الماتى قالاسىنىڭ پوليسەنترلىك دامۋ يدەولوگياسى اياسىندا الاتاۋ اۋدانىندا الەۋمەتتىك-ەكونوميكالىق سالا ىلگەرىلەپ كەلەدى. بۇل تۋرالى الماتى قالاسى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا اۋدان اكىمى تالعات مالىبايەۆ مالىمدەدى، دەپ حابارلايدى aqshamnews.kz
ونىڭ ايتۋىنشا، 2025 جىلدىڭ العاشقى بەس ايىندا اۋدان ەكونوميكاسىنا تارتىلعان ينۆەستيسيا كولەمى 97،5 ملرد تەڭگەگە جەتتى، وتكەن جىلعى وسى ۋاقىتپەن سالىستىرعاندا 127%-عا ارتقان. سونىمەن قاتار، كاسىپكەرلىك تە ءوستى. تىركەلگەن بيزنەس سۋبەكتىلەرىنىڭ سانى 14%-عا كوبەيىپ، بۇل ءوز كەزەگىندە سالىق ءتۇسىمىنىڭ 48،4 ملرد تەڭگەدەن 66،8 ملرد تەڭگەگە دەيىن، ياعني 38%-عا وسۋىنە ىقپال ەتكەن. سونىڭ ارقاسىندا 1 500 جاڭا جۇمىس ورنى اشىلىپتى.
«ەكونوميكالىق ءوسىمنىڭ ارقاسىندا الاتاۋ اۋدانىنىڭ بيۋدجەتى وتكەن جىلمەن سالىستىرعاندا 30%-عا ءوسىپ، شامامەن 57 ملرد تەڭگەگە جەتتى. بۇل بىزگە ينفراقۇرىلىمدى دامىتۋ مەن تۇرعىنداردىڭ ءومىر ساپاسىن جاقسارتۋعا قارجى بولۋگە مۇمكىندىك بەرىپ وتىر»، – دەپ اتاپ ءوتتى تالعات مالىبايەۆ.
اۋدان اكىمى سونداي-اق 2025 جىلى جول ينفراقۇرىلىمىن جاقسارتۋعا باعىتتالعان اۋقىمدى باعدارلامانىڭ جۇزەگە اسا باستاعانىن حابارلادى. 18 شاعىناۋداندا جالپى ۇزىندىعى 86،4 شاقىرىم بولاتىن 172 كوشە ورتاشا جوندەۋدەن وتە باستادى. بورالداي (57 كوشە، 14،3 كم) جانە راحات-مادەنيەت (107 كوشە، 36،3 كم) شاعىن اۋداندارىندا جاڭا جول سالىنا باستادى. سايىن كوشەسىن 3،2 شاقىرىمعا، تىلەندييەۆ كوشەسىن 10،5 شاقىرىمعا جانە رىسقۇلوۆ داڭعىلىن دا ۇزارتۋ جۇمىسى ءجۇرىپ جاتىر. سونىمەن قاتار، جالپى اۋدانى 15 مىڭ شارشى مەتر بولاتىن شۇڭقىر جوندەلىپ، جۇمىس ءالى جالعاسىپ جاتىر.