمەن بىرلەسە وتىرىپ، ءبىز جاستارعا پاتريوتتىق تاربيە بەرۋ باعىتىندا جۇيەلى وقىتۋ جۇمىستارىن جالعاستىراتىن بولامىز"، دەيدى ول.
وسىدان كەيىن جينالعاندار كاكىمبەك سالىق ۇلى تۋرالى دەرەكتى ءفيلمدى تاماشالادى.
«جاس ۇرپاق» ورتالىعى حالقىمىزدىڭ ءبىرتۋار تۇلعالارى باۋىرجان مومىش ۇلى، ءاليحان بوكەيحان، سونداي-اق باسقا دا ۇلى قايراتكەرلەردىڭ ءومىر جولىمەن تانىستىرۋدى جوسپارلاپ وتىر.