الماتىنىڭ رۋحاني ومىرىندە تاعى ءبىر ماڭىزدى قادام جاسالدى. تاۋەلسىزدىك كۇنى قارساڭىندا قالادا وقىرماندارعا ارنالعان جاڭا، زاماناۋي كىتاپحانا سالتاناتتى تۇردە اشىلدى.
جاڭا مادەني نىساننىڭ اشىلۋ راسىمىنە الماتى قالاسى اكىمىنىڭ ورىنباسارى ابزال نۇكەنوۆ قاتىسىپ، قالا تۇرعىندارىن مەرەكەمەن قۇتتىقتادى. ول كىتاپحانانىڭ تەك ءبىلىم ورداسى عانا ەمەس، قالا ءومىرىنىڭ ماڭىزدى رۋحاني كەڭىستىگىنە اينالاتىنىن اتاپ ءوتتى.
جاڭا كىتاپحانا قالا اكىمدىگى مەن مادەنيەت باسقارماسىنىڭ قولداۋىمەن ىسكە قوسىلدى. بۇل – الماتىداعى 29-شى كىتاپحانا. ول سيفرلىق تەحنولوگيا مەن ۇلتتىق رۋحاني مۇرانى ۇشتاستىرعان زاماناۋي فورماتتا جۇمىس ىستەيدى. كىتاپحانا بارلىق جاستاعى تۇرعىندارعا، سونىڭ ىشىندە مۇمكىندىگى شەكتەۋلى جاندارعا تولىق قولجەتىمدى.
الماتى قالاسى مادەنيەت باسقارماسىنىڭ باسشىسى دانيار الييەۆتىڭ ايتۋىنشا، جاڭا كىتاپحانا تاۋەلسىزدىك مەرەكەسى قارساڭىندا اشىلىپ وتىر.
"بۇگىندە قالا بويىنشا 28 كىتاپحانا جۇمىس ىستەيدى، ال بۇل – 29-شى. كىتاپحانا بوستاندىق اۋدانىندا، قولايلى جەردە ورنالاسقان. مۇندا بالالارعا ارنالعان ارنايى ايماق، ستۋدەنتتەرگە ارنالعان زالدار، جينالىس پەن كەزدەسۋلەر وتكىزەتىن بولمەلەر، جوعارى جىلدامدىقتى ينتەرنەت زالدارى بار. كىتاپ قورى – 20 مىڭنان اسادى. جىل سوڭىنا دەيىن تاعى ەكى كىتاپحانا اشۋ جوسپارلانىپ وتىر. كەلەسى جىلى دا بۇل جۇمىس جالعاسىن تابادى"، – دەدى ول.
كىتاپحانانىڭ جالپى اۋماعى شامامەن 500 شارشى مەتردەن اسادى. نىسان ينكليۋزيۆتى تالاپتارعا تولىق ساي جابدىقتالعان. مۇندا وقۋ زالى، كونفەرەنس-زال، ارنايى جۇمىس ورىندارى قاراستىرىلعان. كىتاپحانا كەلۋشىلەرگە تەگىن Wi-Fi قىزمەتىن ۇسىنادى.
ورتالىقتاندىرىلعان كىتاپحانا جۇيەسىنىڭ ديرەكتورى مەيرام بەكتەنبايەۆتىڭ ايتۋىنشا، بۇل فيليال قالا تۇرعىندارى ءۇشىن جاڭا مادەني ورتالىققا اينالماق.
"كىتاپحانا بارلىق ساناتتاعى تۇرعىندارعا ارنالعان. مۇندا كىتاپ وقۋعا، كونفەرەنسيالار مەن كەزدەسۋلەر وتكىزۋگە، بالالاردى الىپ كەلۋگە مۇمكىندىك بار. كىتاپحانا اپتانىڭ جەتى كۇنى، تاڭعى 9:00-دەن كەشكى 20:00-گە دەيىن جۇمىس ىستەيدى. قور جىل سايىن تولىقتىرىلىپ وتىرادى"، – دەدى ول.
جاڭا كىتاپحانا – الماتىنىڭ مادەني ءومىرىن بايىتىپ، قالا تۇرعىندارىنا ءبىلىم مەن شابىت سىيلايتىن تاعى ءبىر ماڭىزدى رۋحاني وشاق.