اسحات ايماعامبەتوۆ بالالارىنىڭ وقۋىنا ارالاسپايتىن اتا-انالار جايلى ءسوز قوزعادى

وقۋ-اعارتۋ ءمينيسترى اسحات ايماعامبەتوۆ بالا ساباعىنا كىرىسپەيتىن اتا-انالارعا كەڭەس بەردى، دەپ حابارلايدى Almaty-akshamy.kz Baq.kz-كە سىلتەمە جاساپ. 

«بىزدە ءارتۇرلى زەرتتەۋلەر بار. ونىڭ ىشىندە TIMSS زەرتتەۋى بار ول بالالاردىڭ  ۇلگەرىمىن انىقتايدى. سونداي-اق PISA اتتى حالىقارالىق زەرتتەۋ بار. 2019 TIMSS زەرتتەۋىمەن 4 سىنىپ وقۋشىلارىنىڭ ۇلگەرىمىن قارادىق. سوندا ولاردىڭ ۇلگەرىمىنە قانداي فاكتورلار اسەر ەتتى دەگەن سۇراققا جاۋاپ ىزدەدىك»، - دەدى اسحات ايماعامبەتوۆ.

ءمينيستردىڭ سوزىنشە، زەرتتەۋدىڭ ارقاسىندا ناقتى فاكتورلار انىقتالعان.

«زەرتتەۋ ناتيجەسىندە، ورتاشا ەسەپپەن العاندا، ۇيدەگى اتا-انالارى بالالارىنا كومەكتەسىپ، بالالارىنىڭ وقۋىنا ارالاساتىن وتباسىندا باعالارى الدەقايدا جوعارى بولدى. ال بالا ساباعىنا كىرىسپەيتىن، وعان نەمقۇرايلى قارايتىن اتا-انالاردىڭ بالالارىنىڭ ورتاشا باعاسى - 20-25 بالل. بۇل - ناقتى كورسەتكىش»، - دەدى اسحات ايماعامبەتوۆ «سانالى ۇرپاق – ۇلت بولاشاعى» اتتى رەسپۋبليكالىق تامىز كونفەرەنسياسىندا.

وسى فاكتورلاردى ايتا كەلە، مينيستر بالانىڭ كاسىبي جەتىستىككە جەتۋى ونىڭ اتا-اناسىمەن بىرگە كىتاپ وقۋى مەن ءبىلىم الۋعا دەگەن جاعدايىنىڭ تولىقتاي جاسالۋىنا بايلانىستى ەكەنىن ايتتى.