الماتى وبلىستىق مىندەتتى الەۋمەتتىك مەديسينالىق ساقتاندىرۋ قورىنىڭ فيليالى 2025 جىلعى 29 جەلتوقساندا ءمامس جارنالارىنىڭ قايدا تۇسەتىنى جانە مەديسينالىق قىزمەتتەردى پايدالانباعان جاعدايدا ولارمەن نە بولاتىنى جونىندە ءتۇسىندىردى، دەپ حابارلايدى aqshamnews.kz
قوردىڭ حابارلاۋىنشا، مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى ىنتىماقتاسقان سيپاتتا بولىپ، جەكە جيناق شوتتارىن قاراستىرمايدى.
"بارلىق جارنالار مەن اۋدارىمدار ۇلتتىق بانكتەگى بىرەگەي ارنايى شوتقا تۇسەدى. سول شوتتان ولار ءار اي سايىن ءمامس بويىنشا مەديسينالىق قىزمەت كورسەتكەن ۇيىمدارعا تولەنەدى. ياعني، قاراجات نەگىزىنەن ءمامس بويىنشا ەمدەلگەن ناۋقاستار ءۇشىن پايدالانىلادى. بۇل ءار ازاماتتىڭ مەديسينالىق كومەك الۋ كولەمىن شەكتەمەي قامتاماسىز ەتۋ ءۇشىن جاسالعان، سەبەبى كەيبىر مەديسينالىق قىزمەتتەردىڭ قۇنى بىرنەشە ءجۇز مىڭنان ميلليون تەڭگەگە دەيىن جەتۋى مۇمكىن. مۇنداي قىزمەتتى جەكە جارنالار ەسەبىنەن تولەۋ مۇمكىن ەمەس، ويتكەنى جىلدىق ەڭ جوعارى جارنا كولەمى 204 000 تەڭگەدەن اسپايدى"، – دەپ ءتۇسىندىردى فيليال وكىلدەرى.
جىل سوڭىندا بىرەگەي شوتتا قالعان ءمامس قاراجاتتارى كەلەسى جىلعا اۋىسىپ، جىلدىڭ باسىندا مەديسينالىق ۇيىمدارعا الدىن الا تولەم رەتىندە جىبەرىلەدى.
ءمامس-تىڭ ىنتىماقتاسقان جۇيەسى – ازاماتتارعا قور قاراجاتىن دارى-دارمەك نەمەسە باسقا قاجەتتىلىكتەرگە پايدالانۋعا بەرىلمەيتىن سەبەپتەردىڭ ءبىرى. الايدا بولاشاقتا امبۋلاتوريالىق دارى-دارمەكپەن قامتاماسىز ەتۋ شەڭبەرىندە دارىلەر ءۇشىن قوسىمشا تولەم ەنگىزۋ جوسپارلانىپ وتىر.