Primeminister.kz سايتىنىڭ رەداكسياسى مەملەكەت باسشىسىنىڭ جولداۋىندا بەلگىلەنگەن قازاقستاندىقتاردىڭ تۇرمىس ساپاسىن جاقسارتۋعا، ەلىمىزدىڭ ۇزاقمەرزىمدى الەۋمەتتىك-ەكونوميكالىق ماقساتتارىنا قول جەتكىزۋگە باعىتتالعان نەگىزگى باسىمدىقتار مەن شارالار بويىنشا جىل قورىتىندىسىنا ارنالعان شولۋلار توپتاماسىن ۇسىنۋدى جالعاستىرادى.
اۋىل شارۋاشىلىعى – ەكونوميكانىڭ ماڭىزدى سالالارىنىڭ ءبىرى. بۇگىندە حالىقتىڭ 37%-دان استامى اۋىلدىق جەرلەردە تۇرادى، ال اۋىل شارۋاشىلىعى ءوندىرىسىنىڭ دامۋ دەڭگەيى قازاقستاندىقتاردىڭ كوپشىلىگىنىڭ ءال-اۋقاتىنا تىكەلەي اسەر ەتەدى. ەلىمىز كەڭ بايتاق اۋماعى مەن قوماقتى رەسۋرستارىنىڭ بولۋى ارقاسىندا ۇلكەن الەۋەتكە يە. مەملەكەت جەڭىلدەتىلگەن قارجىلاندىرۋ مەن سۋبسيديالار بەرۋ ارقىلى اتالعان سەكتوردى بەلسەندى تۇردە قولدايدى، سونداي-اق اۋىلشارۋاشىلىق تەحنيكاسىنىڭ ءوندىرىسى مەن ليزينگى كولەمىنىڭ ءوسۋىن ىنتالاندىرادى. اتالعان شارانىڭ بارلىعى ءوز ناتيجەسىن بەرۋدە: بيىل ەلىمىزدىڭ ديحاندارى ءداندى داقىلدار جيناۋدان رەكوردتىق كورسەتكىشكە قول جەتكىزدى.
ەگىن جيناۋ ناۋقانى
بيىل كوكتەمگى ەگىس جانە كۇزگى جيىن-تەرىم جۇمىستارىن تابىستى جۇرگىزۋگە قاجەتتى بارلىق جاعداي جاسالدى. پرەزيدەنت تاپسىرمالارىن ورىنداۋ اياسىندا اگروونەركاسىپ كەشەنىن (اوك) قارجىلاندىرۋدىڭ قولجەتىمدىلىگى قامتاماسىز ەتىلدى. سالانى جەڭىلدىكتى قارجىلاندىرۋ كولەمى العاش رەت رەكوردتىق 580 ملرد تەڭگەنى قۇراپ، بۇل قاراجات ەگىنشىلەرگە تىكەلەي نەسيە بەرۋ، پايىزدىق مولشەرلەمەنى تومەندەدىپ، فورۆاردتىق ساتىپ الۋعا باعىتتالدى. 2025 جىلى قارجىلاندىرۋ كولەمىن 700 ملرد تەڭگەگە دەيىن جەتكىزۋ جوسپارلانىپ وتىر. قولايلى كۇزگى اۋا رايى ەگىن جيناۋ كەزىندەگى جاۋىن-شاشىنعا قاراماستان، ناۋقاندى ايتارلىقتاي شىعىنسىز وتكىزۋگە مۇمكىندىك بەردى.
ناتيجەسىندە، رەسپۋبليكا ەگىنشىلەرى ءداندى داقىلدار بويىنشا رەكوردتىق كولەمدە ءونىم جينادى: ورتاشا ونىمدىلىك گەكتارىنا 16،1 سەنتنەر، 26،7 ملن توننا استىق باستىرىلدى. 2023 جىلى ورتاشا ونىمدىلىك 10 س/گا قۇراعان بولاتىن. سونىمەن قاتار 3،2 ملن توننا مايلى داقىل (ونىمدىلىك 10،9 س/گا)، 2،9 ملن توننا كارتوپ، 3،9 ملن توننا كوكونىس جانە 2،6 ملن توننا باقشا داقىلدارى جينالدى.
اگروتەحنولوگيالاردى دۇرىس قولدانۋ، ساپالى تۇقىمدار، مينەرالدى تىڭايتقىشتار جانە وسىمدىكتەردى ءتيىمدى قورعاۋدىڭ ارقاسىندا جوعارى ونىمدىلىككە قول جەتكىزىلدى.
الداعى ۋاقىتتا اۋىل شارۋاشىلىعى داقىلدارىن ءارتاراپتاندىرۋ جۇمىستارى جالعاسىن تابادى. پرەزيدەنت تاپسىرمالارى بويىنشا ازىرلەنگەن جول كارتاسى اياسىندا 2024–2028 جىلدار ارالىعىندا اۋىل شارۋاشىلىعىنىڭ جالپى ءونىم كولەمىن ەكى ەسەگە ارتتىرۋ مىندەتى قويىلدى. جالپى، قازاقستان رەسپۋبليكاسىنىڭ اگروونەركاسىپ كەشەنىن دامىتۋدىڭ 2021–2030 جىلدارعا ارنالعان تۇجىرىمداماسى شەڭبەرىندە 2030 جىلعا قاراي بيداي ونىمدىلىگىن گەكتارىنا 20 سەنتنەرگە دەيىن ارتتىرۋ جوسپارلانىپ وتىر. ايتا كەتۋ كەرەك، مەملەكەت باسشىسىنىڭ تاپسىرماسى بويىنشا 2025 جىلعا ارنالعان كوكتەمگى ەگىس جانە كۇزگى جيىن-تەرىم جۇمىستارىن قارجىلاندىرۋ بيىلدىڭ وزىندە باستالىپ كەتتى.
استىق قابىلداۋ
وبلىس اكىمدىكتەرىنىڭ دەرەكتەرى بويىنشا، رەسپۋبليكاداعى استىق ساقتاۋ قويمالارىنىڭ جالپى سىيىمدىلىعى 30 ملن توننانى قۇرايدى. اتاپ ايتقاندا، قولدانىستاعى ليسەنزيالانعان استىق قابىلداۋ كاسىپورىندارىندا – 12،7 ملن توننا، ال اۋىل شارۋاشىلىعى تاۋارىن وندىرۋشىلەردە – 17،4 ملن توننا استىق ساقتالادى. كورسەتىلگەن قۋاتتىلىق كولەمى وتكەن جىلداردان قالعان قورلاردى ەسكەرە وتىرىپ، جينالعان ءونىمدى ساقتاۋعا جەتكىلىكتى.
استىق قابىلداۋ كاسىپورىندارىنا شامامەن 7،9 ملن توننا استىق تاپسىرىلدى، ونىڭ 5،7 ملن تونناسى – بيداي. قالعان استىق ەگىنشىلەر قويمالارىندا ساقتالۋدا. قازىرگى ۋاقىتتا ليسەنزيالانعان ەليەۆاتورلار جۇكتەمەسى 44%-دى قۇرايدى. جاڭا ءونىمدى قابىلداۋ ءۇشىن ەليەۆاتورلاردى بوساتۋ ماقساتىندا استىقتى تاسىمالداۋ جانە وتكىزۋ جۇمىستارى جالعاسۋدا. تامىز ايىنان قاراشاعا دەيىن 3،5 ملن توننا استىق تاسىمالداندى.
ەگىس القاپتارىن ءارتاراپتاندىرۋ
قازاقستان اۋىل شارۋاشىلىعىنىڭ ۇلكەن الەۋەتىنە يە، بۇل ەلىمىزدىڭ ءارتاراپتاندىرىلعان جانە ينكليۋزيۆتى ەكونوميكالىق وسۋىنە ىقپال ەتە الادى. نەگىزگى ارتىقشىلىقتارىنىڭ ءبىرى – كەڭ بايتاق اۋماق، حالىق تىعىزدىعىنىڭ تومەندىگى جانە ۇلكەن اۋىل شارۋاشىلىعى جەرلەرىنىڭ بولۋى. رەسپۋبليكادا ءوندىرىستى سۇرانىسقا ساي بولۋىن قامتاماسىز ەتۋ، سونداي-اق وسىرىلەتىن داقىلداردىڭ بيولوگيالىق قاجەتتىلىكتەرىن جەرگىلىكتى اگروكليماتتىق جانە تابيعي جاعدايلارعا نەعۇرلىم كوبىرەك سايكەستەندىرۋگە باعىتتالعان اۋىل شارۋاشىلىعى داقىلدارىن ءارتاراپتاندىرۋ بويىنشا شارالار قابىلدانۋدا.
2024 جىلى جالپى ەگىس كولەمى 23،3 ملن گەكتاردى قۇرادى، ونىڭ 21،1 ملن گەكتارى – جازدىق ەگىس. وتكەن جىلمەن سالىستىرعاندا بيداي القابى 560،9 مىڭ گەكتارعا قىسقارىپ، 13،1 ملن گەكتاردى قۇرادى. مايلى داقىلدار كولەمى 135،5 مىڭ گەكتارعا ۇلعايىپ، 2،9 ملن گەكتارعا جەتتى.
سونىمەن قاتار قانت قىزىلشاسى القاپتارىن (5،5 مىڭ گەكتارعا ارتتىرىپ، ناتيجەسىندە 25،2 مىڭ گەكتارعا دەيىن) ۇلعايتۋ جانە ىلعالسۇيگىش داقىلدار: ماقتا (10 مىڭ گا) جانە كۇرىش (2،2 مىڭ گا) القاپتارىن قىسقارتۋ بويىنشا جۇمىستار جۇرگىزىلدى.
ناتيجەسىندە، قىسقارتىلعان القاپتاردا الەۋمەتتىك ماڭىزى بار جانە جوعارى رەنتابەلدى داقىلداردىڭ ەگىس القاپتارى ارتادى. سونداي-اق وڭىرلەردە بەرىك جەم-شوپ بازاسىن قۇرۋ ماقساتىندا جەمدىك داقىلداردىڭ ەگىس القاپتارىن ۇلعايتۋ جۇمىستارى جۇرگىزىلدى. اۋىل شارۋاشىلىعى داقىلدارىن ءارتاراپتاندىرۋ جۇمىستارى الداعى ۋاقىتتا دا جالعاسادى.
ونىمدەردى وتكىزۋ
قازاقستان جىل سايىن 8-9 ملن توننا استىق ەكسپورتتايدى، ونىڭ ىشىندە 6،5-7،5 ملن تونناسى – بيداي. ەكسپورت گەوگرافياسى 40-تان استام ەلدى قامتيدى. ءداستۇرلى نارىقتار – ورتالىق ازيا ەلدەرى، اۋعانستان، جۇڭگو، تۇركيا، يران، يتاليا، تۋنيس. بيىلعى قاراشا ايىنىڭ سوڭىنا دەيىن 6،3 ملن توننا استىق ەكسپورتتالدى. جاڭا ءونىمدى ەكسپورتتاۋ كولەمى 2،37 ملن توننا، بۇل – 2023 جىلدىڭ سايكەس كەزەڭىمەن سالىستىرعاندا 52%-عا ارتىق.
وزبەكستانعا جەتكىزىلىمدەر كولەمى 42%-عا ءوسىپ، 944 مىڭ توننانى قۇرادى، وتكەن جىلى بۇل كورسەتكىش 665 مىڭ توننا بولعان ەدى. تاجىكستانعا جەتكىزىلىم 2023 جىلعى 254 مىڭ توننادان 49%-عا ارتىپ، بيىل 377 مىڭ تونناعا دەيىن جەتتى. قىتايعا ەكسپورت كولەمى 17%-عا ارتىپ، 355 مىڭ تونناعا جەتتى (وتكەن جىلى 304 مىڭ توننا)، اۋعانستانعا جەتكىزىلىمدەر كولەمى 71%-عا ۇلعايىپ، 115 مىڭ توننانى قۇرادى (وتكەن جىلى 67 مىڭ توننا بولعان). يرانعا ەكسپورت كولەمى 30 ەسەگە دەيىن – 10 مىڭ توننادان 299 مىڭ تونناعا ارتتى.
بيىل ەكسپورتتىق الەۋەت 12 ملن تونناعا جەتەدى دەپ بولجانۋدا. نەگىزگى نارىقتار – ورتالىق ازيا ەلدەرى، جۇڭگو، اۋعانستان، يتاليا جانە باسقا ەلدەر. سونداي-اق ازەربايجان، اۋعانستان (تۇركمەنستان ارقىلى ترانزيتپەن)، يران، يراك، سولتۇستىك افريكا ەلدەرى مەن ەۋروپالىق وداققا قارا جانە بالتىق تەڭىزدەرى ارقىلى جەتكىزىلەتىن استىقتى 2 ملن تونناعا دەيىنگى كولەمدە تاسىمالداۋدى ۇيىمداستىرۋ ماسەلەسى پىسىقتالۋدا.
جۇمىستىڭ تيىمدىلىگىن ارتتىرۋ ءۇشىن قازاقستاندا استىقتى تاسىمالداۋدى جوسپارلاۋ ءۇشىن جەدەل استىق شتابىن قۇرۋ جۇمىستارى باستالدى. ەكسپورت گەوگرافياسىن كەڭەيتۋ ماقساتىندا حالىقارالىق دالىزدەر قۇرۋ جونىندەگى جوبالار ىسكە اسىرىلىپ جاتىر.
سونىمەن قاتار نارىققا رەتتەۋشى ىقپال تيگىزۋ ماقساتىندا «ازىق-تۇلىك كورپوراسياسى» ۇك» اق ەگىنشىلەردەن استىق ساتىپ الۋ شارالارىن قابىلدايدى. مەملەكەت باسشىسىنىڭ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا بەرگەن تاپسىرمالارىن ورىنداۋ اياسىندا جاڭا ءونىمدى تىكەلەي ساتىپ الۋ جۇزەگە اسىرىلادى. ءبىرىنشى كەزەڭدە ۇكىمەت رەزەرۆىنەن 10 ملرد تەڭگە كولەمىندە قارجى ءبولۋ ارقىلى 150 مىڭ توننا ءونىمدى نارىقتىق باعامەن ساتىپ الۋ ۇسىنىلىپ وتىر. استىقتىڭ العاشقى ساتىپ الۋى شاعىن شارۋا قوجالىقتارىنان جۇزەگە اسىرىلادى، بۇل ءونىمنىڭ ءادىل باعامەن ساتىلۋىن قامتاماسىز ەتەدى. سونداي-اق ارتىق استىقتى ساتىپ الۋ تەتىگىن ەنگىزۋ ارقىلى ىشكى نارىقتاعى باعا جاعدايىنا دەلدالدار ىقپالىن بارىنشا ازايتۋ كوزدەلىپ وتىر. «ازىق-تۇلىك كورپوراسياسى» بەلگىلەنگەن ستاندارتتار مەن ساپا تالاپتارىن ساقتاي وتىرىپ، استىقتى اۋىل شارۋاشىلىعى تاۋارىن وندىرۋشىلەردەن كونكۋرستىق شارتتارمەن ساتىپ الادى.
تىڭايتقىشتاردى سۋبسيديالاۋ
تىڭايتقىشتار نارىعىندا ەڭ كوپ تارالعان اممياك سەليتراسى، امموفوس، كارباميد(نەسەپنار)، اممونيي سۋلفاتى، سۋلفوامموفوس جانە NPK (ازوت،فوسفور،كاليي). سونىمەن قاتار اممونيي نيتراتى مەن امموفوس جالپى تۇتىنۋدىڭ 60%-دان استامىن قۇرايدى.
قازاقستاندا تىڭايتقىشتاردىڭ ءۇش ءتۇرى بويىنشا تولىق وندىرىستىك سيكل قۇرىلعان: اممياك سەليتراسى «قازازوت» اق-دا، امموفوس – «قازفوسفات» جشس-دا، اممونيي سۋلفاتى – «قازازوت» اق-دا جانە «Qarmet» جشس-دا وندىرىلەدى. تىڭايتقىشتارعا عىلىمي قاجەتتىلىك فيزيكالىق سالماقتا 3،2 ملن توننانى قۇرايدى، ال وتاندىق وندىرۋشىلەر قۋاتى وسى قاجەتتىلىكتىڭ 56%-ىن، شامامەن 1،8 ملن توننانى قۇرايدى (ونىڭ ىشىندە «قازازوت» اق 420 مىڭ توننانى، ال «قازفوسفات» ج ش س 1 ملن توننانى وندىرەدى).
قازىرگى ۋاقىتتا قازاقستاندا سۋبسيديالاردى 60%-عا دەيىن ۇلعايتا وتىرىپ، اۆانستىق وتىنىمدەردى قاراۋعا باسىمدىقپەن، وتاندىق تىڭايتقىشتاردى اۆانستىق سۋبسيديالاۋ تەتىگى ەنگىزىلدى. سونداي-اق 1 گەكتار ەگىستىك القابىنا تىڭايتقىش ەنگىزۋ نورماسى دا ۇلعايتىلدى، بۇل توپىراقتى نەگىزگى قورەكتىك زاتتارمەن تولىقتىرادى. وبلىس اكىمدىكتەرى كەپىلدىگىمەن وتاندىق وندىرۋشىلەر تىڭايتقىشتار تولەمى ءۇشىن شارۋلارعا ءبولىپ تولەۋمەن قامتاماسىز ەتەدى.
بيىلعى 1 جەلتوقسانىنداعى جاعدايعا سايكەس، شارۋالار 1،3 ملن توننا تىڭايتقىش ەنگىزدى، بۇل 2023 جىلمەن سالىستىرعاندا ەكى ەسە كوپ. شارۋالاردىڭ سۋبسيديالارعا دەگەن قاجەتتىلىكتەرىن تولىق قاناعاتتاندىرۋ ماقساتىندا تىڭايتقىشتاردى سۋبسيديالاۋعا قوسىمشا قاراجات ءبولۋ جوسپارلانىپ وتىر.
سونداي-اق ءونىم تۇرلەرىن كەڭەيتە وتىرىپ، مينەرالدى تىڭايتقىشتار ءوندىرىسى كولەمىن ۇلعايتۋ جوسپارلانۋدا. تىڭايتقىش وندىرۋشىلەردى جىلجىمالى قۇراممەن ۋاقتىلى قامتاماسىز ەتۋگە نازار اۋدارىلادى.
نەسيە قاراجاتتارىنىڭ قولجەتىمدىلىگىن ارتتىرۋدىڭ ماڭىزدى قۇرالى – سىياقى مولشەرلەمەلەرىن سۋبسيديالاۋ. بۇل اۋىل شارۋاشىلىعى تاۋارىن وندىرۋشىلەردىڭ تولەم قابىلەتتىلىگىن ارتتىرۋعا، نەسيەنىڭ قايتارىلماۋ ءقاۋپىن ازايتۋعا جانە اگروبيزنەستىڭ نەسيەلىك جۇكتەمەسىن جەڭىلدەتۋگە ىقپال ەتەدى.
بيىل سالاداعى نەسيە قۇنىن تومەندەتۋ تاسىلدەرى قايتا قارالدى. العاش رەت التى تاراتۋ ارناسىن پايدالانا وتىرىپ، دالا جۇمىستارىن قارجىلاندىرۋ ءۇشىن باسەكەلەستىك جاعداي جاسالدى، ال اگرارلىق نەسيە كورپوراسياسىنىڭ تاراپىنان قارجىلاندىرۋ كولەمى 82،3 ملرد تەڭگەنى قۇرادى
كەپىلمەن قامتاماسىز ەتۋدىڭ جەتكىلىكسىزدىگى ماسەلەسىن شەشۋ ءۇشىن «دامۋ» كاسىپكەرلىكتى دامىتۋ قورى نەسيە سوماسىنىڭ 85%-ىن جاباتىن قارىزدارعا كەپىلدىك بەرۋ تەتىگىن ەنگىزدى. سونداي-اق اينالىم قاراجاتىن الەۋمەتتىك-كاسىپكەرلىك كورپوراسيالار ارقىلى تولىقتىرۋ ماقساتىندا وڭدەۋ كاسىپورىندارىن جەڭىلدىكپەن قارجىلاندىرۋ باعدارلاماسى دا ازىرلەندى، ول ەگىن مەن شيكىزاتتى وتكىزۋدى قامتاماسىز ەتۋگە، سونداي-اق وتاندىق قايتا وڭدەۋ زاۋىتتارىنىڭ جۇكتەمەسىن ۇلعايتۋعا باعىتتالعان.
مال شارۋاشىلىعىن دامىتۋ
بيىلعى 1 قاراشاداعى جاعداي بويىنشا، وتكەن جىلدىڭ سايكەس كەزەڭىمەن سالىستىرعاندا ەلىمىزدىڭ اۋىل شارۋاشىلىعىندا مال باسى مەن قۇس سانى ارتتى. ءىرى قارا مال (ءىقم) – 8،2 ملن باس (120،6%)، ونىڭ ىشىندە سيىر – 4،4 ملن باس (123،3%)، جىلقى – 4،1 ملن باس (104،9%)، تۇيە – 2،8 ملن باس (104،7%). ءسۇت ءوندىرىسى 3 ملن تونناعا (104،2%) جەتتى، ونىڭ 1 ملن تونناسى (107،5%) اۋىل شارۋاشىلىعى قۇرىلىمدارىندا ءوندىرىلدى.
تاۋىق جۇمىرتقاسىن ءوندىرۋ 3،7 ملرد داناعا دەيىن (100،9%) جەتتى، ونىڭ ىشىندە اۋىل شارۋاشىلىعى قۇرىلىمدارىندا 3،1 ملرد داناعا دەيىن (101،5%) ۇلعايدى.
جەرگىلىكتى اتقارۋشى ورگاندار دەرەكتەرىنە سايكەس، رەسپۋبليكا بويىنشا 2024-2025 جىلدارداعى قىستاۋ كەزەڭىندە 35،2 ملن توننا ءشوپ نەمەسە جوسپاردىڭ 143،9%-ى، 2 ملن توننا پىشەن نە جوسپاردىڭ 117،9%-ى، 5،1 ملن توننا سابان نەمەسە جوسپاردىڭ 111،9%-ى، 2،3 ملن توننا سۇرلەم نەمەسە جوسپاردىڭ 117،9%-ى، سونداي-اق 5،8 ملن توننا جەم نە جوسپاردىڭ 104،4%-ى دايىندالدى.
دايىندالعان مال ازىعىنىڭ كورسەتىلگەن كولەمى ءونىم مەن ءتول الۋدىڭ جوسپارلى كولەمىن، جالپى مال باسىنىڭ ساقتالۋىن، تولىققاندى ازىقتاندىرۋدى قامتاماسىز ەتۋگە مۇمكىندىك بەرەدى.
اۋىل شارۋاشىلىعى تەحنيكاسىن جاڭارتۋ
2024 جىلى 7 جىل مەرزىمگە جىلدىق 5%-دىق مولشەرلەمەمەن 120 ميلليارد تەڭگەگە اۋقىمدى جەڭىلدىكتى ليزينگ باعدارلاماسى ىسكە قوسىلدى. 2024 جىلدىڭ 1 جەلتوقسانىنداعى جاعداي بويىنشا شارۋالار 212،9 ملرد تەڭگەگە 9 887 تەحنيكانى ليزينگكە الدى، بۇل 2023 جىلدىڭ سايكەس كەزەڭىمەن سالىستىرعاندا 50%-عا ارتىق.
كەلەسى جىلى جەڭىلدەتىلگەن ليزينگ باعدارلاماسىنا 200 ملرد تەڭگەگە دەيىن، ال مەملەكەت باسشىسىنىڭ تاپسىرماسىنا سايكەس، باعدارلاما بيۋدجەتىن 450 ملرد تەڭگەگە دەيىن جەتكىزۋ جوسپارلانىپ وتىر. بۇل اۋىل شارۋاشىلىعى تەحنيكاسى پاركىن جاڭارتۋدا وڭ ءوسۋ ديناميكاسىن قامتاماسىز ەتەدى.
بۇگىنگى تاڭدا قازاقستاندا 149،9 مىڭ تراكتور، 38،7 مىڭ كومباين، 5 مىڭ ەگىس كەشەنى، 76،4 مىڭ تۇقىم سەپكىش جانە 219 مىڭعا جۋىق توپىراق وڭدەيتىن جانە مامانداندىرىلعان تەحنيكا بار. سوڭعى 8 جىلدا اۋىل شارۋاشىلىعى تەحنيكاسىن جاڭارتۋ دەڭگەيى وڭ ديناميكا كورسەتتى: 2017 جىلعى 1،9%-دان 2023 جىلى 4،5%-عا دەيىن (ەكى ەسە)، تەحنولوگيالىق جاڭارتۋ نورماسى 8-10%.
بيىل اۋىل شارۋاشىلىعى تەحنيكاسىن سۋبسيديالاۋدىڭ جاڭا تەتىگى ەنگىزىلدى:
-
قازاقستاندا ءوندىرىسى جولعا قويىلعان تەحنيكانىڭ يمپورتتىق انالوگتارىن سۋبسيديالاۋ مۇمكىندىگى الىنىپ تاستالدى؛
-
وتاندىق وندىرىستەگى اۋىل شارۋاشىلىعى تەحنيكاسى ءۇشىن جوعارى نورماتيۆ سۋبسيديالانادى – 30%؛
-
اۋىل شارۋاشىلىعى تەحنيكاسىن ساتىپ الۋعا نەسيەلەر/ليزينگ بويىنشا سىياقى مولشەرلەمەلەرىن سۋبسيديالاۋدىڭ سارالانعان تەتىگى قولدانىلدى: وتاندىق ءوندىرىس تەحنيكاسى ءۇشىن سىياقى مولشەرلەمەسى 6%-عا دەيىن، يمپورتتىق تەحنيكا ءۇشىن 15%-عا دەيىن سۋبسيديالانادى.
-
قازاقستاندا ءوندىرىسى جولعا قويىلماعان مامانداندىرىلعان تەحنيكا ءۇشىن (مىسالى، ماقتا، كارتوپ جيناۋ ءۇشىن) سۋبسيديا ءنورماتيۆى 25%–عا.، ال قانت قىزىلشاسىن جيناۋ تەحنيكاسى ءۇشىن 50%-عا دەيىن قۇرايدى.
جاڭا تاسىلدەر قوسىمشا بيۋدجەت قاراجاتىن تارتپاي-اق وتاندىق اۋىل شارۋاشىلىعى تەحنيكاسىن سۋبسيديالاۋ كولەمىن ەكى ەسەگە ارتتىرۋعا مۇمكىندىك بەرەدى.