1500-دەن استام اسكەري قىزمەتشى العاش رەت سەكىردى.
پاراشيۋتپەن سەكىرۋ – دەسانتشىلاردىڭ جاۋىنگەرلىك دايىندىعىنىڭ ماڭىزدى ەلەمەنتى. سوڭعى ەكى ايدىڭ وزىندە اسكەري-كولىكتىك اۆياسيانىڭ س-295 ۇشاقتارىمەن جانە ارميالىق اۆياسيانىڭ مي-17 تىكۇشاقتارىمەن قازاقستاندىق دەسانتشىلار 800 مەتر بيىكتىكتەن 3000-نان اسا مارتە سەكىرۋدى ورىندادى، دەپ حابارلايدى aqshamnews.kz.
العاشقىلاردىڭ قاتارىندا كەڭەس وداعىنىڭ باتىرى گەنەرال-مايور يۆان پانفيلوۆ اتىنداعى 37ء-شى دەسانتتىق-شابۋىلداۋ بريگاداسىنىڭ 8 ارۋ جاۋىنگەرى بار. بريگادا كومانديرى پولكوۆنيك الماس تولەگەنوۆ ولاردى العاشقى سەكىرۋ جاتتىعۋىن ورىنداۋىمەن قۇتتىقتادى.
– اۋەدە العاشقى قادامدارىن جاساپ، بويداعى قورقىنىشتى جەڭىپ، ناعىز دەسانتشىمىن دەي الاسىڭدار. مەن باتىلدىقپەن جانە قۇشتارلىقپەن سەكىرۋ ءۇشىن دايىندىقتان ءوتىپ، نورماتيۆتەردى تاپسىرعان قىزدارىمىزدى ماقتان تۇتامىن، – دەپ اتاپ پولكوۆنيك الماس تولەگەنوۆ.
سەكىرۋگە دايىندىق ەكى اپتاعا سوزىلدى. پاراشيۋتشىلەرگە ۇيرەتەتىن ءبىرىنشى نارسە 4 سەريالى د-6 پاراشيۋت جۇيەسىنىڭ تاكتيكالىق جانە تەحنيكالىق سيپاتتامالارىن جانە قۇرامداس بولىكتەرىن ءبىلۋ، سەكىرۋ ءۇشىن ءپاراشيۋتتى ءوز بەتىنشە وراۋ جانە اسپاندا ورىن الۋى ىقتيمال شتاتتان تىس جاعدايلاردا دۇرىس ارەكەت ەتۋ. بۇنىڭ ءبارى بريگادالاردىڭ اۋە-دەسانتتىق كەشەندەرىنىڭ ترەناجەرلارىندا پىسىقتالادى.
– بريگادادا قىزمەت ەتىپ جۇرگەنىمە ءبىر جىلدان استى. پاراشيۋتپەن سەكىرۋگە ۇزاق ۋاقىت دايىندالدىم. ارينە، باسىندا قورقىنىش بولدى، دەگەنمەن تالاي مارتە سەكىرىپ جۇرگەن تاجىريبەلى ارىپتەستەرىم ءبىزدى بورتتا جىگەرلەندىرىپ، كەڭەستەرىن ايتتى. ال بورت ەسىگىن اشقان نۇسقاۋشى «دەسانت تۇسۋگە دايىندالىڭدار» پارمەنىن بەرگەندە، بارلىق ەموسيالار جوعالىپ، سەكىرۋگە دەگەن قۇشتارلىق پايدا بولدى، – دەدى العان اسەرىن بولىسە اعا مامان كىشى سەرجانت گۇلزارياما ابدريشيتوۆا.
ءدال سول كۇنى – اسا كۇردەلى ءارى جاۋاپتى كەزەڭدە اۋەدە 1500-دەن 2000 مەترگە دەيىنگى بيىكتىكتەن 15-20 سەكۋند كىدىرىسپەن 47 وفيسەر مەن كەلىسىمشارت بويىنشا اسكەري قىزمەتشىسى بار دەسانتتىق-شابۋىلداۋ اسكەرلەرىنىڭ سپورتتىق-پاراشيۋتتىك كومانداسى پاراشيۋتپەن سەكىرۋ جاتتىعۋلارىن ورىندادى.
سەكىرۋ تاپسىرمالارىن ءساتتى ورىنداۋ تەك باتىلدىق پەن ەرىك-جىگەردى عانا ەمەس، سونداي-اق بارلىق ەرەجەلەردى، جيناقىلىقتى، اسقان شەبەرلىكتى ناقتى ورىنداۋدى تالاپ ەتەتىنىن ايتا كەتكەن ءجون.